Malakaus 1:32-35
Nqe cim:
“Hnub tom qab thaum kaj ntug txoog, Yexus txawm sawv thiab tawm hauv tsev mus rau tom ib qho chaw uas tsis muaj neeg thiab thov Vajtswv.” (Malakaus 1:35)
Lus nug rau sawvdaws xav:
– Thaum ua haujlwm khwv khwv rau hnub Xanpataus txij sawv ntxov mus txog tsaus ntuj, Tswv Yexus ua dabtsi thaum kaj ntug txoog?
– Kev thov Vajtswv ua rau Tswv Yexus tes haujlwm zoo li cas?
– Peb kawm tau yam dabtsi ntawm Tswv Yexus tus qauv thov Vajtswv?
Nyob hauv lub nroog Kanpena-us, ncaj rau hnub Xanpataus, Tswv Yexus mus rau hauv lub tsev sablaj qhia Vajtswv Txojlus thiab kho tus neeg raug dab zoo. Thaum tawm hauv tsev sablaj mus, Tswv Yexus mus saib Petus niamtais thiab kho Petus niamtais tabtom mob npaws no zoo. Thaum hnub poob, txhais tau tias tas hnub Xanpataus, cov neeg muaj mob coob coob tuaj thov Yexus kho, kuj muaj cov neeg raug dab thiab. Tus Tswv siv sijhawm, dag zog los kho lawv tej mob huvsi. Tiamsis hnub tom qab thaum kaj ntug txoog, Tswv Yexus sawv thiab mus rau “qhov chaw ntsiag to” thov Vajtswv (nqe 35). Thaum thov Vajtswv tas, tus Tswv nrog cov thwjtim mus rau ntau qhov chaw qhia Txojmoo Zoo, uas hais txog Vajtswv txojkev cawm dim.
Lus Kilis txhais tias “qhov chaw ntsiag to” yog hais txog ib qhov chaw uas tsis muaj neeg, cais tawm cov neeg coob coob thiab cov thwjtim. Lo lus “thov Vajtswv” ntawm no yog hais txog ua siab ntev thov Vajtswv, siv sijhawm ntev loo. Txojmoo Zoo uas Malakaus sau kuj hais txog ob qho chaw tsis muaj neeg ntsiag to uas Tswv Yexus mus thov Vajtswv, hauv Malakaus 6:46 hais tias tom qab uas ua mov rau tsib txhiab leej noj, tus Tswv “nce mus saum roob thov Vajtswv”, thiab hauv Malakaus 14:32-42, Tswv Yexus thov Vajtswv hauv lub vaj Khexemanes peb zaug, thiab tagnrho peb zaug no puavleej yog cov sijhawm nyuaj uas Nws raug kev sim siab xaiv yuav txojkev yoojyim lossis xaiv yuav txojkev txomnyem tuag theej neeg ntiajteb lub txhoj.
Tswv Yexus yog Vajtswv tus Tub, tiamsis thaum los yug ua neeg, Nws ua raws nraim li Leej Txiv txojkev npaj tseg thiab ua haujlwm los ntawm Vaj Ntsujplig lub hwjchim, yog li Nws niaj hnub thov Vajtswv thiab saib hlob kev thov Vajtswv. Kuj ib yam nkaus, dhau ntau tiam los, kev thov Vajtswv yeej yog qhov uas tseemceeb nyob hauv cov ntseeg Vajtswv lub neej. Hauv txojkev pehawm Vajtswv hauv lub tuamtsev, thov Vajtswv yog qhov tseemceeb. Tiamsis thov Vajtswv tsis yog thov hauv tuamtsev xwb, Vajtswv cov menyuam yuav tsum kawm xyaum Tswv Yexus tus qauv, nrhiav sijhawm ntsiag to, xaiv “qhov chaw tsis muaj neeg” nrog Vajtswv sib txuas lus, nrog Nws sib raug zoo. Peb qhov chaw ntsiag to nimno tsis yog yuav tsum nce mus saum roob siab lossis mus hauv lub vaj dav dav, tiamsis qhov ntawd yog txhua thaj chaw uas ntsiag to tsis muaj tej suab neeg nrov nroo lossis yam dabtsi ua tab kaum peb txojkev thov Vajtswv. Cov ntseeg Yexus yuav tsum kawm thiab tswj tus kheej rau kev thov Vajtswv ntsiag to nrog tus Tswv tsis tso tseg. Vaj Ntsujplig yuav txhawb zog, ntxiv zog, thiab coj qhia peb tiv dhau tej kev txomnyem, sim siab hauv lub neej thaum peb muaj kev thov Vajtswv ntsiag to ntau nrog tus Tswv.
Thov Vajtswv,
Vajtswv, thov Koj zam txim rau nyuam yaus vim muaj ntau zaus nyuam yaus tsis muab qhov kev thov Vajtswv saib tseemceeb. Thov Vajtswv Koj qhia kom nyuam yaus niaj hnub nrhiav Koj txojkev coj qhia, txhawb zog, los ntawm kev thov Vajtswv nrog Koj ntawm tej thaj chaw ntsiag to. Nyuam yaus tuav Tswv Yexus lub npe thov, Amees.
Peb twb kawm xyaum Tswv Yexus tus qauv qhia txhua yam kev cheemtsum, homphiaj rau Leej Txiv lawm los tseem tsis tau qhia?
Nyeem Vajluskub hauv peb lub xyoo: Pajlug 21
Kênh Youtube BHKTHN:
