Lukas 11:1-10
Nqe cim:
“Txawm yog nej yog neeg txhaum los nej tseem paub muab yam zoo rau nej tej menyuam. Yog li ntawd, nej Leej Txiv tus uas nyob saum ntuj ceebtsheej, nws yimhuab yuav muab Vaj Ntsujplig tus Dawbhuv rau txhua tus uas thov nws!” (Lukas 11:13)
Lus nug rau sawvdaws xav:
– Cov neeg thiab tej xwm hauv zaj xwm uas Yexus hais sawv cev rau leejtwg thiab dab tsi?
– Tswv Yexus xav qhia cov thwjtim yam dab tsi los ntawm zaj xwm no?
– Peb cheemtsum hloov yam dab tsi hauv kev thov Vajtswv?
Tom qab uas qhia cov thwjtim kev thov Vajtswv (nqe 1-4), Tswv Yexus piav qhia meej Nws tej lus qhia los ntawm ib zaj xwm ib tug tswv tsev muaj qhua tuaj thaum ib tag hmo tiamsis hauv nws tsev tsis muaj mov lawm. Qhua tuaj hauv ib tug phoojywg tsev thaum ib tag hmo yog ib qho tsheejxeeb, vim lub sijhawm ntawd tsis muaj tsev tos qhua ntau, thiab tej tsev tos qhua ntawd kuj nyob tsis tso siab. Vim li ntawd, nyob rau sab hnub tuaj kev txais qhua zoo yog ib tes haujlwm uas zoo kawg nkaus, txawm yog qhua tuaj thaum tsis paub los xij, kuj yuavtsum tos txais. Vim li ntawd, hauv lub sijhawm no tus tswv tsev txhawj kawg vim tsis muaj mov los tiam tus qhua.
Cia kom daws tau qhov kev cheemtsum no, tus tswv tsev thiaj khiav mus rau ntawm nws ib tus phoojywg zej zog thov txais peb lub ncuav, tiamsis tej uas tus neeg no tau txais yog lolus teb tsis kam vim “twb liaj qhovrooj” lawm, nov yog lub cim uas qhia pom tus phoojywg zej zog no tsis xav kom muaj leejtwg tuaj txob nws. Nyob rau Palexatees, ua neej koom pab pawg saib loj heev. Yam xubthawj hauv lub sijhawm yav sawv ntxov qhov rooj qhib thiab txawm yog leejtwg yeej mus tau hauv thiab tawm rov los tiamsis yog qhov rooj liaj lawm yog lub cim uas tus tswv tsev xav kom muaj sijhawm nyob ntsiag to, tsis muaj leejtwg muaj cai tuaj cuamtshuam tsuas yog thaum muaj tej kev cheemtsum kawg nkaus xwb. Tsis tas li ntawd, tus phooywg zej zog tseem qhia paub hais tias “kuv thiab kuv cov menyuam twb pw tas lawm”. Cov Yixalayees li tsev tiam thaud tsuas muaj ib chav xwb, yog muaj neeg sawv mus qhib qhov rooj ces yuav ua rau tagnrho tsev neeg tsim dabntub huv tibsi. Txawm li ntawd los, tus uas tuaj thov ncuav xav thov kom tau ncuav los tiam qhua nws thiaj pheej thov “tsis paub txajmuag”. Hais rau lwm seem, mus rau hauv lwm tus tsev thaum ib tag hmo thiab txob luag yog ib tus cwjpwm tsis paub cai thiab txwv tsis pub ua li ntawd.
Peb zeem paub hais tias tus tswv tsev mus txais ncuav yog tus duab ntawm Tswv Yexus cov thwjtim, tus phoojywg zej zog yog tus duab ntawm Vajtswv (nqe 13), thiab qhov uas thov ncuav yog tus duab thov Vajtswv. Dhau los ntawm zaj lus pivtxwv no, Tswv Yexus nqua hu Nws cov thwjtim cia li los cuag Vajtswv thiab qhia txhua yam uas lawv cheemtsum rau Vajtswv vim Vajtswv yeej yuav teb lawv tej lus thov.
Ntau tus tibneeg hais tias yog Vajtswv paub tagnrho txhua yam (Ntawv Nkauj 139:4) ces yog vim li cas tus ntseeg yuavtsum thov Vajtswv? Zaj lus pivtxwv no qhia pom hais tias tus ntseeg kev thov Vajtswv yog qhov uas raws li Vajtswv siab nyiam, heev tshaj qhov no yog qhov uas Vajtswv xaiv ua Nws tes haulwm los ntawm lub hwjchim thiab nov kuj yog yam cheemtsum rau peb sib txuas nrog Vajtswv.
Thov Vajtswv,
Tus Tswv, nyuam yaus ua Koj tsaug vim Koj pub rau nyuam yaus muaj kev sib txuas lus ncaj nraim nrog Koj los ntawm kev thov Vajtswv. Nyuam yaus ua Koj tsaug vim nyuam yaus paub hais tias Koj yeej ib txwm tig pob ntseg mloog nyuam yaus tej lus thov. Thov Koj pub kom nyuam yaus siv zog thiab ua siab ntev thov Vajtswv. Nyuam yaus tuav Tswv Yexus Khetos lub npe thov, Amees.
Ib tsoom mloog uas hmov tshua,
Peb thov Vajtswv los ntawm lub siab zoo li cas?
Nyeem Vajluskub hauv peb lub xyoos: Yaxayas 31
Kênh Youtube BHKTHN:
