Klei Aê Diê Blŭ: Y-Luk 11:1-10
Êlan kliăng: “Tơdah diih jing phung jhat thâo brei mnơ̆ng jăk kơ phung anak diih, kdlưn hĭn kơ anăn mơh Ama hlăm adiê srăng brei Yang Mngăt Jăk kơ hlei pô akâo kơ Ñu!” (Y-Luk 11:13)
Klei êmuh ksiêm mĭn: Dŭm phung mnuih leh anăn mta klei čêč drêč hlăm klei Khua Yang yăl dliê, čiăng bi ala kơ hlei pô leh anăn kơ ya mta klei? Ya mta klei Khua Yang Yêsu čiăng bi hriăm phung ƀĭng kna kơ klei wah lač? Ya mta klei čiăng brei drei bi mlih hlăm klei wah lač?
Leh bi hriăm phung ƀĭng kna wah lač (êlan 1-4), Khua Yang Yêsu lŏ bi hmô čiăng bi klă klei Ñu mtô hŏng klei yăl dliê kơ sa čô khua sang mâo tue nao kơ ñu êjai krah mlam, ƀiădah hlăm sang ñu jih leh klŏ kpŭng. Tue nao kơ sang mah jiăng pô êjai krah mlam jing sa boh klei mdê hŏng yang đar, kyuadah hlăk ênuk anăn amâo mâo lu sang jưh ôh leh anăn anôk sang jưh ăt kăn mâo klei hơĭt ênang rei. Kyuanăn bhiăn hŏng phung krĭng Ngŏ, klei jum tue jing sa mta bruă ngă yuôm myang, wăt tơdah tue truh jêč mêč amâo hưn êlâo dưn, ăt brei jum tue hŏng ai tiê kmah mơh. Kyuanăn hlăm boh klei truh anei, khua sang rŭng răng kyuadah amâo lŏ mâo ôh mnơ̆ng ƀơ̆ng čiăng mdơ̆ng kơ tue.
Čiăng bi mgaih msir klei dleh truh anei, khua sang êran nao kơ sang mah jiăng riêng gah ñu čiăng čan tlâo klŏ kpŭng, ƀiădah lĕ, jih klei pô anei mă tŭ, jing klei hngah mơ̆ng pô riêng gah ñu hŏng phŭn knhal “ƀăng bhă kđăl leh”, anei jing klei bi knăl brei ƀuh pô riêng gah anei amâo čiăng arăng bi kpăk ñu ôh. Ti Palestine, knuih bhiăn klei hdĭp hlăm ƀuôn sang thâo bi jum snăk. Bruă bhiăn ngă êlâo hĭn grăp aguah ưm jing pŏk ƀăng bhă leh anăn jih jang mnuih dưi mŭt kbiă êngiê, ƀiădah tơdah ƀăng bhă kđăl, anăn jing klei bi knăl pô sang čiăng dôk kriêp hjăn, amâo mâo pô dưi bi kpăk ôh knŏng tơdah mâo bruă jêč mêč êdi kơh. Kdlưn hĭn mơh, pô riêng gah anăn hưn brei thâo “phung anak leh anăn kâo dôk đih leh”. Sang dôk phung Israel hlăk ênuk anăn knŏng mâo sa boh adŭ, tơdah mâo sa čô kgŭ pŏk ƀăng bhă, snăn srăng bi mdih jih jang mnuih hlăm sang. Ƀiădah pô čan klŏ kpŭng, kyuadah čiăng đei mâo klŏ kpŭng mdơ̆ng kơ tue kyuanăn ñu “bi kpăk” pô riêng gah. “Bi kpăk” lŏ mâo klei mblang mkăn jing “amâo thâo hêñ”. Blŭ mdê, klei nao kơ sang mnuih mkăn êjai krah mlam ngă bi rŭng, jing sa mta klei amâo mâo klei bhiăn leh anăn jing klei kăm ngă snăk.
Drei dưi ƀuh pô khua sang nao čan klŏ kpŭng jing rup phung ƀĭng kna Khua Yang Yêsu, bi pô riêng gah jing rup bi dră mklăk hŏng Aê Diê (êlan 13), leh anăn klei ngă kwưh akâo klŏ kpŭng jing rup klei wah lač yơh. Mơ̆ng klei bi hriêng anei, Khua Yang Yêsu čiăng iêô mthưr phung ƀĭng kna brei jhŏng nao kơ Aê Diê čiăng myơr hưn bi êdah klei diñu čiăng kơ Ñu, kyuadah sĭt nik Ñu srăng wĭt lač kơ klei diñu wah lač.
Lu mnuih lač snei, tơdah Aê Diê thâo leh jih jang klei (Klei Mmuñ Hđăp 139:4) snăn ya yuôm phung đăo kơ Krist lŏ wah lač? Klei yăl dliê bi hriêng anei brei ƀuh klei phung đăo kơ Krist wah lač jing klei Aê Diê čiăng, kdlưn hĭn mơh anei jing êlan hdră Aê Diê ruah čiăng kơ klei ktang myang Ñu ngă bruă, leh anăn anei ăt jing bruă ngă yuôm kơ klei drei bi mguôp hŏng Khua Yang.
Hŏng si ai tiê drei dôk wah lač hŏng Khua Yang?
Wah lač: Ơ Khua Yang, bi mni lač jăk kơ Khua Yang kyuadah kâo dưi bi mguôp klă anăp hŏng Ih hŏng klei wah lač. Kâo hdơr knga bi mni kơ Khua Yang kyuadah kâo thâo Ih dôk mđing kăp hmư̆ klei kâo wah lač. Akâo Khua Yang brei kơ kâo klei ktang leh anăn dôk gĭr wah lač hŏng Khua Yang nanao. Kâo wah lač hlăm Anăn Khua Yang Yêsu Krist, Amen.
Dlăng Klei Aê Diê Blŭ hlăm tlâo thŭn: Y-Êsai 31
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm.
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
