Yaxayas 53:3-6
Nqe cim:
“Peb txhua tus zoo li tej yaj uas yuam kev lawm; peb sawvdaws nyias mus nyias ib txojkev raws li nyias lub siab nyiam, tiamsis tus Tswv muab peb lub txim uas tsimnyog peb raug tso rau Nws ris.” (Yaxayas 53:6)
Lus nug rau sawvdaws xav:
– Tus uas tiv kev txomnyem yog leejtwg thiab Nws tiv txomnyem vim leejtwg?
– Nws raug tej kev txomnyem zoo li cas?
– Qhov uas Nws raug txomnyem muaj nqis dabtsi rau peb?
Yaxayas 53 yog zaj nkauj hu qhuas tus Tswv tus tubtxib txojkev txomnyem. Tus tubtxib no yog tus Mexiyas uas tau Vajtswv coglus tseg tso los pab peb, yog Yexus Khetos. Ntau pua xyoo ua ntej Tswv Yexus los yug, tus cevlus Yaxayas twb yeej hais txog txojkev txomnyem uas Nws raug. Vajtswv Txojlus yeej hais meej tias tus Mexiyas yuav raug txomnyem this peb: “Nws ris peb tej kev txomnyem thiab ris peb tej kev mob kev nkeeg” (nqe 4), “vim peb tej kev txhaum”, “vim tej kev phem uas peb ua” (nqe 5). Lo lus “peb” no yog hais txog Vajtswv haivneeg, cov neeg uas ua txhaum tus Tswv txoj kevcai. Hais kom dav, “peb” yog hais tagnrho tibneeg ntiajteb, cov uas Vajtswv tsim tiamsis tsis lees yuav Nws, ua raws li lawv lub siab nyiam thiab tsau rawv rau txojkev txhaum. “Yexus Khetos yog tus uas tuag theej peb lub txhoj Vajtswv thiaj zam peb tej kev txhaum, tsis yog zam peb tej kev txhaum xwb, tiamsis Nws zam txhua haivneeg hauv ntiajteb no tej kev txhaum huv tibsi thiab.” (I Yauhas 2:2).
Vim peb tej kev txhaum, Tswv Yexus thiaj raug “saib tsis taus thiab muab tso povtseg, raug kev txomnyem, nyiaj rawv txojkev mob.” Nws raug “ntaus thiab nplawm, ris peb tej kev txomnyem”. Nws lub cev raug nplawm nqaij ntuag ntshav rog. Muab ntsia saum ntoo khaublig thiab tuag theej cov neeg txhaum chaw. Qhov uas txaus ntshai kawg nkaus, Tswv Yexus raug tsis yog tiv kev mob lossis kev tuag xwb, tiamsis “tus Tswv muab peb lub txim uas tsimnyog peb raug tso rau Nws ris” (nqe 6). Vim li cas Vajtswv tib Leej Tub, tus uas dawbhuv thiab tsis ua txhaum, txaus siab los ris tagnrho lub ntiajteb tej kev txhaum saum Nws lub cev li ntawd? Lub homphiaj Tswv Yexus tiv kev txomnyem yog pab kom peb tau nyob kaj siab lug thiab tej kev mob nkeeg zoo (nqe 5). Peb zoo li tus yaj uas yuam kev lawm, thiab raug txim mus nyob ibtxhis hauv ntuj tawg. Tiamsis Tswv Yexus twb ris peb lub txim thiab them tus nqi kev txhaum kom peb cov uas los ntseeg Nws tau kev zam txim, ua tau neeg ncaj ncees thiab tau txojsia ntev dhawv mus ibtxhis.
Hauv zaj nkauj muaj lub npe “Tus Tswv Kwv Ntoo Khaublig” uas Kx Lê Đình Tươi sau hais tias: “Cawm neeg, tus Tswv kwv ntoo khaublig; hloov kuv, tus Tswv muab Nws fij. Kuv muab tsis tau dabtsi pauj, Koj txojkev hlub – kuv tus Tswv!” Tau txais Tswv Yexus txojkev tuag txhiv loj kawg nkaus vim peb, tau txais txojkev hlub tus Tswv pub, peb txhua tus cia li ua neej pub rau Nws.
Thov Vajtswv,
Kuv tus Tswv, vim hlub nyuam yaus Koj los nrhiav thiab cawm, tiv txomnyem hloov nyuam yaus. Yog muab hais nyuam yaus tsis tsimnyog Koj tuag txhiv khwv npaum ntawd. Lub caij ua koobtsheej nco txog Tswv Yexus raug txomnyem – Sawv hauv qhov tuag rov los xyoo no, thov Koj pab kom nyuam yaus tig los xav txog tej uas tus Tswv Koj ua rau nyuam yaus, thiab nyuam yaus yuav muab lub neej fij ua Koj tug mus li. Nyuam yaus tuav Tswv Yexus lub npe thov, Amees.
Hnub no, peb yuav muab dabtsi los pauj tus Tswv txojkev tuag txhiv yus?
Nyeem Vajluskub hauv peb lub xyoo: II Vajntxwv 9
Kênh Youtube BHKTHN:
