Klei Aê Diê Blŭ: Y-Êsai 53:3-6
Êlan kliăng: “Jih jang drei msĕ si biăp klah đuĕ leh, grăp čô drei wir tui hlue êlan Ñu pô; leh anăn Yêhôwa dưm leh ti Ñu klei wê jih jang drei” (Y-Êsai 53:6)
Klei êmuh ksiêm mĭn: Hlei Pô tŭ klei knap mñai jing leh anăn Ñu tŭ klei knap mñai kyua hlei? Si Ñu tŭ leh klei knap mñai? Ya klei yuôm mâo kơ drei mơ̆ng klei Ñu tŭ klei knap mñai?
Y-Êsai kdrêč 53 jing sa klei mmuñ kơ klei Dĭng Buăl Yêhôwa tŭ klei knap mñai. Dĭng Buăl anei yơh jing Yang Mêsi – Pô Aê Diê ƀuăn srăng tiŏ hriê, jing Khua Yang Yêsu Krist. Dŭm êtuh thŭn êlâo kơ arăng kkiêng kơ Yêsu, Khua pô hưn êlâo Y-Êsai hưn djŏ trĭp kơ klei knap mñai Gơ̆ srăng tŭ. Klei Aê Diê Blŭ hưn klă Yang Mêsi tŭ klei knap mñai kyua phung drei: “Ñu klam leh klei ruă duam drei, Ñu gui leh klei ênguôt hnĭng drei” (êlan 4). “Kyua klei drei gao klei bhiăn”, “kyua klei wê drei” (êlan 5). Boh blŭ “drei” tinei čiăng lač kơ phung ƀuôn sang Aê Diê, jing phung gao leh klei bhiăn Ñu. Blŭ bi ƀai hĭn jing, “drei” čiăng lač kơ jih jang mnuih ti lăn ala anei, jing mnơ̆ng Aê Diê hrih mjing leh ƀiădah hngah leh kơ Ñu, hdĭp tui si klei pô čiăng leh anăn dôk kram hlăm klei soh. “Ñu jing Pô bi tui klei soh drei, leh anăn amâo djŏ knŏng kơ klei soh drei ôh, ƀiădah wăt kơ klei soh jih lăn ala” (I Y-Yôhan 2:2).
Kyua klei soh drei, Khua Yang Yêsu tŭ klei “arăng bi êmut leh anăn hngah, bŏ hŏng klei ênguôt, thâo kral klei ruă” . Ñu tŭ klei Aê Diê “čăm leh anăn bi knap”. Asei mlei Ñu bŏ hŏng gru kplač êka. Leh anăn kdlưn hĭn jing ti dlông kyâo bi kal, Ñu tŭ klei arăng pơ̆ng hŏng msei kđĭn leh anăn djiê msĕ si sa čô mnuih mâo klei soh prŏng hŏng klei bhiăn. Klei jhat hĭn Khua Yang Yêsu tŭ amâo djŏ klei ruă amâodah klei djiê ôh, ƀiădah “Yêhôwa dưm leh ti Ñu klei wê jih jang drei” (êlan 6). Ya ngă Anak Aê Diê mâo knŏng Sa Čô, jing Pô doh jăk leh anăn kpă ênô klam hĕ klei soh jih jang mnuih, yap Ñu jing msĕ si sa čô ngă djăp mta klei soh snăn lĕ? Klei kñăm čiăng mơ̆ng klei Khua Yang Yêsu tŭ klei knap mñai jing čiăng bi suaih leh anăn bi hlao drei (êlan 5). Jih jang drei jing msĕ si biăp klah đuĕ nao kơ anôk rai tuč, klei bi kmhal pioh leh kơ drei jing klei djiê hlŏng lar hlăm war pui. Ƀiădah Khua Yang Yêsu klam hrô brei leh anăn tla brei leh nư klei soh, čiăng kơ hlei pô đăo kơ Ñu srăng mâo klei pap brei kơ klei soh, dưi mâo klei yap kpă leh anăn mâo klei hdĭp hlŏng lar.
Hlăm klei mmuñ “Yêsu tŭ klei knap mñai”, Khua pô mtô Lê Đình Tươi čih snei, “Đru dŏng leh anăn bi mtlaih kâo, săn asei mlei amâo huĭ kơ djiê. Kâo đăo sĭt hŏng jih ai tiê: Klei Yêsu khăp jing prŏng êdi!” Tơdah drei thâo Khua Yang Yêsu săn asei mlei tŭ leh klei knap mñai kyua drei, leh anăn mă tŭ leh klei khăp prŏng Ñu brei, snăn brei grăp čô drei myơr jih klei hdĭp drei kơ Ñu.
Hruê anei, ya mnơ̆ng drei srăng mă čiăng bi hnô kơ klei Khua Yang Yêsu tŭ leh kyua drei?
Wah lač: Ơ Khua Yang, kyua khăp kơ kâo Ih hriê duah leh anăn bi mtlaih kâo, tŭ klei knap mñai hrô kơ kâo. Kâo jing pô amâo năng ôh hŏng klei khăp prŏng Ih. Hlăm yan bi hdơr kơ knăm Ih tŭ klei knap mñai – leh anăn kbiă lŏ hdĭp thŭn anei, đru kâo hdơr mĭn kơ jih bruă Ih ngă leh, čiăng ƀuh klei pap Ih prŏng êdimma, leh anăn kâo myơr jih klei hdĭp kâo kơ Ih. Kâo wah lač hlăm Anăn Yêsu Krist. Amen.
Dlăng Klei Aê Diê Blŭ hlăm tlâo thŭn: II Bruă Mtao 9
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm.
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
