Efexus 2:19-22
Nqe cim:
“Yog li ntawd nej cov uas yog lwm haivneeg, nej tsis yog lwm haivneeg lawm, nej yog Vajtswv haivneeg. Nej muaj feem ib yam li Vajtswv haivneeg, thiab nej yog Vajtswv tsevneeg lawm” (Efexus 2:19).
Lus nug rau sawvdaws xav:
– Timthawj Paulus xaus lus licas txog txojkev sib raug zoo ntawm cov ntseeg tus Tswv?
– Paulus siv tus duab twg los qhia txog txojkev sib raug zoo ntawd?
– Tus duab ntawd muaj lub ntsiab licas?
– Koj yuav ua yam dabtsi pab rau Vajtswv tsevneeg?
Tom qab uas txhais qhia txog qhov kev koom ua ke ntawm cov neeg Yudais thiab lwm haivneeg dhau los ntawm Yexus Khetos cov ntshav, Timthawj Paulus xaus lus hais tias lwm haivneeg tsis yog lwm haivneeg lawm tiamsis lawv yog ib feem nyob hauv Vajtswv tsevneeg lawm (nqe 19). Tswv Yexus yog tus uas rhuav tshem qhov ntawd thiab muab cov neeg uas ntseeg Nws los koom ua ke nyob hauv Nws tsevneeg, tsis muaj qhov kev cais cov neeg Yudais thiab lwm haivneeg lawm.
Timthawj Paulus siv tus duab “lub tsev” los qhia txojkev sib raug zoo ntawm cov ntseeg. Txhua lub Pawg Ntseeg yog ib feem hauv “lub tsev” loj, thiab txhua tus ntseeg Yexus yog ib lub pobzeb ntawm lub tsev, Tswv Yexus yog tus ncej tuav cov phab ntsa ua ke thiab txheem kom lub tsev ruaj khov (nqe 20-21). Lub tsev yuav ua qhov chaw rau Vajtswv nyob dhau los ntawm Vaj Ntsujplig. Tagnrho cov ntseeg Yexus puavleej yog “Vajtswv tsevneeg” thiab “ua ib lub tsev rau Vajtswv tus Ntsujplig nyob” (nqe 22). Qhov no yog yam tseemceeb ntawm txojkev ntseeg uas txhua tus ntseeg Yexus yuav tsum tau paub meej thiaj paub ceev Vajtswv tsevneeg kom zoo.
Nyob hauv cov zaj kawm phau “Ua Neej Raws Homphiaj” uas Kx. Rick Warren sau, nws kuj hais txog txojkev sib raug zoo hauv Vajtswv tsevneeg. Rick Warren sau hais tias lub homphiaj tim ob ntawm tus ntseeg Yexus lub neej yog “raug tsim los rau Vajtswv tsevneeg”. Yog li, peb txhua tus cheemtsum yuav tsum tau sib pab txhim kho ua kom Nws tsevneeg muaj kev sib raug zoo, ib leeg kawm ib leeg ua neej, sib hlub sib pab thiab tuav rawv txojkev sib raug zoo nyob hauv Pawg Ntseeg.
Txojkev sib raug zoo hauv Vajtswv tsevneeg cheemtsum txhua tus ntseeg Yexus yuav tsum tau ua tib zoo ua ib yam li tswj rawv lub neej sab ntsujplig, vim qhov ntawd ua hiam txojkev loj hlob ntawm Pawg Ntseeg. “Sib raug zoo lossis koom ua ke” tsis tau txhais hais tias yog koom noj haus ua ke, sib tham lus ua ke tiamsis nws muaj lub ntsiab lus zoo dua raws li tus qauv cov ntseeg Yexus nyob rau thawj lub Pawg Ntseeg ua (Tes Haujlwm 2:42-47). Qhov ntawd yog kev koom siab, koom tib tug Tswv thiab koom tau ua ke, qhia tawm kev sib hlub sib tshua, ib leeg faib pub rau ib leeg. Thaum tsis totaub meej yus lub luag haujlwm hauv Vajtswv tsevneeg, hauv Pawg Ntseeg ces yoojyim sib tawmtsam, sib faib ua pab ua pawg. Cia li nco ntsoov, peb txhua tus yog ib feem nyob hauv Yexus Khetos lub cev, yog ib feem nyob hauv Vajtswv tsevneeg, cheemtsum tuav rawv txojkev sib raug zoo, coglus txhim kho thiab tiv thaiv Vajtswv tsevneeg los ntawm qhov peb koom nrog Yexus Khetos ib txojsia.
Koj puas tseem tabtom koom tes txhim kho Vajtswv tsevneeg thiab?
Thov Vajtswv,
Vajtswv, nyuam yaus ua Koj tsaug uas Koj pub nyuam yaus tau los ua ib haivneeg nyob hauv “Vajtswv tsevneeg”. Thov Koj pab nyuam yaus paub meej lub luag haujlwm tus Tswv muab rau nyuam yaus ua hauv Pawg Ntseeg, kom nyuam yaus coglus pab, koom tes txhim kho Koj lub tsev kom loj hlob. Amees.
Nyeem Vajluskub hauv peb lub xyoo: Phau Ntawv Nkauj 50
Tshooj Youtube BHKTHN: https://www.youtube.com/c/bhkthn
