Klei Aê Diê Blŭ: Êphêsô 2:19-22
Êlan kliăng: “Snăn diih amâo lŏ jing phung tue leh anăn phung ti êngao ôh, ƀiădah diih jing phung ƀuôn sang mbĭt hŏng phung doh jăk, leh anăn jing găp djuê Aê Diê” (Êphêsô 2:19).
Klei êmuh ksiêm mĭn: Si klei khua ƀĭng kna Y‑Pôl klah čŭn kơ klei bi mguôp hdơ̆ng phung đăo? Ya rup ñu yua čiăng bi êdah kơ klei bi mguôp anăn? Ya klei rup anăn čiăng lač? Ya kdrêč drei mguôp mbĭt kơ sang găp djuê Aê Diê?
Leh mblang kơ klei bi mguôp jing sa ti krah phung ƀuôn sang Israel leh anăn phung ƀuôn sang tue kyua hŏng êrah Khua Yang Yêsu, khua ƀĭng kna Y‑Pôl klah čŭn snei, phung ƀuôn sang tue amâo lŏ jing phung ti êngao ôh ƀiădah klă sĭt jing phung găp djuê Aê Diê (êlan 19). Khua Yang Yêsu Pô yơh bi mdlưh rai leh mnư̆ bi kgăn, čiăng bi mguôp jih jang phung đăo kơ Khua Yang jing sa leh anăn dôk hlăm găp djuê prŏng Ñu, amâo lŏ bi kah ôh phung Israel amâodah phung tue.
Khua ƀĭng kna Y‑Pôl yua rup “sa boh sang” čiăng hưn mdah klei bi mguôp hdơ̆ng phung đăo. Grăp Phung Sang Aê Diê jing sa kdrêč hlăm “sa boh sang” prŏng, leh anăn grăp čô phung đăo jing sa klŏ boh tâo hlăm sang, bi Khua Yang Yêsu Pô jing Boh Tâo Phŭn ti kiêng sang čiăng bi đuôm jih jang mtih mbĭt leh anăn krơ̆ng sang dưi dôk kjăp mră (êlan 20-21). Sang anăn yơh jing anôk kơ Aê Diê hlăm Yang Mngăt Jăk dôk. Jih jang phung anak ƀuôn sang Aê Diê jing “mnuih hlăm sang Aê Diê” sơăi leh anăn “dưi mâo kdrêč bi mguôp mdơ̆ng sang anăn” (êlan 22). Anei jing sa klei sĭt nik yuôm bhăn brei grăp čô phung đăo thâo săng klă čiăng đru krơ̆ng mbĭt bi kjăp sang găp djuê Aê Diê.
Hlăm dŭm klei čih hdruôm hră “Hdĭp Djŏ tui Si Klei Kñăm” mơ̆ng khua pô mtô Rick Warren, ñu ăt hưn mdah mơh kơ klei bi mguôp hlăm găp djuê Aê Diê. Ñu čih klei kñăm tal dua kơ klei hdĭp phung đăo jing “hrih mjing pioh kơ găp djuê Aê Diê”. Kyuanăn, grăp čô drei brei mguôp mbĭt kdrêč đru mdơ̆ng sang găp djuê Aê Diê, hriăm hdră êlan dôk hdĭp hdơ̆ng pô, bi mđĭ klei hdĭp phung đăo leh anăn djă pioh klei bi mguôp hlăm Phung Sang Aê Diê.
Klei bi mguôp hlăm găp djuê Aê Diê brei grăp čô phung đăo mđing hriăm msĕ si klei bi mjuăt klei hdĭp mngăt kyuadah klei anăn đru Phung Sang Aê Diê đĭ hriê kơ prŏng. “Klei bi mguôp” mâo djŏ knŏng jing klei dôk gŭ huă ƀơ̆ng mbĭt, yăl dliê ƀiădah ñu mâo klei kñăm čiăng prŏng êlam hĭn, tui si ai tiê klei mĭn phung đăo ênuk Phung Sang Aê Diê tal êlâo hĭn (Bruă Phung Khua Ƀĭng Kna 2:42-47). Anăn jing klei bi mguôp jing sa, bi mguôp hŏng Khua Yang leh anăn hdơ̆ng pô, bi êdah klei uêñ mĭn, thâo bi kah mbha hdơ̆ng pô. Tơdah amâo thâo săng djŏ kơ anôk bruă pô hlăm găp djuê Aê Diê, Phung Sang Aê Diê ênưih mâo klei bi mneh msao, bi kah phung. Brei hdơr snei, grăp čô drei jing sa kdrêč hlăm asei mlei Yang Krist, jing sa čô hlăm găp djuê Aê Diê, brei djă pioh klei bi mguôp, ƀuăn rơ̆ng rŭ mdơ̆ng leh anăn răng kriê găp djuê Aê Diê hlăm klei bi mguôp hŏng Khua Yang Yêsu Pô Bi Mtlaih.
Si ngă drei dôk mâo kdrêč đru rŭ mdơ̆ng găp djuê Aê Diê mơ̆?
Wah lač: Ơ Khua Yang, bi mni lač jăk kơ Ih brei leh kâo dưi jing “mnuih hlăm găp djuê Aê Diê”. Akâo Khua Yang đru kâo thâo kral anôk bruă Ih mdưm kâo hlăm găp djuê Phung Sang Aê Diê čiăng kơ kâo ƀuăn rơ̆ng mâo kdrêč mguôp mbĭt rŭ mdơ̆ng bi mđĭ kyar Sang Aê Diê.
Dlăng Klei Aê Diê Blŭ hlăm tlâo thŭn: Klei Mmuñ Hđăp 50:1-23
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm
Tơdah mâo klei blŭ mguôp, akâo kơ diih mơĭt hră hlăm gmail: radioelansitnik@gmail.com
Kênh Youtube BHKTHN:
