I Timautes 2:4-6
4 Vajtswv xav kom tej neeg sawvdaws nyias dim nyias lub txim thiab xav kom lawv paub qhov tseeb. 5 Rau qhov yeej muaj tib tug Vajtswv xwb, thiab muaj tib tug nyob nruab nrab ua kom neeg thiab Vajtswv sib cuag tau. Tus ntawd yog Yexus Khetos tus uas los yug ua neeg. 6 Nws muab nws txojsia los theej sawvdaws lub txhoj; nws ua li ntawd yog nws qhia rau sawvdaws paub hais tias twb txog lub sijhawm uas Vajtswv teem cia lawm hais tias Vajtswv yuav pab kom neeg dim neeg lub txim.
Nqe cim:
“Vajtswv xav kom tej neeg sawvdaws nyias dim nyias lub txim thiab xav kom lawv paub qhov tseeb” (I Timautes 2:4).
Lus nug rau sawvdaws xav:
- Vajtswv nplooj siab xav yam dabtsi?
- Vajtswv tau ua dabtsi kom tiav Nws txojkev xav ntawd?
- Dhau qhov no, peb totaub licas txog Vajtswv nplooj siab?
- Peb yuavtsum muaj nplooj siab licas rau Vajtswv?
Muaj ib npoj neeg ua haujlwm pab cawm hauv ib lub chaw tsomfaj nram ntug hiavtxwv tau nto koob nto npe thaum lawv pab cawm tau ntau lub nkoj tog tej neeg ntawd dim. Vim qhov nto npe li ntawd thiaj muaj neeg coob tuaj ncig xyuas lub chaw tsomfaj ntawd. Ib ntus tomqab, pab neeg ntawd tsuas txhawj ua haujlwm pub rau cov qhua uas tuaj ncig xyuas kom lawv tau nyiaj thiab nto koob nto npe xwb, thaum kawg lawv ua tsis tau tes haujlwm pab cawm lawm. Muaj ib hnub, muaj ib lub nkoj raug tog hauv hiav ces pab ntawd twb tsis muaj txaus peevxwn thiab cuabyeej los pab cawm cov neeg raug nkoj tog lawm. Dhau zaj xwmtxheej ntawd, cov pab cawm thiaj tu siab heev thiab rov tig los xav: Cov pab cawm tau tsim tsa los ua dabtsi? Tsim tsa los cawm neeg lossis los ua kom tau nto koob nto npe?
Zoo ib yam li cov neeg pab cawm no, peb puas rov tig los nug tus kheej hais tias: Peb tau cawmdim los ua dabtsi? Yog los cawm neeg lossis yog los mus pehawm Vajtswv hnub Asthiv xwb? Tej zaum tej lus nug no yeej tshwm hauv Paulus kev xav thaum nws sau ntawv rau xibhwb Timautes uas tabtom ua Vajtswv haujlwm nyob hauv nroog Efexus, yog li ntawd Paulus thiaj hais meej txog yam uas Vajtswv xav yog “tej neeg sawvdaws nyias dim nyias lub txim thiab xav kom lawv paub qhov tseeb.” (nqi 4) thiab lawv yuavtsum thov Vajtswv pab kom ua tiav Vajtswv txojkev xav no. Vajtswv hlub tibneeg ntiajteb, Nws paub kev cawmdim yog yam tseemceeb thiab cheemtsum tshaj rau tibneeg. Vim tsis paub qhov tseeb, tsis cia siab rau Vajtswv ces tibneeg yeej tseem nyob hauv kev tsaus ntuj, kev txhaum, thiab kev txiavtxim mus ibtxhis.
Tsis yog li ntawd xwb, thaum los ua lub luag haujlwm cawmdim, Tswv Yexus tau “muab nws txojsia los theej sawvdaws lub txhoj” (nqi 6). Vim licas Tswv Yexus yuavtsum tuag? Vim yuavtsum muaj ib tug Nyob Nruab Nrab “ua kom neeg thiab Vajtswv sib cuag tau. Tus ntawd yog Yexus Khetos tus uas los yug ua neeg.” (nqi 5). Tibneeg muaj kev txhaum yuav sawv tsis taus tabmeeg Vajtswv, ntawd yog qhov keebtiv uas yuavtsum muaj ib tug Nyob Nruab Nrab, ib tug uas tuag theej tibneeg tej kev txhaum thiab coj cov neeg uas ntseeg Nws los sib raug zoo nrog Vajtswv.
Qhov ntawd yog Vajtswv nplooj siab, yog yam uas Vajtswv xav thiab ua pub rau tibneeg uas yuav raug puastsuaj. Peb twb yog cov uas tau txais kev cawmdim dhau los ntawm Tswv Yexus kev tuag thiab kev sawv rov los lawm, yuavtsum koom ib nplooj siab nrog Nws. Peb yuavtsum paub hais tias Vajtswv cawm peb kom xwv peb dhau los mus ua cov uas pab lwm tus paub txog qhov tseeb thiab tau txais kev cawm dim.
Peb puas zeem paub Vajtswv Nplooj Siab lawm? Koj siv dabtsi los ua tiav yam uas Vajtswv xav?
Thov Vajtswv:
Vajtswv, nyuamyaus ua Koj tsaug rau Koj nploojsiab pub rau nyuam yaus thiab Koj tau cia Koj tib leeg tub los tuag theej nyuam yaus kom xwv nyuamyaus tau txais kev cawmdim. Thov Koj pab nyuamyaus paub hlub cov tsis tau ntseeg uas nyob ibncig nyuamyaus, thiab thov Koj siv nyuamyaus lubneej los ua tiav raws li Koj lub siabnyiam. Ameeg.
Kênh Youtube BHKTHN:
