Klei Aê Diê Blŭ: I Y‑Timôthê 2:4-6
Êlan kliăng: “Ñu čiăng kơ jih jang mnuih srăng tlaih leh anăn truh kơ klei thâo săng klei sĭt nik” (I Y‑Timôthê 2:4).
Klei êmuh ksiêm mĭn: Ya klei Aê Diê čiăng? Ya bruă Ñu ngă leh pioh bi sĭt klei čiăng anei? Hŏng klei anei, si drei thâo săng kơ ai tiê Aê Diê? Si knhuah brei diih bi mâo hĕ hŏng Ñu?
Mâo sa êpul ngă bruă đru dŏng ti sa anôk ƀrŏng pui mtrang êlan kơ êa ksĭ mâo klei hing kyua lu blư̆ dưi bi mtlaih čhŏng mran kŭmpăn kram kngăm hlăm êa ksĭ. Kyuanăn mâo lu mnuih hriê čuă dlăng anôk ƀrŏng pui mtrang anei. Leh sui hruê mprăp hmiêt nanao kơ bruă kăp drông tue hriê cuă čhưn diñu mâo klei hing hĭn êjai, êpul diñu ƀrư̆ dơ̆ng phưi tha bruă diñu đru dŏng mtlaih mnuih. Tơl sa hruê mâo sa boh mran dôk kram hlăm êa ksĭ snăn êpul đru dŏng amâo lŏ djăp klei thâo knhâo leh anăn mnơ̆ng yua čiăng dưi bi mtlaih mnuih hlăm mran anăn ôh. Leh klei truh anăn, êpul đru dŏng ruă ênguôt ai tiê lŏ ksiêm dlăng wĭt kơ mta čuăn: Klei mkŏ mjing êpul đru dŏng ya bruă pioh ngă? Kăp bi mtlaih mnuih amâodah pioh kơ klei hing ang?
Msĕ si êpul đru dŏng anăn, drei tuôm mơ̆ mdei êjai bruă klei đăo leh anăn dôk ti anăp klei êmuh: Drei mâo klei bi mtlaih ya pioh ngă? Ya klei Aê Diê čiăng kơ drei ngă? Pioh čiăng bi mtlaih mnuih amâodah knŏng pioh nao bi kƀĭn ti Sang Aê Diê grăp Hruê Kjuh? Năng ai dŭm klei êmuh anei ăt truh msĕ mơh hlăm klei mĭn khua ƀĭng kna Y‑Pôl hlăk ñu čih hră mơĭt kơ khua pô mtô Y‑Timôthê êjai dôk mă bruă kơ Aê Diê ti ƀuôn Êphêsô, kyuanăn tinei khua ƀĭng kna kñăm ktang kơ mta klei Aê Diê čiăng snei “čiăng kơ jih jang mnuih srăng tlaih leh anăn truh kơ klei thâo săng klei sĭt nik” (êlan 4) leh anăn brei diñu wah lač čiăng dưi ngă klei Aê Diê čiăng anei. Aê Diê khăp kơ lăn ala, Ñu thâo klei bi mtlaih jing yuôm hĭn leh anăn jing klei čiăng hĭn kơ anak mnuih. Kyua tơdah amâo thâo săng klei sĭt nik, amâo dưm klei đăo kơ Aê Diê, snăn anak mnuih adôk nanao hlăm klei mmăt, klei soh, leh anăn klei bi kmhal lă lar.
Amâo djŏ dŭm anăn ôh, čiăng dưi ngă hdră klei bi mtlaih, Khua Yang Yêsu “jao leh Ñu pô jing ênoh bi tui kơ jih jang mnuih” (êlan 6). Ya ngă Khua Yang Yêsu săn asei mlei? Kyuadah mâo knŏng hjăn sa čô Pô Ti Krah “Kyuadah mâo knŏng sa čô Aê Diê leh anăn knŏng sa čô Pô ti krah Aê Diê hŏng mnuih, jing Krist Yêsu, mnuih” (êlan 5). Anak mnuih soh jhat amâo dưi ôh dôk dơ̆ng ti anăp Aê Diê doh jăk, anăn yơh jing phŭn knhal čiăng mâo sa Pô Ti Krah, sa Pô djiê hrô brei kơ klei soh mnuih leh anăn ba phung dưm klei đăo kơ Ñu lŏ dưi bi grăng hŏng Aê Diê.
Anei yơh jing ai tiê Aê Diê, jing klei Ñu hmăng hmưi leh anăn čiăng ngă kơ phung mnuih soh rai luč. Drei, jing phung mă tŭ klei bi mtlaih hŏng klei Khua Yang Yêsu djiê leh anăn kbiă lŏ hdĭp, brei drei mâo sa ai tiê msĕ hŏng Ñu. Brei drei thâo săng klei Aê Diê bi mtlaih leh drei čiăng kơ drei jing mnuih đru phung mkăn thâo săng klei sĭt nik leh anăn dưi mâo klei bi mtlaih.
Si ngă drei thâo săng mơ̆ ai tiê Aê Diê? Hŏng si hdră diih ngă klei Ñu čiăng?
Wah lač: Ơ Khua Yang, bi mni kơ Ih kyua ai tiê Ih pioh kơ kâo leh anăn brei leh Anak Ih mâo knŏng sa čô čiăng kơ kâo dưi mă tŭ klei bi mtlaih. Akâo kơ Ih brei kâo thâo khăp kơ mngăt mnuih dôk rai luč jŭm dar kâo, leh anăn akâo kơ Ih yua klei hdĭp kâo ngă bi leh klei Ih čiăng.
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đaŏ Sang Aê Diê kluôm
Tơdah mâo klei blŭ mguôp, akâo kơ diih mơĭt hră hlăm gmail: radioelansitnik@gmail.com
Dlăng Klei Aê Diê Blŭ hlăm tlâo thŭn: II Bruă Mtao 1
Kênh Youtube BHKTHN:
