Khiavdim 40:34-38
Nqe cim:
“Ces pos huab tsaus nti laum nkaus tus TSWV lub Tsevntaub sib ntsib thiab tus TSWV lub tshwjchim ci ntsa iab hauv lub tsev” (Khiavdim 40:34).
Lus nug rau sawvdaws xav:
– Yam dabtsi tshwm tuaj thaum Mauxes tsa tau lub Tsevntaub?
– Qhov xwmtxheej no muaj lub ntsiab li cas rau cov Yixalayees?
– Zaj kawm no qhia rau koj zeem paub Vajtswv yog tus zoo li cas?
– Koj txiav txim siab yuav hais rau Vajtswv txog yam dabtsi?
Thaum uas Mauxes qhia sawvdaws tsa tau lub Tsevntaub, pos huab tsaus nti laum nkaus lub Tsevntaub thiab tus Tswv lub tshwjchim ci ntsa iab hauv lub Tsevntaub tuaj (nqe 34-35). Cov Yixalayees zoo siab heev vim lawv saib pom Vajtswv lub tshwjchim los nyob nruab nrab hauv lawv. Sawvdaws zoo siab vim tsi nkim qhov uas lawv koom siab tsa tau lub Tsevntaub thiab tau Vajtswv zoo siab txais yuav. Tseem zoo siab tshaj qhov ntawd yog cov Yixalayees sib txuas tau nrog Vajtswv thiab Vajtswv yuav tsis tso lawv tseg, thiab thaum yuam kev ua txhaum tau kev rov los lees txim rau Vajtswv hauv lub Tsevntaub ntawd. Vajtswv lub Tsevntaub yog haiv neeg Yixalayees lub chaw cia siab, chaw nkaum uas tso siab plhuav.
Dhau ntawd, ua rau Vajtswv haivneeg paub tseeb hais tias, tus Vajtswv uas lawv tabtom pehawm yog tus Vajtswv uas muaj hwjchim loj, tau tso lawv dim nram tebchaws Iziv los. Txij hnub uas Vajtswv ua tus nplaim hluavtaws coj lawv kev thaum hmo ntuj thiab ua tauv huab roos lawv thaum nruab hnub lawv paub Vajtswv yog tus tsomkwm coj lawv ua ntu zus los lawm (Khiavdim 13:21-22). Zaum no tus nplaim hluavtaws thiab tauv huab tabtom los nyob rau ntawm lub Tsevntaub, ua rau lawv saib ntsoov (nqe 38). Lawv tau pom Vajtswv lub fwjchim xyeem tshwm tseeb thiab meej kawg li! Vajtswv nrog lawv nyob thiab yuav coj lawv kev mus, yog thaum twg pom tauv huab saum lub Tsevntaub sawv, lawv sawv kev mus tamsim. Vajtswv haivneeg yeej npaj txhij rau lub sijhawm mus raws li Vajtswv coj kev (nqe 37). Vajtswv yog tus pab lawv tawmtsam yeebncuab thiab coj lawv kev kom mus txog rau lub tebchaws av rog thiab zoo qoobloo uas Nws tau coglus rau lawv cov yawg koob lawm.
Vajtswv tus uas peb tabtom pehawm yog tus muaj koobmeej, muaj fwjchim loj kawg nkaus, Nws xyeem txhua qhov thiab nrog peb nyob txhua qhov. Nws hlub txhua tus tibneeg uas tsi muaj zog li peb. Vajtswv saib xyuas peb thiab pub txhua yam uas peb cheemtsum rau peb. Hauv txoj kev sib txuas nrog Vajtswv ntawm pehawm Nws, peb pom Vajtswv tabtom nyob hauv peb lub neej, peb hnov Nws hais lus rau peb thaum uas peb mus pehawm Nws. Vajtswv coj peb txoj haukev dhau los ntawm Nws Txojlus, thiab Nws ua ntau yam pab peb hauv kev ua neej. Nws paub txhua yam uas peb cheemtsum, paub peb nyuaj siab, quaj ntsuag thiab Nws yeej npaj txhij yuav pab peb txhua lub sijhawm. Vaj Ntsujplig ntuas peb thaum uas peb yuav yuam kev thiab Nws yuav nplawm peb thaum peb ua txhaum kom txawj tig rov los cuag Vajtswv. Vajtswv yog tus hlub kuv thiab hlub koj, hlub peb sawvdaws kawg nkaus, vim Nws yog kev hlub (I Yauhas 4:8). Peb txhua tus yuav xav li cas rau Vajtswv?
Thov Vajtswv
Vajtswv tus muaj kev hlub, nyuam yaus zoo siab heev uas tau ua Koj menyuam. Nyuam yaus muaj Koj ces muaj tagnrho txhua yam, tsis hais kev noj haus, kev tso siab thiab kev cia siab. Thov ua Vajtswv tsaug uas Koj los nyob hauv nyuam yaus lub neej. Thov cia nyuam yaus ua lub neej txhawb nqa Koj Lub Npe thiab ua raws Koj ua tus coj. Amees.
Koj puas hais tau rau Vajtswv hais tias, Vajtswv kuv hlub koj?
Nyeem Vajluskub hauv peb lub xyoos: Tes Haujlwm 7:54-8:25
Kênh Youtube BHKTHN:
