Klei Aê Diê Blŭ: Klei Kbiă 40:34-38
Êlan kliăng: “Leh klei anăn knam guôm sang čhiăm klei bi kƀĭn, leh anăn klei guh kơang Yêhôwa bi bŏ sang čhiăm.” (Klei Kbiă 40:34)
Klei êmuh ksiêm mĭn: Ya klei mâo hlăk êjai Y‑Môis mdơ̆ng leh Sang čhiăm klei bi kƀĭn? Ya klei yuôm bhăn mơ̆ng klei anei hŏng phung ƀuôn sang Israel? Klei hriăm anei đru diih thâo kral si Pô Aê Diê jing? Ya klei ih bi mklă wah lač hŏng Khua Yang ?
Leh Y‑Môis mdơ̆ng Sang čhiăm klei bi kƀĭn, mâo knam guôm sang čhiăm klei bi kbĭn, leh anăn klei guh kơang Yêhôwa Aê Diê bi bŏ sang čhiăm (êlan 34-35).
Phung ƀuôn sang Israel hơ̆k mơak kyua ƀuh klei guh kơang Aê Diê ti krah diñu. Diñu mơak kyua hdră bruă diñu sa ai tiê rŭ mdơ̆ng hlăm wưng êgao bi mơak kơ Aê Diê. Diñu mơak hĭn kyua klei bi mguôp diñu hŏng Aê Diê amâo bi mlih ôh leh dŭm blư̆ diñu ngă soh bi kdơ̆ng hŏng Aê Diê leh anăn hŏng jih ai tiê kmhal klei soh. Sang čhiăm klei bi kƀĭn Aê Diê srăng jing anôk đuĕ dăp êđăp ênang kơ diñu.
Sa blư̆ dơ̆ng, mnuih ƀuôn sang Aê Diê bi mklă Aê Diê diñu dôk kkuh mpŭ jing Pô mâo klei myang bi mtlaih leh diñu mơ̆ng Êjip. Mơ̆ng hruê tal êlâo, gơ̆ng knam leh anăn gơ̆ng pui bi kmlah atăt gai phung ƀuôn sang, gơ̆ng knam bi kơup êyui kơ diñu êjai yang hruê leh anăn gơ̆ng knam bi mđao kơ diñu hlăk mlam truh (Klei Kbiă 13:21-22). Diñu tuôm ƀuh leh knam leh anăn pui anăn ti dlông čư̆ Sinai grăp blư̆ Y‑Môis đĭ ti čư̆ bi tuôm hŏng Aê Diê. Knam leh anăn pui ară anei dôk hlăm Sang čhiăm klei bi kƀĭn ti anăp diñu (êlan 38), Aê Diê bi êdah klă mngač snăk! Hlăm hdră êdei anăn, tơdah knam guôm Sang čhiăm klei bi kƀĭn diñu lŏ nao. Phung ƀuôn sang Aê Diê nao čiăng tui hlue klei Aê Diê atăt gai (êlan 37). Ñu srăng bi blah kơ digơ̆, atăt digơ̆ hlăm krĭng lăn bŏ hŏng êa ksâo leh anăn êa hnuê msĕ si klei Ñu ƀuăn leh hŏng aê digơ̆.
Aê Diê drei dôk kkuh mpŭ jing Aê Diê prŏng hĭn, myang hĭn, Ñu dôk ti dŭm tal adiê ƀiădah Ñu ăt jing Emanuel, Aê Diê dôk mbĭt hŏng drei. Aê Diê khăp kơ phung đơđiêt, amâo kluôm ênŭm msĕ si drei. Ñu mđing kơ klei čiăng điêt dhiêt mơ̆ng phung ƀuôn sang Ñu leh anăn brei djŏ mmông. Hlăm klei bi mguôp hŏng Aê Diê, drei thâo Aê Diê bi êdah hlăm klei hdĭp pô. Drei srăng hmư̆ klei Aê Diê blŭ êdu êun tơdah drei wah lač hŏng Ñu. Aê Diê ktrâo atăt phung drei mơ̆ng Klei Aê Diê Blŭ. Êngao anăn, Aê Diê ăt bi êdah Ñu pô kơ drei hŏng lu hdră mdê mdê. Ñu thâo djăp klei ênguôt hnĭng drei dôk găn leh anăn Ñu srăng đru drei. Yang Mngăt Jăk srăng hưn brei răng tơdah drei nao giăm êlan soh čhuai leh anăn Ñu ăt srăng ƀuah mkra tơdah drei ngă soh hŏng Ñu. Aê Diê khăp kơ diih leh anăn kơ kâo lu kyua Ñu jing klei khăp (I Y‑Yôhan 4:8). Bi drei si ngă?
Drei thâo mơ̆ klei Aê Diê khăp kơ pô, leh anăn diih lač mơ̆ hŏng Aê Diê drei khăp kơ Ñu?
Wah lač: Ơ Khua Yang khăp hơiêng! Jăk mơak snăk kyua kâo dưi jing anak Ih! Mâo Khua Yang, mâo jih jang: klei trei mđao, klei êđăp ênang leh anăn klei čang hmăng. Bi mni kơ Ih lu snăk, Emanuel! Ƀuăn jih klei hdĭp kâo bi mni kơ leh anăn êbat hlăm klei Ih atăt gai.
Dlăng Klei Aê Diê Blŭ hlăm tlâo thŭn: Bruă Phung Khua Ƀĭng Kna 7:54-8:25
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm
Tơdah mâo klei blŭ mguôp, akâo kơ diih mơĭt hră hlăm gmail: radioelansitnik@gmail.com
Kênh Youtube BHKTHN:
