Kalatias 5:22-26
Nqe cim:
“Vaj Ntsuj Plig twb pub txojsia rau peb lawm; peb yuav tsum cia nws kav tagnrho peb lub neej.” (Kalatias 5:25)
Lus nug rau sawvdaws xav:
- Lub “txiv” uas yog qhov txiaj ntsig ntawm kev ua tus Tswv haujlwm txawv Vaj Ntsuj Plig lub “txiv” licas?
- Leejtwg thiaj yog tus muaj tej cwjpwm ntawm Vaj Ntsuj Plig lub txiv?
- Yuav ua li cas Vaj Ntsuj Plig lub txiv thiaj txi thiab loj hlob hauv peb lub neej?
Ntu Vajluskub hnub no pib ntawm lo lus “Tiamsis” vim yog muab los hais sib piv rau tej haujlwm sab nqaij tawv uas tau hais nyob feem ua ntej lawm. Lo lus “txiv” ntawm no yog ib lo lus qhia npe (danh từ), lej tsawg (số ít), qhia tau hais tias tsuas muaj ib lub Txiv Ntsujplig uas muaj cuaj yam zoo nkauj lossis cuaj yam cwjpwm uas Vaj Ntsuj Plig ua tshwmsim thiab ua loj hlob hauv tus ntseeg lubneej. Vaj Ntsuj Plig lub txiv hauv peb lub neej yeej tseem txi txawm yog peb tabtom vim ib yam dabtsi twg ua rau pw ib qhov, cheemtsum lwm tus tu saib xyuas.
Vaj Ntsuj Plig lub txiv tsis zoo li lub “txiv” lossis “txiaj ntsig” ntawm kev ua tus Tswv haujlwm thiab qhia Txoj Moozoo yog tej yam ua tshwm sab nraud. Lub txiv ntawd txi hauv cov uas yog Vajtswv tug thiab cov uas tsis yog Vajtswv tug huv tibsi, xws li hnub kawg cov cevlus cuav hais rau Vajtswv: “Tus Tswv! tus Tswv, peb twb tuav koj lub npe qhia Vajtswv Txojlus, peb tuav koj lub npe ntiab dab thiab ua ntau yam txujci tseemceeb?” Tej no yeej qhia tau tias cov neeg ntawd muaj ntau lub “txiv,” tiamsis Tswv Yexus yuav teb hais tias: “Cov neeg siab phem, cia li khiav mus, kuv tsis paub nej!” (Mathais 7:22-23).
Yog li ntawd, Vaj Ntsuj Plig lub txiv qhia rau peb paub hais tias peb yog neeg zoo li cas, tsis yog qhia paub hais tias peb ua dabtsi. Yog li, leejtwg thiaj muaj cov cwjpwm zoo ntawm Vaj Ntsuj Plig? Nqe 24 qhia paub hais tias, ntawd yog “cov uas ntseeg Yexus Khetos”, lwm phau txhais hais tias “cov uas yog Yexus Khetos li”. Ua ntej ntawd, Timthawj Paulus twb qhia tias, ntawd yog cov uas tau Vaj Ntsuj Plig cawmdim THIAB ua lub neej raws li Vaj Ntsuj Plig coj (Kalatias 5:16).
Timthawj Paulus hais txog tej yam tshwjxeeb ntawm Vaj Ntsuj Plig lub txiv yog “tsis muaj ib txoj kevcai yuav txwv tej no hlo li” (nqe 23), tomqab ntawd nws nqua hu hais tias: “Cov uas ntseeg Yexus Khetos, lawv twb muab tej kev phem uas lawv lub siab nyiam ua huv tibsi los ntsia rau saum tus ntoo khaublig lawm. Vaj Ntsuj Plig twb pub txojsia rau peb lawm; peb yuav tsum cia nws kav tagnrho peb lub neej” (nqe 24-25). Thaum peb ntseeg Tswv Yexus, peb lub cev nqaij tawv thiab tej haujlwm nqaij tawv twb raug ntsia saum tus ntoo khaublig lawm, muaj Vaj Ntsuj Plig txojsia puv npo hauv peb lub siab. Yog li ntawd, peb yuav tsum cia Vaj Ntsuj Plig kav tagnrho peb lub neej, kom Nws tej cwjpwm zoo tshwmsim thiab loj hlob hauv peb lub neej.
Muaj coob leej nco tau nqe Vajluskub Kalatias 5:22, tiamsis qhov tseemceeb tsis yog nco tau xwb, tiamsis yog yuav tsum ua neej raws li Vaj Ntsuj Plig coj thiab cia Vaj Ntsuj Plig kav. Txawm yog peb yuav nyob hauv lub tsamthawj twg, nyob zoo lossis raug mob, ua haujlwm loj lossis haujlwm me, los thov Vajtswv pab kom peb nco ntsoov tias peb tus neeg qub twb raug ntsia nrog Tswv Yexus lawm, yuav tsum cia Vaj Ntsuj Plig ua tus coj peb taug kev mus ntxiv kom coob leej pom Vajtswv dhau ntawm peb lub neej.
Thov Vajtswv,
Vaj Ntsuj Plig, thov pab nyuam yaus paub muab tus neeg qub ntsia nrog Yexus Khetos saum tus ntoo khaublig txhua hnub. Thov pub nyuam yaus tau Vaj Ntsuj Plig lub zog kom Vaj Ntsuj Plig lub txiv loj hlob ntxiv hauv nyuam yaus lub neej. Nyuam yaus tuav Yexus Khetos lub npe thov, Amees.
Peb lub neej puas qhia tshwm tej cwjpwm zoo ntawm Vaj Ntsuj Plig lub txiv? Vim licas?
Nyeem Vajluskub hauv peb lub xyoos: I Xwmtxheej Vajntxwv 10
Kênh Youtube BHKTHN:
