Klei Aê Diê Blŭ: Galati 5:22-26
Êlan kliăng: “Tơdah drei dôk hdĭp kyua Yang Mngăt Jăk, brei drei dôk dơ̆ng ƀơ̆ng huă tui si Yang Mngăt Jăk mơh” (Galati 5:25)
Klei êmuh ksiêm mĭn: Si “boh” jing boh tŭ hlăm klei mă bruă kơ Khua Yang mdê hŏng “Boh Mơ̆ng Yang Mngăt Jăk”. Hlei pô mâo knuih mơ̆ng Boh Mơ̆ng Yang Mngăt jăk? Si ngă čiăng kơ Boh Mơ̆ng Yang Mngăt Jăk mboh leh anăn hriê kơ prŏng hlăm klei hdĭp drei?
Trăn Klei Aê Diê Blŭ hruê anei kčưm hŏng boh hră “Ƀiădah” kyua dưi dưm mdê hŏng ya bruă ngă mơ̆ng kđeh hlăm kdrêč êlâo anăn. “Boh” tinei jing anăn pia ênoh ƀiă, knŏng mâo sa Boh Mơ̆ng Yang Mngăt Jăk mâo dua păn knuih jăk amâodah dua păn knuih jăk mơ̆ng Yang Mngăt Jăk mboh leh anăn hriê kơ prŏng hlăm klei hdĭp phung đăo kơ Khua Yang. Boh Mơ̆ng Yang Mngăt Jăk hlăm lam drei ăt dưi lŏ dơ̆ng mboh wăt tơdah drei kyua ya mta phŭn dôk hĕ sa anôk, čiăng kơ pô mkăn kriê dlăng. Mdê hŏng “boh” amâodah “boh tŭ” hlăm klei mă bruă, hiu hưn Klei Mrâo Mrang Jăk jing dŭm klei ti êngao drei. Boh anăn mboh hlăm phung jing dŏ Aê Diê leh anăn wăt hlăm phung amâo jing dŏ Aê Diê, msĕ si phung khua pô hưn êlâo soh hlăm hruê knhal tuč lač hŏng Khua Yang: “Ơ Khua Yang, Ơ Khua Yang, amâo djŏ hĕ hmei tuôm hưn êlâo leh hlăm anăn ih, suôt yang jhat hlăm anăn ih, leh anăn ngă lu bruă myang hlăm anăn ih?’ Hlăk anăn kâo srăng lač klă kơ diñu, ‘Kâo amâo tuôm thâo kral diih ôh; đuĕ bĕ mơ̆ng kâo, Ơ phung soh jhat!” (Y‑Mathiơ 7:22-23).
Snăn, Boh Mơ̆ng Yang Mngăt Jăk brei thâo drei jing si mnuih, amâo djŏ ya klei brei drei ngă ôh. Snăn hlei pô mâo knuih mơ̆ng Boh Mơ̆ng Yang Mngăt Jăk?
Êlan 24 brei thâo anăn jing “hlei pô jing dŏ Krist”. Êlâo anăn, Khua ƀĭng kna Y‑Pôl mtô anăn jing phung mâo Yang Mngăt Jăk bi mtlaih leh anăn êbat hlue si Yang Mngăt Jăk (Galati 5:16).
Khua ƀĭng kna Y‑Pôl lač klei bi êdah mơ̆ng Boh Mơ̆ng Yang Mngăt Jăk jing amâo mâo ôh ya klei bhiăn dưi ghă hĕ klei anăn (êlan 23), leh anăn ñu hưn mdah asăp iêô mthưr, kyua drei jing “dŏ Krist Yêsu pơ̆ng leh kđeh mbĭt hŏng klei ñu tluh leh anăn klei ñu čiăng ti kyâo bi kal. Tơdah drei dôk hdĭp kyua Yang Mngăt Jăk, brei drei dôk dơ̆ng ƀơ̆ng huă tui si Yang Mngăt Jăk mơh” (êlan 24-25 ). Tơdah đăo kơ Khua Yang Yêsu, kđeh leh anăn bruă ngă mơ̆ng kđeh hlăm drei pơ̆ng leh ti kyâo bi kal, klei hdĭp mrâo mơ̆ng Yang Mngăt Jăk đoh hlăm lam ai tiê, kyua anăn brei êbat hlue Yang Mngăt Jăk čiăng kơ knuih jăk siam mơ̆ng Yang Mngăt Jăk mboh leh anăn hriê kơ prŏng hlăm klei hdĭp drei.
Mâo lu snăk mnuih tuč êlan kliăng Galati 5:22 ƀiădah amâo djŏ jing tuč ôh, brei hdĭp leh anăn êbat hlue si Yang Mngăt Jăk. Wăt tơdah drei dôk hlăm ya boh klei, suaih pral amâodah ruă duam, dôk mă bruă hlăm ya mta bruă, akâo kơ Khua Yang đru drei thâo nanao drei pô pơ̆ng leh mnuih hđăp drei pô mbĭt hŏng Krist, brei knang kơ Yang Mngăt Jăk čiăng hdĭp leh anăn êbat hlue si Yang Mngăt Jăk čiăng lu mnuih ƀuh Khua Yang hlăm klei hdĭp drei.
Klei hdĭp drei bi êdah knuih jăk mơ̆ng Boh Mơ̆ng Yang Mngăt Jăk mơ̆? Ya ngă?
Wah lač: Ơ Yang Mngăt Jăk, akâo kơ Ih đru kâo pơ̆ng mnuih hđăp kâo hŏng Ih grăp hruê. Akâo kơ Ih brei kơ kâo klei ktang mơ̆ng Yang Mngăt Jăk čiăng kơ Boh Mơ̆ng Yang Mngăt Jăk ƀrư̆ hruê ƀrư̆ tŭ dưn hlăm klei hdĭp kâo. Kâo wah lač hlăm Anăn Khua Yang Yêsu Krist, Amen.
Dlăng Klei Aê Diê Blŭ hlăm tlâo thŭn: I Klei Yăl Dliê 10
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm.
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
