Henplais 1:2-3
Nqe cim:
“Vajtswv lub hwjchim ua rau tus Tub ntawd ci ntsa iab. Nws muaj hwvxyeej ib yam li Vajtswv” (Henplais 1:3a).
Lus nug rau sawvdaws xav:
- Vajtswv qhia tus kheej los ntawm Nws Leej Tub licas?
- Xya tes haujlwm uas Tswv Yexus ua yog dabtsi?
- Tej yam ntawd muaj dabtsi ntsigtxog peb?
Ntau zaug, Vajtswv tau siv ntau txoj haukev los qhia txog Nws tus kheej txij puag thaum ub los, tiamsis txojkev qhia tshwm loj dua ntais, txaus dua ntais, yog los ntawm Tswv Yexus, uas yog Nws Leej Tub. Tswv Yexus yog Vajtswv Leej Tub muaj lub ntsiab hais tias Nws muaj yamntxwv Vajtswv, zoo ib yam li Vaj Leej Txiv. Nyob hauv ob nqe Vajluskub luv luv no, tus sau phau Henplais hais txog xya tes haujlwm tshwjxeeb ntawm Vaj Leej Tub:
Tim ib, Vaj Leej Tub txais yuav ib puas tsav yam ua Nws tug, txhais tau hais tias Nws tau siv thiab tau ua tus tswjkav txhua yam. Nws yog tus thawj ntawm txhua yam thiab tuav txhua lub hwjchim saum qaum ntuj thiab hauv ntiajteb huv tibsi. Tim ob, Vaj Leej Tub tsim lub ntuj thiab lub ntiajteb. Ntawm no yog ib qhov timkhawv tseebmeej qhia pom hais tias Tswv Yexus yog Vajtswv, vim tsuas yog Vajtswv xwb thiaj tsim tau txhua yam (Yaxayas 44:24).
Tim peb, Vaj Leej Tub zoo li daim iav tsom kom pom Vajtswv tus duab ci ntsa iab. Vajluskub Qub hais txog tus Tswv lub tshwjchim ci ntsa iab thaum Nws tshwm los rau cov Yixalayees pom tom tiaj suab puam hauv tauv huab thiab tus nplaim hluavtaws, kuj ib yam li thaum Nws tshwm hauv lub Tuamtsev nroog Yeluxalees. Nimno, lub tshwjchim ci ntsa iab ntawd tau pom dhau ntawm Tswv Yexus. Tim plaub, Vaj Leej Tub yog tus duab tseeb txog Vajtswv. Txawm yog txhua tus tibneeg puavleej tsim raws li Vajtswv tus yamntxwv, los tsuas muaj Tswv Yexus tibleeg xwb thiaj muaj tus yamntxwv zoo li Vaj Leej Txiv, vim Nws yog lub chaw xyeem tim ob ntawm Vaj Peb Leeg los yug ua neeg, thiab ua neej nrog tibneeg, Nws qhia rau lawv hais tias, “Tus uas pom kuv kuj yog pom leej Txiv” (Yauhas 14:9).
Tim tsib, Vaj Leej Tub tuav rawv ib puas tsav yam. Txhais tau hais tias, Tswv Yexus tuav txhua yam nyob ruaj khov thiab ua haujlwm raws li nyias yam. Tim rau, Vaj Leej Tub theej neeg ntiajteb lub txhoj. Nyob ntawm no, peb pom txog tes haujlwm tsim txhua yam thiab tes haujlwm cawmdim tau sib sau uake txaus nkaus. Timthawj Paulus piav txog qhov no hais tias: “Vajtswv pom zoo kom Vajtswv tus Tub coj ib puas tsav yam uas nyob hauv qab ntuj no thiab nyob saum nruab ntug rov los ua Vajtswv tug. Vajtswv tso Vajtswv tus Tub los tuag saum tus ntoo khaublig, peb thiaj li tau los nrog Vajtswv sib raug zoo” (Kaulauxais 1:20). Tim xya, Vaj Leej Tub zaum ntawm Vajtswv sab xis. Sab xis yog qhov chaw muaj meejmom siab thiab muaj hwjchim. Nimno Tswv Yexus tabtom zaum saum lub zwm txwv nrog Vaj Leej Txiv tswjkav txhua yam thiab Nws thov Vaj Leej Txiv pab peb.
Tus tswv ntawm txhua yam, Tus tsim txhua yam, Tus tuav txhua yam ruaj khov, Tus cawmdim, Tus tswjkav txhua yam, Tus los yug ua neeg, ntawd yog hais txog peb tus Cawmseej Yexus ntag. Peb cov ntseeg yog cov uas tau koobhmoov zoo kawg nkaus, vim peb muaj kev sib txuas nrog Nws txhua sijhawm. Tus Tswv xwb thiaj yog tus uas tsimnyog peb pehawm, hlub thiab ua haujlwm pub rau.
Thov Vajtswv,
Peb puas tabtom qhia tshwm peb txojkev hlub Tswv Yexus nyob hauv peb lubneej txhua hnub?
Nyuam yaus thov ua Tswv Yexus tsaug, vim Nws yog Vajtswv tus muaj hwjchim ci ntsa iab tau los yug ua neeg, cawm nyuam yaus dim thiab nrog nraim nyuam yaus taug txojkev mus saum Ntuj Ceeb tsheej. Nyuam yaus yuav hlub tus Tswv heev dua txhua yam huv tibsi. Amees.
Nyeem Vajluskub hauv peb lub xyoos: Phau Ntawv Nkauj 119:89-136
Kênh Youtube BHKTHN:
