Klei Aê Diê Blŭ: Hêbrơ 1:2-3
Êlan kliăng: “Gơ̆ jing klei ktlă klei guh kơang Aê Diê, leh anăn jing rup kdrưh nik hŏng Aê Diê” (Hêbrơ 1:3a).
Klei êmuh ksiêm mĭn: Si klei Aê Diê blŭ leh kơ drei hŏng Anak Êkei Ñu? Ya kjuh mta bruă Khua Yang Yêsu ngă? Si mta klei anăn djŏ kơ drei?
Aê Diê bi êdah Ñu pô dơ̆ng mơ̆ng mphŭn dô lu blư̆, hlăm lu êlan mdê mdê, ƀiădah klei bi êdah prŏng prĭn hĭn, kluôm ênŭm hĭn jing hŏng Khua Yang Yêsu, Anak Ñu. Khua Yang Yêsu jing Anak Aê Diê mblang jing Ñu mâo mbĭt sa klei jing Aê Diê, msĕ si Aê Diê Ama. Hlăm dua êlan đŭt anei, pô čih hră Hêbrơ hưn mdah kjuh mta bruă guh kơang Aê Diê Anak ngă:
Tal sa, Aê Diê Anak jing Pô dưn jih jang mnơ̆ng. “Dưn” mblang jing mâo klei dưi mă tŭ leh anăn jing khua. Ñu jing phŭn êlâo kơ jih jang mnơ̆ng leh anăn djă jih jang klei dưi ti dlông adiê ti gŭ lăn. Tal dua, Aê Diê anak hrih jih jang mnơ̆ng. Anei jing sa hlăm lu klei hưn bi sĭt ktang tĭt brei ƀuh Khua Yang Yêsu jing Aê Diê kyuadah knŏng hjăn Aê Diê jing Pô Hrih Mjing jih jang mnơ̆ng (Y-Êsai 44:24).
Tal tlâo, Aê Diê Anak jing klei ktlă klei guh kơang Aê Diê. Klei Bi Mguôp Hđăp hưn klei guh kơang Aê Diê tơdah lač kơ klei Aê Diê dôk mbĭt hŏng phung Israel hlăm kmeh knam leh anăn kmeh pui êjai hlăm kdrăn tač wăt mâo Aê Diê dôk mbĭt hlăm Sang Yang Yêrusalem. Ară anei, klei guh kơang ti dlông anăn bi êdah hlăm Khua Yang Yêsu. Tal pă, Aê Diê Anak jing rup kdrưh nik hŏng Aê Diê. Wăt tơdah jih jang mnuih hrih mjing tui si rup Aê Diê sơăi mơh, ƀiădah knŏng hjăn Khua Yang Yêsu mâo mbĭt sa klei jing hŏng Aê Diê Ama, kyuadah Ñu yơh jing Aê Diê Pô Tal Dua hriê jing mnuih leh anăn hdĭp ti krah mnuih čiăng bi êdah kơ diñu, “Hlei pô ƀuh leh kâo, ƀuh leh Ama” (Y-Yôhan 14:9).
Tal êma, Aê Diê Anak krơ̆ng jih jang mnơ̆ng. Mblang jing, Khua Yang Yêsu krơ̆ng brei lăn adiê adôk leh anăn ngă bruă ñu. Tal năm, Aê Diê Anak bi doh klei soh. Tinei drei ƀuh bruă hrih mjing leh anăn bruă bi mtlaih bi mguôp hŏng klei kluôm ênŭm. Khua ƀĭng kna Y-Pôl mblang klei anei msĕ snei: “Leh anăn hŏng Anak êkei Ñu, Aê Diê bi grăng leh kơ Ñu pô jih jang mnơ̆ng, thâodah ti lăn ala amâodah hlăm adiê, brei klei êđăp ênang truh kyua êrah Anak êkei Ñu tuh leh ti kyâo bi kal.” (Kôlôs 1:20). Tal kjuh, Aê Diê Anak dôk gŭ tĭng hnuă kơ Aê Diê. Tĭng hnuă jing anôk yuôm hĭn leh anăn mâo jih klei dưi. Khua Yang Yêsu ară anei dôk gŭ ti jhưng mtao guh kơang dôk kiă kriê mbĭt hŏng Aê Diê Ama leh anăn wah lač brei kơ drei.
Pô jing khua, Pô hrih mjing, Pô krơ̆ng, Pô bi mtlaih, Pô kiă kriê, Aê Diê guh kơang hriê jing mnuih, jing Khua Yang Yêsu Pô bi mtlaih drei yơh. Jing klei jăk jĭn êdimi kơ phung đăo drei mâo klei bi mguôp hjăn pô hŏng Ñu. Ñu jing Pô năng kơ drei kkuh mpŭ, drei khăp leh anăn drei mă bruă.
Si drei bi êdah klei khăp kơ khua Yang Yêsu hŏng knhuah hdĭp grăp hruê?
Wah lač: Lač jăk kơ Khua Yang Yêsu kyua Ih jing Aê Diê guh kơang hriê leh ti lăn ala čiăng bi mtlaih kâo leh anăn ăt êbat mbĭt hŏng kâo nanao ktuê êlan kâo wĭt phă ƀuôn jăk. Kâo ƀuăn khăp kơ Khua Yang hĭn kơ jih jang klei.
Dlăng Klei Aê Diê Blŭ hlăm tlâo thŭn: Klei Mmuñ Hđăp 119:89-136
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm
Tơdah mâo klei blŭ mguôp, akâo kơ diih mơĭt hră hlăm gmail: radioelansitnik@gmail.com
Kênh Youtube BHKTHN:
