Khiavdim 28:30
Muab lub Ulees thiab lub Thumees ntsaws rau hauv daim ntaub npog hauvsiab, kom thaum Aloos tuaj rau hauv chav dawbhuv uas yog kuv qhov chaw nyob, nws thiaj nqa rawv ob yam ntawd. Txhua zaus nws yuav tsum hnav daim ntaub npog hauvsiab tuaj, nws thiaj yuav paub qhia rau cov Yixalayees ua tej yam uas haum kuv siab.
Lus nug rau sawvdaws xav:
- Ob lub Ulees thiab Thumees yog li cas?
- Siv ob lub Ulees thiab Thumees los ua dab tsis rau cov pejxeem?
- Daim ntaub npog hauvsiab muab ob lub Ulee thiab Thumees ntsaws rau hauv qhia txog yam dab tsi ntawm tus Tswv?
- Tus Tswv xav kom koj paub thiab ua raws yam dab tsi hauv zaj kawm no?
Tus Tswv qhia kom Mauxes yuav tsum muab ob lub Ulees thiab Thumees ntsaws rau hauv daim ntaub npog hauvsiab (nqi 30). Ob lub ntawd yog yam muab los ua nug rau tus Tswv txog ntawm kev txiav txim. Vajluskub tsis sau meej txog ob lub ntawd yog zoo li cas thiab siv li cas. Ulees muaj lub ntsiab hais tias kev kaj thiab
Thumees muaj lub ntsiab hais tias zoo txaus. Muaj ntau leej hais tias, lo lus “Ulees” hauv lus Henplais yog hauv paus lus ntawm Arrim muaj ntsiab yog “kev raug foom”, dua li “Thumees” pib ntawm ib cov suab lus muaj lub ntsiab yog “tsis txhaum”. Muab hais tau hais tias, ob lub Ulees thiab Thumees yog siv teb kev nug Vajtswv txog “ua txhaum” lossis “tsis txhaum”.
Vim ob yam no tau ntsaws hauv daim ntaub npog hauvsiab, tej zaum yuav tsum yog me thiab muaj ntsis mluav ua daim; su li lub ncuav lossis ua ib daim li ntsiav noob taub, uas muab ntoo lossis kub tsiaj ua los… Ob lub Ulees thiab Thumees zoo ib yam tiamsis zeem paub los ntawm kos muaj txwm ntawv lossis kos duab xim rau ntawd lawm. Tej zaum tus Tswv pab cov povthawj paub thaum siv lub Ulee thiab Thumees los ntawm muab ob lub ntawd rho ua qhia, ib yam li tej txiv neeb hnub thaud khov kuam lossis muab co saib khwb lossis ntxeev ua qhia. Mus saib tej ntu Vajluskub pab (nyeem Teev Npe 27:21; II Kevcai 33:8; I Xamuyees 14:41-43; Yausuas 7:10-18; Nehemis 7:65) peb paub tau tus povthawj hlob siv lub Ulees thiab Thumees los ua nug tus Tswv kom paub txiav plaub ntug yog raws li Vajtswv siab nyiam. Tiamsis kev rau txim rau cov pejxeem yog ua raws li Vajtswv tej lus uas twb qhia rau Mauxes sau tseg lawm.
Dhau los ntawm daim ntaub npog hauvsiab muaj ob lub Ulees thiab Thumees nyob hauv kom qhia peb paub txog tus Tswv yog kev hlub. Tus Tswv hlub thiab saib taus nws haiv neeg txhua tus, tsis hais tus hlob lossis tus yau. Tus Tswv yog tus ncaj ncees, yog li ntawd nws thiaj txiav txim ncaj ncees rau txhua tus. Tus Tswv paub txhua yam, yog li ntawd nws paub yam uas tab tom muaj tshwm, tej uas tibneeg xav thiab tej lus uas tibneeg yuav hais. Sawv ntawm Vajtswv xub ntiag, nws yuav txiav txim ncaj ncees, txhua tus yuav txhos caug thiab lees nyias tej kev txhaum. Tus Tswv xav kom nws haiv neeg hnub thaud thiab peb cov ntseeg nws tiam nimno kawm paub tus Tswv tej kevcai uas yog Vajtswv Txojlus, ua zoo coj raws li tus Tswv tej kevcai, ua neej sib hlub, ua ncaj rau tus Tswv, rau lwm tus thiab rau tus kheej. Tsis muaj ib yam dab tsi uas yuav zais tau tsis pub kom tus Tswv paub, yog li ntawd txhua tus yuav tsum paub ntshai ua ib ce tshee hnyo, lees nyias tej kev txhaum thiab thov tus Tswv zam txim ua ntej tus Tswv rooj txiav txim los txog rau peb txhua tus.
Koj puas paub tus Tswv yog kev hlub, yog tus ncaj ncees thiab tus paub txhua yam?
Thov Vajtswv:
Ua Vajtswv tsaug vim tus Tswv yog kev hlub, npaj roos zam txim kom nyuam yaus thiaj tau los cuag koj! Nyuam yaus kuj ua tus Tswv tsaug vim koj yog tus ncaj ncees kom nyuam yaus paub xyuam xim, ua neeg dawbhuv. Thov tus Tswv koj pab nyuam yaus ua tau lub neej zoo thooj Leejtxiv ntau heev ntxiv. Ameeg.
Email: kawmvajluskubtxhuahnub@gmail.com
Kênh Youtube BHKTHN:
