Klei Aê Diê Blŭ: Klei Kbiă 28:30
Êlan kliăng: “Brei ih dưm hlăm mnal đah da klei phat kđi Urim leh anăn Thumim; leh anăn diñu srăng dôk ti dlông tiê boh Y‑Arôn tơdah ñu mŭt ti anăp Yêhôwa. Snăn Y‑Arôn srăng djă nanao ti dlông tiê boh ñu klei phat kđi phung ƀuôn sang Israel ti anăp Yêhôwa” (Klei Kbiă 28:30)
Klei êmuh ksiêm mĭn: Ya jing Urim, Thumim? Ya bruă klam mơ̆ng Urim leh anăn Thumim hlăm bruă phat kđi phung ƀuôn sang? Ya klei thâo knuih Aê Diê kơ mnal đah da klei phat kđi Urim leh anăn Thumim? Ya klei Aê Diê čiăng drei thâo săng leh anăn hluê ngă mơ̆ng klei hriăm hruê anei?
Aê Diê mtă kơ Y‑Môis brei dưm Urim leh anăn Thumim hlăm mnal đah da (êlan 30). Dua mta mnơ̆ng anei dưi yua čiăng duah klei Aê Diê phat kđi. Klei Aê Diê Blŭ amâo lač klă ôh kơ dua mta mnơ̆ng anei si đĭng kdriêk leh anăn hlăm ya hdră ba yua. Urim jing klei mngač leh anăn Thumim jing klei kluôm ênŭm. Lu phung ksiêm hriăm lač boh blŭ “Urim” hlăm klei Hêbrơ mâo mơ̆ng phŭn agha Arrim jing “klei tăm pah”, hlăk êjai “Thumim” mâo mơ̆ng sa êpul boh blŭ kăp đru jing “amâo mâo klei soh ôh”. Lŏ pia jing, Urim leh anăn Thumim dưi yua čiăng wĭt lač klei êmuh “mâo klei soh” amâodah “amâo mâo čhŭ luă ôh”.
Kyua dua mta mnơ̆ng anei dưi pioh plah wah dua tal hlăm mnal dưm ti đah da anăn ñu điêt leh anăn ƀlia; năng ai wĭl amâodah mta dhar, dưi mkra hŏng kyâo amâodah ki… Dua mta mnơ̆ng anei msĕ kơ đĭng kdriêk ƀiădah dưi thâo kral mơ̆ng boh hră amâodah rup krah ti dlông. Năng ai Aê Diê đru kơ phung khua ngă yang prŏng ruah djŏ klei wĭt lač hlue si klei mă amâodah hlue si klei mgei mơ̆ng Urim, Thumim. Mơ̆ng dŭm trăn Klei Aê Diê Blŭ dlăng thiăm (Klei Yap 27:21; Klei Mtô Mñă Klei Bhiăn 33:8; I Y‑Samuel 14:41-43; Y‑Yôsuê 7:10-18; Y‑Nêhêmi 7:65) brei kơ phung drei thâo khua ngă yang prŏng yua Urim leh anăn Thumim êmuh Khua Yang čiăng mâo klei phat kđi djŏ ngă. Khădah snăn, lu bruă phat kđi phung ƀuôn sang hlăm klei bhiăn Aê Diê mtrŭn leh kơ phung ƀuôn sang Ñu mơ̆ng khua gĭt gai Y‑Môis.
Mơ̆ng rup dưm mnal đah da klei phat kđi mâo Urim leh anăn Thumin brei drei thâo Aê Diê jing klei khăp. Ñu khăp, mpŭ kơ phung ƀuôn sang Aê Diê ruah ăt msĕ mơh, grăp čô mnuih. Aê Diê jing Pô kpă ênô anăn Ñu phat kđĭ kpă ênuah kơ grăp čô mnuih. Aê Diê thâo djăp mta klei, Ñu ƀuh djăp klei dôk mâo hlăm bruă ngă, klei blŭ leh anăn wăt klei mĭn grăp čô mnuih. Dôk ti anăp klei phat kdi kpă ênô mơ̆ng Aê Diê, grăp kơŭt čuôn kmhal klei soh pô. Aê Diê čang hmăng phung ƀuôn sang Aê Diê ruah đưm dih ăt msĕ si Phung đaŏ kơ Krist hruê anei hriăm klei bhiăn Aê Diê jing Klei Aê Diê Blŭ leh anăn thâo răng klei bhiăn Aê Diê, hdĭp hŏng klei khăp, sĭt suôr hŏng Aê Diê, hŏng grăp čô mnuih leh anăn wăt hŏng pô. Amâo mâo ôh ya klei hgăm dưi mdăp ti anăp Aê Diê, kyua anăn grăp čô mnuih brei thâo huĭ mpŭ, čuôn kơŭt kmhal klei soh pô leh anăn akâo klei Ñu pap brei êlâo kơ klei phat kđi Aê Diê truh kơ grăp čô drei.
Drei thâo mơ̆ Aê Diê jing klei khăp, kpă ênô leh anăn kluôm ênŭm?
Wah lač: Kâo bi mni lač jăk kơ Aê Diê kyua Ih jing klei khăp, pap brei čiăng kâo dưi nao giăm Ih! Kâo ăt bi mni lač jăk kơ Ih kyua Ih jing Pô kpă ênô čiăng kâo thâo răng, hdĭp doh jăk. Akâo Khua Yang đru kâo ƀrư̆ hruê ƀrư̆ jing msĕ si Ih hĭn.
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đaŏ Sang Aê Diê kluôm
Tơdah mâo klei blŭ mguôp, akâo kơ diih mơĭt hră hlăm gmail: radioelansitnik@gmail.com
Dlăng Klei Aê Diê Blŭ hlăm tlâo thŭn: I Klei Yăl Dliê 1:32 – 2:9
Kênh Youtube BHKTHN:
