Klei Aê Diê Blŭ: Y‑Luk 12:16-21
Êlan kliăng: “Kyuadah ti anôk mâo ngăn drăp yuôm ih, tinăn mơh ai tiê ih srăng dôk” (Y‑Mathiơ 6:21).
Klei êmuh ksiêm mĭn: Ya klei mnuih mdrŏng bi mĭn, hlăm klei Khua Yang Yêsu blŭ bi hriêng? Si ngă Aê Diê lač kơ ñu jing “mnuih mluk”? Si ngăn drăp ngă kơ mnuih uêñ mĭn?
Mnuih mdrŏng hlăm klei Khua Yang blŭ bi hriêng jing sa čô mnuih knhâo mă bruă, thâo tĭng yap, ñu mâo hdră mĭn čiăng lŏ mdơ̆ng lu boh hjiê prŏng hĭn, mkăm pioh dŏ dô leh anăn mdiê mboh lu (êlan 16‑18). Ñu ăt thâo mơh mâo mngăt, ƀiădah mĭndah leh mkăm pioh ngăn drăp lu snăn mngăt ñu srăng dôk mdei, hơ̆k mơak kăp dưn boh ñu hrui pioh (êlan 19). Mnuih lăn ala lač kơ ñu jing mnuih thâo mĭn, ƀiădah Khua Yang Yêsu lač kơ ñu jing “mnuih mluk”, kyuadah ñu wơr bĭt hĕ sa mta klei yuôm bhăn snăk, ti anôk mngăt ñu srăng wĭt tơdah leh găn lăn ala anei? Hlăk anăn ngăn drăp ñu mkăm pioh hlei pô srăng dưn? (êlan 20‑21). Mnuih mdrŏng anei hmăng mă bruă kăp duah hrui boh mnga leh anăn mkăm pioh ti lăn ala anei ƀiădah wơr bĭt hĕ klei mkăm pioh kơ ênuk hlŏng lar. Ñu wơr bĭt răng kriê kơ mngăt ñu kyua mĭndah leh mă bruă suăi, pioh mkăm ngăn drăp êbeh dlai snăn ñu srăng hơ̆k mơak, ƀiădah amâo thâo ôh mngăt leh anăn klei hdĭp ñu jing dŏ hlei pô !
Pô čih hră Khua Pô Mtô lač leh: “Kâo bi êmut kơ jih klei suăi kâo ngă leh ti gŭ yang hruê, kyuadah kâo srăng lui dŏ anăn kơ pô srăng čuê kâo êdei” (Khua Pô Mtô 2:18). Tơdah knŏng uêñ mĭn mă bruă leh anăn mkăm pioh ngăn drăp kơ lăn ala anei ƀiădah wơr bĭt hĕ uêñ mĭn kơ mngăt snăn ya yuôm? Khua Yang Yêsu klah čŭn: Tơdah hlei pô knŏng uêñ mĭn mkăm pioh ngăn drăp kơ ñu pô leh anăn amâo jing mdrŏng hlăm Aê Diê ôh snăn ăt jing msĕ si mnuih mdrŏng anăn mơh. Tơdah ñu djiê, ngăn drăp ñu lui kơ pô mkăn, bi mngăt ñu jing rai luč.
Hlăm dŭm klei mtô ti čư̆, Khua Yang Yêsu mtô leh brei mkăm pioh ngăn drăp hlăm adiê jing sa anôk hơĭt ênang hĭn kơ jih jang, amâo huĭ luč, rai hrŏ, leh anăn Ñu ăt brei thâo: “Kyuadah ti anôk mâo ngăn drăp yuôm ih, tinăn mơh ai tiê ih srăng dôk” (Y‑Mathiơ 6:21). Tơdah knŏng hmăng kơ mkăm pioh ngăn drăp, drei knŏng mđing ai tiê klei mĭn tinăn yơh, amâo lŏ mâo anôk pioh kơ Khua Yang ôh. Tơdah drei gun kpăk đei kyua klei hdĭp ti lăn ala anei drei amâo lŏ adôk hruê mmông mđing mĭn kơ klei hdĭp mngăt ôh. Knŏng tơdah drei dưm ai tiê kơ ênuk hlŏng lar, snăn kơh drei dưi pioh hruê mmông mkăm pioh kơ mngăt lu hĭn.
Mnuih ƀuôn sang hruê anei bi mđĭ myuôm hlei pô mâo lu dŏ dô. Hrô kơ klei bi mđĭ ai knhuah hdĭp êkoh ênang, săn asei yua mnơ̆ng mnuă dŏ dô mâo kăp đru dŏng leh anăn mă bruă đru arăng, anak mnuih ară anei bi đoh ktŭng čiăng mâo djăp mta mnơ̆ng mnuă, mă bruă suăi êmăn tơl jih ai tiê leh anăn ăt lŏ gĭr ktưn hĭn êjai čiăng mkăm pioh lu êbeh. Bi mklăk hŏng klei anăn, Klei Aê Diê Blŭ bi mđĭ ai phung anak ƀuôn sang Ñu brei mđing uêñ tui duah Khua Yang êlâo hĭn leh anăn mkăm pioh kơ ênuk hlŏng lar. Đăm uêñ mĭn gun kpăk đei hŏng ngăn drăp tơl ngă kơ drei amâo lŏ dôk ai ktang leh anăn hruê mmông pioh kơ Khua Yang leh anăn kơ arăng ôh.
Si ngă drei dôk rŭng răng đei kơ klei hdĭp leh anăn uêñ mĭn kơ ngăn drăp mơ̆?
Wah lač: Ơ Khua Yang, akâo Ih đru kâo hriăm hdĭp êkoh leh anăn dôk mơak, čiăng dưi mđing ai tiê klei mĭn dlăng phă Khua Yang nanao, mă bruă kơ Khua Yang leh anăn kơ arăng lu hĭn.
Dlăng Klei Aê Diê Blŭ hlăm tlâo thŭn: Klei Bi Hriêng 10:1‑32
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm
Tơdah mâo klei blŭ mguôp, akâo kơ diih mơĭt hră hlăm gmail: radioelansitnik@gmail.com
Kênh Youtube BHKTHN:
