Klei Aê Diê Blŭ: Hêbrơ 10:24-25
Êlan kliăng: “Brei drei bi mĭn si drei dưi mtrŭt hdơ̆ng drei pô kơ klei khăp leh anăn kơ klei ngă bruă jăk. Đăm lui ôh klei bi kƀĭn msĕ si đa đa mưng ngă, ƀiădah bi mđĭ ai hdơ̆ng drei, leh anăn ngă klei anăn lu hĭn êjai diih ƀuh Hruê Krist giăm truh” (Hêbrơ 10:24-25)
Klei êmuh ksiêm mĭn: Ya ngă pô čih hră mơĭt kơ phung Hêbrơ mtă brei drei bi mtrŭt hdơ̆ng drei kơ klei khăp leh anăn kơ klei ngă bruă jăk? Ya klei ngă kơ đa đa phung đăo lui klei bi kƀĭn? Ya klei brei drei ngă čiăng đru jih jang phung msĕ snăn?
Anôk bi knăl klă kơ phung jing leh dŏ Khua Yang jing klei bi êdah klei khăp leh anăn klei ngă bruă jăk msĕ si Klei Aê Diê Blŭ lač leh: “Hŏng klei anei jih jang mnuih srăng thâo kơ diih jing phung ƀĭng kna Kâo, tơdah diih bi khăp hdơ̆ng diih pô” (Y‑Yôhan 13:35); “Kyuadah drei jing bruă Ñu, Ñu hrih leh hlăm Krist Yêsu pioh kơ bruă jăk Aê Diê mkra leh mơ̆ng êlâo, čiăng brei drei tui ngă” (Êphêsô 2:10). Brei phung đăo bi êdah klei khăp leh anăn ngă bruă jăk hdơ̆ng găp leh anăn mbĭt mđrăm bi êdah klei anăn kơ phung ka đăo ôh čiăng kơ digơ̆ ƀuh klei siam mơ̆ng phung đăo kơ Krist.
Hlăm trăn Klei Aê Diê Blŭ anei, pô čih hră mơĭt kơ phung Hêbrơ bi mđĭ bruă klam kơ phung mâo klei đăo, ƀiădah lĕ, mâo đa đa mnuih lač klei đăo kơ Khua Yang jing bruă hjăn pô dê, kyuanăn klei bi kƀĭn amâo yuôm ôh, amâo nao sang Aê Diê amâo mâo dih-nei ôh. Mâo đa đa mnuih amâo nao bi kƀĭn kyua klei mgao lač klei mtô êđal đei, amâo mâo klei bi mđĭ ai ôh. Mâo mnuih amâo nao bi kƀĭn kyua bi mĭn ƀuh ñu pô amâo năng ôh, klei hdĭp dôk lu klei soh, huĭ kơ pô mkăn tlao mưč, mâo mơh mnuih mă bruă hlŭt kŏ asei, “mă hruê amâo djăp, hnêč mă mlam, mă thiăm wăt hruê kjuh”. Sĭt nik grăp čô mâo bruă kpăk mdê mdê, ƀiădah klah čŭn jih klei anăn jing diñu dôk uêñ mĭn knŏng kơ diñu pô, dlăng kơ Phung Sang Aê Diê amâo yuôm ôh. Brei drei hdơr, Phung Sang Aê Diê jing asei mlei Khua Yang Yêsu, grăp čô phung đăo jing jơ̆ng kngan hlăm asei mlei anăn, amâo mâo ôh jơ̆ng kngan tlaih đuĕ mơ̆ng asei mlei ăt dôk hdĭp. Klei đăo jing klei đăo hjăn pô, ƀiădah ngă bruă klei đăo jing bruă bi mguôp jih jang phung đăo. Kăn mâo pô dưi lač rei kyua Phung Sang Aê Diê amâo mâo klă ênŭm snăn lui klei bi kƀĭn amâodah dôk guôn mâo Phung Sang Aê Diê klă ênŭm snăn kơh nao bi kƀĭn. Kyuadah si tô hmô mâo sa Phung Sang Aê Diê klă ênŭm, ƀiădah, bi ih pô jing mnuih amâo mâo klă ênŭm ôh nao bi kƀĭn mbĭt, amâo sui ôh, Phung Sang Aê Diê anăn srăng jing Phung Sang Aê Diê amâo klă ênŭm kyua ih.
Hlăm bruă klam kơ drei pô, brei drei bi mđĭ ai hdơ̆ng drei, boh nik nak tơdah drei thâo kơ hruê Khua Yang Yêsu lŏ hriê giăm truh leh snăn knư̆ drei bi đru hdơ̆ng drei sĭt suôr kkuh mpŭ kơ Khua Yang. Đăm ôh kyua klei ăl lui hĕ phung ayŏng adei pô. Brei drei gĭr hŏng jih ai tiê đru phung lui klei bi kƀĭn lŏ wĭt kơ Phung Sang Aê Diê leh anăn phung mâo sa klei đăo čiăng kơ jih jang dưi bi tuôm hŏng Khua Yang ti hruê Ñu lŏ hriê.
Ya drei srăng ngă čiăng đru phung lui klei bi kƀĭn lŏ wĭt kơ Phung Sang Aê Diê?
Wah lač: Ơ Khua Yang, kâo bi mni kơ Ih mdưm leh kâo hlăm Phung Sang Aê Diê čiăng kơ kâo bi êdah klei khăp leh anăn kơ klei ngă bruă jăk hdơ̆ng găp. Đru kâo thâo khăp kơ Phung Sang Aê Diê, uêñ mĭn kơ phung đăo awăt čiăng đru digơ̆ lŏ wĭt kơ Phung Sang Aê Diê Ih. Kâo wah lač hlăm anăn Khua Yang Yêsu Krist. Amen.
Dlăng Klei Aê Diê Blŭ hlăm tlâo thŭn: I Kôrantô 16:1-24
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
