Henplais 10:24-25
Nqe cim zaj kawm:
“Peb yuav tsum ua tib zoo xyuas saib peb yuav ua li cas ib tug thiaj txhawb tau ib tug lub zog kom ib tug txawj hlub ib tug thiab ib tug ua zoo rau ib tug. Sawvdaws yuav tsum tuaj ua ke mloog lus qhuab qhia tsis txhob tso tseg, ib yam li muaj qee leej tau tso tseg lawm. Nej puavleej paub hais tias twb yuav txog hnub uas Yexus rov qab los. Yog li ntawd peb ib tug hajyam yuav tsum txhawb ib tug lub zog heev dua qhov qub” (Henplais 10:24-25).
Lus nug rau sawvdaws xav:
– Vim li cas tus sau phau Henplais ntuas kom peb ib leeg yuavtsum txhawb ib leeg los ntawm txoj kev hlub thiab tej haujlwm zoo?
– Lub vimchiv twg ua rau ntau tus ntseeg tso kev pehawm tseg?
– Peb yuav ua dab tsi los pab cov neeg uas zoo li ntawd?
Yam uas zoo tshaj plaws ntawm Vajtswv cov menyuam yog qhov uas muaj kev hlub thiab ua tej haujlwm zoo li Vajtswv Txojlus qhia: “Yog nej ib leeg hlub ib leeg, sawvdaws thiaj yuav paub hais tias nej yog kuv cov thwjtim” (Yauhas 13:35); “Peb yog cov uas Vajtswv txhais tes puab. Vajtswv tsim peb los nrog Yexus Khetos koom ib txojsia kom peb ua tau tej haujlwm zoo uas Vajtswv twb xub npaj tseg cia rau peb ua lawm” (Efexus 2:10). Tus uas ntseeg Vajtswv yuavtsum muaj kev hlub nrog rau ua tej haujlwm zoo pub rau yus cov kwv tij ntseeg thiab ua yam ntawd rau tus uas tsis tau paub Vajtswv kom lawv pom yam zoo hauv txhua tus ntseeg.
Nyob rau hauv ntu Vajlukub no, tus sau tsab ntawv Henplais qhuas txog tej haujlwm uas cov ntseeg koom siab ua. Tiamsis lub vimchiv uas coob tus tsis tuaj ua ke pehawm Vajtswv yog li no: Qee tus xav hais tias ntseeg Tswv Yexus hauv lub siab tau lawm, tsis tas yuav mus koom ua ke, kev koom ua ke pehawm Vajtswv tsis yog qhov tseemceeb, tsis tsum mus. Muaj qee tus hais tias mus pehawm Vajtswv mloog zaj lus qhuab qhia tsis zoo, tsis xav mus. Muaj qee tus pom hais tias yus yog tibneeg txhaum, txaj muag thiab ntshai lwm tus thuam, tsis mus. Muaj qee tus tsis muaj sijhawm txaus mus khwv noj, khwv nruab hnub, khwv hmo ntuj thiab khwv hnub so los tseem tsis txaus thiab thiaj tsis khoom mus pehawm. Txhua tus nyias muaj nyias kev tab kaum tiamsis puavleej zoo thooj ib yam uas yog saib yus tus kheej tseemceeb tshaj Vajtswv Pawg Ntseeg lawm. Tiamsis yuavtsum nco ntsoov hais tias, Pawg Ntseeg yog Tswv Yexus lub cev thiab txhua tus ntseeg yog ib yam ntawm lub cev. Yog muab ib txhais tes txiav tawm ntawm lub cev mus txhais tes yeej yuav tuag thiab tsis tsheej dab tsi. Kev ntseeg yog nyob ntawm peb tus kheej tiamsis yog ua haujlwm rau kev ntseeg yuavtsum koom nrog Pawg Ntseeg. Tsis txhob muaj ib tus twg xav hais tias Pawg Ntseeg zoo tsis txaus thiaj tsis xav mus koom, yuav mus nrhiav Pawg Ntseeg zoo dua mam koom. Piv xam hais tias, Pawg Ntseeg yeej zoo kawg nkaus tiamsis vim koj yeej ib txwm yog neeg nkhaus, muaj ntau yam tsis zoo mus koom nrog Pawg Ntseeg ntawd, tsis ntxov ces lig Pawg Ntseeg ntawd yuav raug tsuas kis vim muaj koj nyob hauv tiamsis koj tsis hloov.
Peb feem xyuam yog ib leeg yuav tsum txhawb ib leeg lub zog heev dua qhov qub, rau qhov peb nyob ncua sijhawm uas ze ze hnub Tswv Yexus rov qab los lawm, yuavtsum sib pab kom ncaj ncees mus koom kev pehawm Vajtswv. Tsis txhob vim yog txoj kev chim es tsis quav ntsej txog yus cov kwvtij ntseeg. Tiamsis cia li tas siab, tas zog mus pab txhua tus uas tso kev pehawm tseg lawm tig rov qab los koom nrog Pawg Ntseeg pehawm Vajtswv, kom txhua tus puavleej sawv khov kho tshwm ntsej muag rau hnub uas Tswv Yexus rov qab los.
Thov Vajtswv
Vajtswv, nyuam yaus ua Koj tsaug uas Koj pub rau nyuam yaus nyob rau hauv Koj Pawg Ntseeg sib hlub, sib txhawb zog ua ke. Thov pab kom nyuam yaus paub hlub Pawg Ntseeg thiab hlub txhua tus tso kev ntseeg tseg lawm, mus pab kom lawv tig rov qab los koom Pawg Ntseeg pehawm Vajtswv Koj. Nyuam yaus tuav Tswv Yexus Khetos lub npe thov, Amees.
Peb ua dabtsi pab txhua tus uas tso kev pehawm tseg lawm tig rov qab los koom Pawg Ntseeg pehawm Vajtswv?
Nyeem Vajluskub hauv peb xyoos: 1 Kauleethaus 16:1-24
Kênh Youtube BHKTHN:
