Lukas 14:28-33
Nqe cim:
“Nej cov yog muaj ib tug yuav ua ib lub chaw tsomfaj, tus ntawd yuav tsum xub zaum ua tib zoo xav saib yuav siv nyiaj npaum li cas, thiab nws puas yuav muaj nyiaj txaus ua tau” (Lukas 14:28).
Lus nug rau sawvdaws xav:
– Ob tus duab uas Tswv Yexus hais rau hauv ob zaj lus pivtxwv muaj lub ntsiab dab tsi?
– Tus uas nrog Tswv Yexus mus yuavtsum paub tej yam kev sim siab twg?
– Koj pom yam dab tsi twg tseemceeb thaum uas txiav txim nrog tus Tswv mus?
Cia kom qhia qhov tseemceeb uas yuav txiav txim siab nrog tus Tswv Yexus mus, Tswv Yexus tsis coglus yuav muab dab tsi ua kom rub neeg lub siab, tiamsis tus Tswv hais txog ob zaj lus pivtxwv ua kom pom hais tias txawm yog kev cawmdim tau Vajtswv pub dawb los tus uas nrog Tswv Yexus mus yuavtsum tau coglus fij tas nws lub neej pub rau tus Tswv. Zaj lus pivtxwv tim ib, yog muaj ib tus twg yuav ua ib lub chaw tsomfaj, tus ntawd yuav tsum xub zaum ua tib zoo xav saib yuav siv nyiaj npaum li cas, nyob tsam nws ua tsis tiav nws yuav raug luag thuam. Nyob rau tiam thaud, ib lub vaj txiv hmab twg muaj ib lub chaw tsomfaj, ntawd yog lub chaw nruab qoobloo thiab kuj yog lub chaw uas zov tub sab. Tswv Yexus siv tus duab uas hais txog ua lub chaw tsomfaj yog tes haujlwm meej nriav leejtwg twb pom, yog ua tsis tiav, ces yeej npog tsis tau. Zaj lus pivtxwv tim ob, muaj ib tug vajntxwv yuav mus ua rog rau lwm tug vajntxwv, nws yuavtsum xav ua ntej, yuav mus ntaus lossis yuav hais kom sib raug zoo.
Nyob rau hauv ob zaj lus piv txwv no, tus uas ua lub chaw tsomfaj thiab tus vajntxwv puavleej yog hais txog txhua tus uas raws Tswv Yexus qab. Tes haujlwm uas ua lub chaw tsomfaj thiab mus rau hauv tshav rog yog hais txog tus duab hauv ncua kev uas nrog Tswv Yexus mus. Lub ntsiab ntawm ob zaj lus pivtxwv no yog hais txog yuavtsum ua tib zoo xav thaum uas txiav txim siab nrog tus Tswv mus, vim nrog Nws mus yog kev txiav txim siab coglus mus tas sim neej, tsis yog mus txog tog ces txawm tso tseg. Tswv Yexus xav qhia hauv ob zaj lus pivtxwv no hais tias txhua tus uas yuav nrog Nws mus yuavtsum xav zoo zoo ua ntej txog tus nqis uas yuav raug them nrog Nws mus. Yog tsis ua zoo xav ua ntej txiav txim yuav ua rau peb nrog tus Tswv mus tsis taus, neeg ntiajteb yuav thuam peb, peb yuav tas kev cia siab thiab yuav tiv tsis taus tej kev sim siab hauv kev ntseeg ntxiv mus.
Tus nrog tus Tswv mus yuavtsum paub hais tias yog koob hmoov zoo tiamsis kuj yuavtsum hla dhau tej kev sim siab hauv kev ntseeg thiab. Ntau zaus peb hu lwm tus los ua Tswv Yexus thwjtim kom tau txais tej yam koob hmoov uas Vajtswv pub rau sab nqaij tawv xwb. Tiamsis tseeb tiag txhua tus uas txiav txim nrog tus Tswv mus yeej tau txais tagnrho tej koob hmoov hauv sab nqaij tawv thiab sab ntsujplig huv tibsi, tiamsis kev cawmdim thiab feem xyuam ntawm thwjtim tseem muaj ntau yam muaj nqis tshaj thiab. Tswv Yexus qhia hais tias txhua tus uas nrog Tswv Yexus mus “tiam no nws yuav tau ib puas npaug ntxiv, xwsli: vajtse, kwvtij, nkauj muam, niam thiab txiv, menyuam, liaj teb thiab nws yuav raug kev tsimtxom; tiam tom ntej nws yuav tau txojsia ntev dhawv mus ibtxhis” (Malakaus 10:30). Nrog tus Tswv mus yog qhov kev txiav txim tseemceeb uas yuav tau them ib tus nqis loj heev. Tswv Yexus yeej tsis dag leejtwg ib zaug li. Tswv Yexus hais tias “tus uas tsis tso txhua yam uas nws muaj tseg, tus ntawd ua tsis tau kuv tus thwjtim” (nqe 33).
Thov Vajtswv
Vajtswv, hauv lub ntiajteb no puv nkaus tej kev dag ntxias, tiamsis nyuam yaus ua Koj tsaug vim koj tau cawm nyuam yaus thiab qhia nyuam yaus paub “tej yam uas qhovmuag pom tsuas nyob ib pliag, tej yam uas qhovmuag tsis pom thiaj yuav nyob mus ibtxhis”. Thov pab nyuam yaus nrog Koj mus tas sim neej tsis thim, nyuam yaus ua Vajtswv tsaug. Nyuam yaus tuav Tswv Yexxus Khetos lub npe thov, Amees.
Peb puas zeem paub tej kev sim siab thaum uas nrog Tswv yexus mus, kom peb ua taus siab ntev?
Nyeem Vajluskub hauv peb lub xyoos: Chivkeeb 4
Kênh Youtube BHKTHN:
