Klei Aê Diê Blŭ: Y-Luk 14:28-33
Êlan kliăng: “Kyuadah hlei pô hlăm phung diih tơdah ñu čiăng ngă sang tum, amâo dôk gŭ êlâo čiăng tĭng ênoh thâodah ñu mâo djăp dưi bi leh sang tum anăn?” (Y-Luk 14:28)
Klei êmuh ksiêm mĭn: Si klei mblang kơ dua pŏk rup Khua Yang Yêsu bi êdah hlăm dua klei yăl dliê bi hriêng? Ya klei lông dlăng čiăng kơ phung tui hlue Khua Yang thâo kral? Ya mta klei phŭn leh anăn klei yuôm diih thâo kral kơ klei čuăn tui hlue Khua Yang?
Čiăng kñăm klei yuôm kơ klei čuăn tui hlue Khua Yang Yêsu, Ñu amâo ƀuăn kơ ya klei hmăng hmưi amâo sĭt čiăng ktŭng hrip pô mkăn ôh, ƀiădah Khua Yang yăl dliê kơ dua klei bi hriêng, brei ƀuh wăt tơdah klei bi mtlaih brei hơăi mang, ƀiădah pô mă tŭ klei bi mtlaih brei ƀuăn rơ̆ng myơr kluôm jih klei hdĭp kơ Khua Yang Pô Bi Mtlaih. Klei yăl dliê tal sa, mâo sa čô ngă sang tum ƀiădah amâo tĭng yap ôh dŭm ênoh bi liê snăn ñu amâo dưi bi leh ôh leh anăn arăng tlao mưč. Hlăm ênuk anăn, grăp đang boh kriăk ƀâo mâo sa boh sang tum pioh kiă wăt jing hjiê mkăm pioh boh mnga hrui mơ̆ng bruă buh pla leh anăn gak huĭdah phung knĕ. Khua Yang Yêsu mă yua rup ngă sang tum jing sa mta bruă klă êdah djăp mnuih dưi ƀuh sơăi, kyuanăn tơdah bruă amâo jing, snăn amâo dưi mdăp ôh. Leh anăn klei bi hriêng tal dua, sa čô mtao êlâo kơ nao kơ klei bi blah hŏng mtao mkăn brei dôk tĭng ksiêm bi nik ti krah dua hdră, čuăn nao bi blah amâodah akâo klei êđăp ênang.
Hlăm dua klei bi hriêng anei, pô ngă sang tum amâodah sa čô mtao jing rup kơ phung tui hlue Khua Yang Yêsu sơăi. Bruă ngă sang tum amâodah nao kơ klei bi blah jing rup kơ knhuang êlan tui hlue Khua Yang. Mta phŭn kơ jih dua klei bi hriêng čiăng lač brei ksiêm mĭn hŏng klei răng êlâo kơ čuăn tui hlue Khua Yang Yêsu, kyuadah tui hlue Ñu jing sa klei ƀuăn rơ̆ng kluôm ênŭm amâo dưi ôh ngă ƀĭng kna mkrah dưh. Hlăm jih dua klei bi hriêng, Khua Yang Yêsu čiăng mtô kơ phung tui hlue Khua Yang brei tĭng ksiêm bi nik, thâo kral ênoh tla čiăng tui hlue Ñu. Sa mta klei čuăn ngă amâo mâo răng srăng atăt kơ klei amâo tŭ jing ôh hlăm knhuang êlan tui hlue Khua Yang, lăn ala srăng tlao mưč, leh anăn asei pô đăo anăn ênưih luč klei čang hmăng, phĭ ai tiê mơh êjai tlă anăp hŏng klei lông dlăng hlăm klei đăo.
Tui hlue Khua Yang jing sa klei jăk mơak ƀiădah brei phung tui hlue Khua Yang thâo, srăng găn hgao lu klei lông dlăng mơh. Lu blư̆ drei iêô mthưr mnuih mkăn brei jing ƀĭng kna čiăng dưi mâo klei tŭ dưn jăk mơak Aê Diê brei hlăm klei hdĭp kđeh. Sĭt nik yơh phung čuăn tui hlue Khua Yang Yêsu srăng mă tŭ klei jăk mơak hlăm klei hdĭp kđeh wăt hlăm klei hdĭp mngăt, ƀiădah klei bi mtlaih leh anăn bruă klam phung ƀĭng kna mâo lu klei yuôm bhăn kdlưn hĭn mơh. Khua Yang Yêsu mtô kơ phung tui hlue “Ñu srăng mă tŭ hlăm ênuk anei sa êtuh blư̆ lu hĭn sang, ayŏng adei, amai adei, amĭ, phung anak, leh anăn lăn hma mbĭt hŏng klei arăng ngă jhat mơh, leh anăn klei hdĭp hlŏng lar hlăm ênuk srăng truh êdei.” (Y-Markôs 10:30). Tui hlue Khua Yang jing sa klei čuăn yuôm bhăn čoh čuăn brei tla sa ênoh yuôm snăk. Khua Yang Yêsu amâo tuôm mplư arăng ôh. Ñu lač: “Snăn mơh hlei pô hlăm phung diih amâo hngah ôh kơ jih jang mnơ̆ng ñu mâo, ñu amâo dưi jing ƀĭng kna Kâo ôh” (êlan 33).
Si ngă drei ƀuh mơ̆ dŭm klei lông dlăng êjai tui hlue Khua Yang, čiăng kơ drei dưi gĭr ai tiê tui hlue Ñu?
Wah lač: Ơ Khua Yang, klei hdĭp anei bŏ hŏng klei mplư mđhưk mđhua, ƀiădah bi mni kơ Khua Yang kyua Ih bi mtlaih leh kâo leh anăn brei kâo thâo kral “jih jang klei dưi ƀuh hŏng ală knŏng jing bhiâo êjai, ƀiădah klei ală amâo dưi ƀuh ôh jing dôk nanao hlŏng lar”. Bi mni kơ Khua Yang êdimima. Kâo wah lač hlăm Anăn Khua Yang Yêsu Krist, Amen.
Dlăng Klei Aê Diê Blŭ hlăm tlâo thŭn: Klei Mphŭn Dơ̆ng 4
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
