Pajlug 16:31-33
Nqe cim:
“Kuv qhia tej no rau nej kom nej cov uas txuas rau ntawm kuv muaj kev kaj siab. Neeg ntiajteb yuav tsimtxom nej. Tiamsis nej yuav tsum ua siab tawv, rau qhov kuv twb kovyeej lub ntiajteb no lawm!” (Yauhas 16:33).
Lus nug rau sawvdaws xav:
- Vajntxwv Xalumoos qhia txog lubneej muaj tswvyim licas?
- Yam dabtsi pab peb tswj tau peb tus kheej lub siab?
- Peb xav licas thaum lubneej tau thiab tsis tau raws li siab xav?
Vajntxwv Xalumoos xaus Pajlug tshooj 16 hais txog tus qauv ntawm lubneej muaj tswvyim dhau ntawm peb sab: ua neej ncajncees, tswj siab thiab tso siab phuav rau Vajtswv.
Tim ib, nws hais txog ua neej laus plaubhau dawb yog lub mom yeebkoob rau tus neeg ncaj ncees. Lub mom yeebkoob piv rau lub meejmom, thiab kev hwm, saib taus (Levis Kevcai 19:32), thiab plaub hau dawb yog hais txog hnubnyoog. Ob yam no yog nqi zog rau tus neeg ncaj ncees. Tim ob, vajntxwv qhuas tus neeg tswj tau nws lub siab los ntawm tsis chim sai thiab ua siab ntev. Tibneeg yooj yim saib pom tej yam muaj nqis sab nraud zoo li tej nroog, tiamsis saib tsis tshua pom tej yam muaj nqis ntawm tus cwjpwm sab hauv. Coj tau tus cwjpwm zoo tseemceeb dua ua tiav tej haujlwm sab nqaij tawv. Vajntxwv Xalaumoos piv tus neeg siab ntev zoo dua tus neeg muaj zog, tus neeg tswj siab zoo dua tus neeg ntaus yeej lub nroog. Tim peb, tib neeg “rho ntawv” xav paub saib yuav muaj xwm dabtsi tshwmsim, tiamsis lawv tsis paub hais tias yuav tau thiab tsis tau yog Vajtswv ua tus txiav txim siab. Peb ua haujlwm tas siab, tiamsis yuav tsum nco ntsoov hais tias: “Neeg rho ntawv xav paub saib muaj xwm dabtsi tshwmsim, tiamsis Vajtswv yog tus txiav txim siab” (Pajlug 16:33).
Nyob rau lub neej tiam tshiab no, tus neeg ncajncees tej kev ua zoo yim hnub yim ploj mus vim tibneeg ntiajteb txo qis tej kev ua zoo, tiamsis lawv saib hlob tej kev ua phem. Tus neeg ncaj ncees pheej raug thuam vim kev xav hais tias “ncaj ncees raug poob peev”, lossis muab kev npluanuj saib hlob dua kev ua zoo. Muaj ntau tus khav theeb, muab hlob vim muaj txhua yam los ntawm kev dag ntxias, noj nyiaj, ua tub sab,… Lawv nyiam nrhiav tej khoom ntiajteb heev dua qhov uas txhim kho lawv tus cwjpwm. Cov ntseeg yuav tsum siv Vajtswv Txojlus los sib qhia: Vajtswv naghmo, hnub no thiab mus ibtxhis tsis txawj hloov. Tus Tswv tej lus qhia muaj nqis mus ibtxhis. Tus neeg ncaj ncees ua raws tus Tswv tej lus yuav txais tau lub mom yeebkoob uas ci ntsa iab. Txawm yog nimno peb tabtom tiv kev txomnyem, raug tsimtxom los peb yeej yuav tau lub tshwjchim ci ntsa iab hnub uas tus Tswv rov qab los. Tus Tswv hais tias: “Kuv qhia tej no rau nej kom nej cov uas txuas rau ntawm kuv muaj kev kaj siab. Neeg ntiajteb yuav tsimtxom nej. Tiamsis nej yuav tsum ua siab tawv, rau qhov kuv twb kovyeej lub ntiajteb no lawm!” (Yauhas 16:33). Nyob hauv Vaj Ntsujplig txojkev coj, thov tus Tswv pab peb niaj hnub ua neej ncaj ncees, txhim kho tej cwjpwm zoo ntawm tus ntseeg thiab muab peb lubneej tso plhuav rau tus Tswv ob txhais tes, vim ntseeg hais tias tus Tswv yuav niaj hnub hlub thiab pub yam zoo kawg nkaus rau Nws tej menyuam.
Peb puas ua siab tawv ua neej muaj tswvyim raws li tus Tswv tej lus qhia lawm tau?
Tus Tswv, nyob hauv lubneej muaj ntau yam kev sim siab tshwmsim tuaj, tiamsis nyuam yaus ua Koj tsaug, vim Koj tau qhia qhov tseeb rau nyuam yaus paub ua siab tawv. Thov pab nyuam yaus ua tau lubneej ncajncees, tswj siab, thiab tso plhuav lubneej rau Koj. Amees.
Nyeem Vajluskub hauv peb lub xyoos: Phau Ntawv Nkauj 116:1-117:2
Kênh Youtube BHKTHN:
