Klei Aê Diê Blŭ: Klei Bi Hriêng 16:31-33
Êlan kliăng: “Kâo lač leh klei anei kơ diih, čiăng kơ diih dưi mâo klei êđăp ênang hlăm kâo. Hlăm lăn ala diih srăng mâo klei knap mñai; ƀiădah dôk kjăp bĕ, kâo dưi leh hŏng lăn ala.” (Y-Yôhan 16:33).
Klei êmuh ksiêm mĭn: Si klei mtao Salômôn mtô anak êlan hdĭp thâo mĭn? Ya klei đru drei dưi kiă kriê ai tiê drei pô? Si knuih drei bi êdah ti anăp klei tŭ jing leh anăn klei dluh lĕ hlăm klei hdĭp ?
Mtao Salômôn bi ruê̆ Klei Bi hriêng kdrêč 16 hŏng hnơ̆ng čuăn bi hmô kơ sa klei hdĭp thâo mĭn hŏng tlâo phă tĭng: klei hdĭp kpă ênô, dưi kiă kriê ai tiê pô leh anăn jao jih klei dưi klei lĕ kơ Aê Diê.
Tal sa, ñu lač kơ ƀŭk kô̆ jing đuôn mtao klei guh kơang pioh kơ mnuih hdĭp kpă ênô. Đuôn mtao bi knăl kơ knuih kơhưm, klei năng mpŭ (Bruă Lêwi 19:32), leh anăn ƀŭk kô̆ lač kơ thŭn hdĭp jŏk. Dua mta klei anei jing klei mưn kơ mnuih hdĭp kpă ênô. Tal dua, mtao bi mđĭ mnuih thâo ksiêm krơ̆ng knuih jing pô hŏng klei amâo djăl ăl leh anăn kiă kriê ai tiê pô. Anak mnuih êlưih ƀuh ênoh yuôm kơ mnơ̆ng mnuă ti êngao msĕ si mnư̆ ƀuôn prŏng, ƀiădah khăng dleh ƀuh ênoh yuôm klei jing hlăm lam. Bruă mjuăt mjing knuih mnuih yuôm hĭn kơ klei tŭ dưn mâo mơ̆ng mnơ̆ng mnuă. Ñu bi msĕ hlei pô amâo djăl ăl jing jăk hĭn kơ sa čô jhŏng ktang, hlei pô kiă kriê ai tiê ñu pô jing jăk hĭn kơ sa čô dưi mă sa boh ƀuôn prŏng. Tal tlâo, arăng “ngă klei mđăo duah klei myun” čuăn kơ dhut klei hdĭp pô, ƀiădah amâo thâo ôh klei čuăn tŭ jing amâodah dluh lĕ dôk hlăm kngan Aê Diê. Bruă čuăn kơ anak mnuih jing klei mă bruă hŏng jih ai tiê, ƀiădah brei hdơr “Arăng ngă klei mđăo hlăm kdrŭn ao, ƀiădah klei čuăn ngă kbiă hriê mơ̆ng Aê Diê” (Klei Bi Hriêng 16:33).
Hlăm klei hdĭp ƀuôn sang ênuk anei, ênoh yuôm klei kpă ênô mnuih ƀrư̆ hruê arăng dlăng hdjul mang, tơl đa lŏ bi mđĭ hĭn bruă ngă amâo mâo kpă ênô. Arăng mưč kơ pô hdĭp kpă ênô, lač: “kpă ênuah khăng tŭ klei hriă luč”, amâodah bi mđĭ klei mdrŏng sah hĭn kơ knuih jăk. Lu mnuih hưn ktưn, ngă mgao kyua mâo klei tŭ jing hlăm mnơ̆ng mnuă mơ̆ng klei diñu mplư luar, tlĕ dăp, ƀơ̆ng ngăn, jhat ƀai… Diñu uêñ mĭn tui duah mnơ̆ng mnuă hĭn kơ hriăm mjuăt knuih ai tiê. Phung đăo brei mñă bi hdơr hdơ̆ng găp hŏng Klei Aê Diê Blŭ: Aê Diê hruê mbruê hruê anei amâo tuôm mlih ôh. Klei Aê Diê Blŭ mtô jing yuôm bhăn nanao hlŏng lar. Mnuih kpă ênô gưt ngă hlue Klei Aê Diê Blŭ srăng mă tŭ đuôn mtao guh kơang. Wăt tơdah ară anei hĭn drei dôk tŭ klei knap mñai dưn, ƀiădah drei srăng mă tŭ klei guh kơang hlŏng lar hlăk hruê Khua Yang Yêsu lŏ hriê. Ñu pô yơh lač leh: “Hlăm lăn ala diih srăng mâo klei knap mñai, ƀiădah dôk kjăp bĕ, kâo dưi leh hŏng lăn ala” (Y-Yôhan 16:33). Hlăm klei atăt gai mơ̆ng Yang Mngăt Jăk, akâo Khua Yang brei drei dôk kpă ênô nanao, thâo hriăm mjuăt knuih yuôm bhăn sa čô pô đăo kơ Krist leh anăn jao jih klei hdĭp hlăm kngan Khua Yang kyua đăo sĭt Ñu khăp kơ drei leh anăn čiăng brei klei jăk hĭn kơ phung anak ƀuôn sang Ñu nanao.
Si ngă drei dôk kjăp ai tiê hdĭp thâo mĭn tui si klei Khua Yang mtô leh mơ̆?
Wah lač: Ơ Khua Yang, hlăm klei hdĭp bŏ hŏng lu lĭn klei lông dlăng truh, ƀiădah bi mni kơ Khua Yang mtô leh kơ kâo klei sĭt nik Ih čiăng kơ kâo kjăp ai tiê. Akâo Khua Yang brei kâo dôk hdĭp kpă ênô, tŭ gĭr, leh anăn jao jih klei hdĭp kâo kơ Ih.
Dlăng Klei Aê Diê Blŭ hlăm tlâo thŭn: Klei Mmuñ Hđăp 116:1-19; 117:1-2
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm
Tơdah mâo klei blŭ mguôp, akâo kơ diih mơĭt hră hlăm gmail: radioelansitnik@gmail.com
Kênh Youtube BHKTHN:
