II Timautes 4:1-5
Nqe cim
“Koj yuav tsum muab siab rau qhia Vajtswv Txojlus, tsis hais lub sijhawm twg los koj yuav tsum qhia. Koj yuav tsum ua siab ntev qhuab ntuas sawvdaws, yaum sawvdaws los ntseeg thiab txhawb sawvdaws lub zog” (II Timautes 4:2).
Lus nug rau sawvdaws xav:
- Timthawj Paulus xav kom Xibhwb Timautes ua yam dabtsi?
- Nws hais txog tej yam muaj tseeb twg tabtom tshwmsim?
- Tej yam ntawd tabtom tshwm muaj licas nyob hauv peb tiam niaj hnub nimno?
- Peb yuav tsum ua licas?
Timthawj Paulus siv tus Tswv lub hwjchim los qhuab ntuas tus Xibhwb hluas Timautes. Ntawm no yog tej lus qhuab ntuas tseemceeb tiamsis kuj hnyav heev vim tej lus no yog hais tabmeeg “Tus uas yuav los txiav txim rau cov neeg ciaj thiab cov neeg tuag” (nqe 1). Nws qhia Timautes yuav tsum muab siab rau qhia Vajtswv Txojlus txawm muaj sijhawm thiab tsis muaj, thiab yuav tsum ua siab ntev qhia, qhuab ntuas, yaum kom sawvdaws los ntseeg thiab txhawb sawvdaws lub zog. Ua siab ntev qhia tsis yog ib lo lus qhuab ntuas xwb tiamsis kuj yog ib lub luag haujlwm uas Tswv Yexus muab cob rau Nws cov thwjtim hais tias: “Nej cia li mus thoob plaws lub ntiajteb no thiab qhia Txojmoo Zoo kom sawv daws hnov.” (Malakaus 16:15).
Timthawj Paulus qhia rau Timautes pom txog tej yam uas tabtom tshwmsim tuaj, kom txhawb tau nws ua siab ntev qhia Txojmoo Zoo. Ntawd yog qhov uas yuav tsis muaj neeg xav mloog Vajtswv Txojlus lawm, lawv yuav tsis mloog txoj tseeb thiab tsuas xav mloog “tej zaj uas sawvdaws nyiam mloog” xwb. Tibneeg yuav ua raws li lawv lub siab nyiam, thiab tsis xav mloog qhov tseeb ntxiv lawm (nqe 3-4). Vim li ntawd, Timautes haj yam yuav tsum tseg sijhawm los qhia Vajtswv Txojlus txhua lub tsamthawj.
Tej no kuj yog yam uas tabtom tshwm muaj nyob rau peb tiam niaj hnub nimno. Los ntawm kev vammeej rau tej cuabyeej siv saum huabcua, tibneeg yooj yim xaiv yam uas lawv xav mloog. Thaum ua li ntawd, lawv xaiv mloog tej uas “chaws pob ntseg”, “kaj lub siab”, heev dua qhov uas mloog Vajtswv Txojlus. Tseeb tiag, peb pom meej hais tias tibneeg yim hnub yim txav deb Vajtswv Txojlus lawm. Lawv muab Vajluskub tshem tawm ntawm tej tsev kawm, muab sijhawm thov Vajtswv tso tseg. Lawv xaiv mus saib duab yees, mus mloog suab nkauj zom zem heev dua qhov uas mus mloog qhia Txojmoo Zoo. Muaj coob leej uas yog tus Tswv cov menyuam kuj nyiam mloog “tej zaj uas sawvdaws nyiam mloog” heev dua qhov uas mloog qhov tseeb hauv Vajtswv Txojlus. Thaum ntsib tej kev sim siab zoo li ntawd, tus qhia Txojmoo Zoo haj yam yuav tsum vamkhom tus Tswv lub zog, ua siab ntev, tsis txhob tso tseg, tiamsis yuav tsum“muab siab rau qhia Vajtswv Txojlus, tsis hais lub sijhawm twg los yuav tsum qhia.”
Timthawj Paulus qhuab ntuas Timautes ntxiv hais tias: “Tiamsis koj tsis txhob ua li lawv. Koj yuav tsum tswj koj lub siab txhua lub sijhawm, ua siab ntev nyiaj tej kev txomnyem mus qhia Txojmoo Zoo thiab muab siab rau ua txhua yam haujlwm uas Vajtswv muab rau koj ua lawm kom tiav” (nqe 5). Lo lus qhuab ntuas no yog pub rau txhua tus ntseeg, tsis yog tsuas hais rau xibhwb lossis cov tub xa Txojmoo Zoo xwb. Tshajtawm Txojmoo Zoo yog lub luag haujlwm loj uas tus Tswv muab cob rau txhua tus ntseeg. Peb yuav tsum paub tswj siab, ua siab ntev nyiaj tej kev txomnyem, ua kom tiav lub luag haujlwm uas tus Tswv cob rau peb no.
Peb puas ua siab ntev qhia Txojmoo Zoo lawm tau?
Vajtswv, nyuam yaus ua Koj tsaug vim Koj tej lus tau qhuab ntuas nyuam yaus. Thov pab nyuam yaus muaj lub siab tawv thiab ua siab ntev qhia Txojmoo Zoo txhua lub sijhawm kom cawm tau coob leej dim. Amees.
Nyeem Vajluskub hauv peb lub xyoos: Phau Ntawv Nkauj 110:1-112:10
Kênh Youtube BHKTHN:
