Lukas 15:11-24
Nqe cim:
“Yog li ntawd, nej yuav tsum tso nej tej kev txhaum tseg thiab tig rov los cuag Vajtswv, Vajtswv thiaj yuav zam nej lub txim. Yog nej ua li ntawd” (Tes Haujlwm 3:19)
Lus nug rau sawvdaws xav:
– Tus tub yau tau thov leej txiv dab tsi?
– Nws tau ua dab tsi thiab raug li cas?
– Los ntawm qhov twg nws tau kev zam txim thiab rov los ua nws txiv leej tub dua?
– Zaj kawm no ntuas peb yam dab tsi?
Tswv Yexus hais zaj xwm txog tub uas yuam kev lawm los ua timkhawv los qhia Vajtswv kev hlub thaum tibneeg tso kev txhaum tseg rov los cuag Nws. Hauv zaj xwm leej tub yau tau thov leej txiv muab nws lub cuabtam faib rau nws. Zaj no txawv cov Yixlayees txoj kev coj noj coj ua, vim pheej ib txwm mas leej txiv yog tus uas hais ua ntej yuav faib nws lub cuabtam rau cov menyuam. Muab saib tus tub no tes haujlwm zoo yam li ua saib tsis taus leej txiv, taij ua ntej leej txiv faib lub cuabtam rau nws. Tiamsis leej txiv kuj kam. Thaum tau lawm, nws tso vajtse tseg mus rau ib qhov chaw deb, noj haus lom zem thiab siv tej uas leej txiv faib nws ywj siab, ua dog ua dig, phob tas. Thaum ntawd muaj kev tshaib plab thoob plaws lub tebchaws, nws tsis tshuav dabtsi li lawm, nws thiaj mus pab luag zov npua tom teb yog yam tsiaj uas qias rau cov Yixalayees. Tiamsis tseem txomnyem heev uas yog nws xav noj cov plhaub taum uas npua noj, kom tsau nws plab los tsis muaj leejtwg pub rau nws noj!
Thaum uas poob mus ti nkaus rau qab qho kev txomnyem, tus tub yau no mam li xeev los zeem paub yus yuam kev lawm thiab nco txog tsev neeg txoj kev hlub. Nws nrhiav kev tig rov los tas siab lees txim thiab npaj siab tso lub meejmom leej tub, lees yuav lub meejmom ua ib tug qhev. Vim li ntawd, tus tub hluas no thiaj sawv tsees khov kho thiab tig rov los cuag leej txiv. Tiamsis hauv txoj kev hlub uas tsis muaj nrim, leej txiv thiaj “dhia loo” mus tos thiab “puag nkaus tus tub nwj” uas tau ncaim ntev lawm. Tsis tas li ntawd, leej txiv tseemkom cov tub qhe mus nqa cev ris tsho uas zoo zoo tuaj rau nws hnav. Nqa nplhaib tuaj rau nws coj, muab khau tuaj rau nws rau, kho rov los ua leej txiv ib tug tub thiab ua ib rooj mov rau sawvdaws noj ua kev zoo siab. No yog tes haujlwm qhia tshwm leej txiv koob hmoov, lub siab hlub tshua thiab txoj kev hlub uas pub rau tus menyuam uas tso kev txhaum tseg tiag tiag lawm.
Tus tub yau no tsis yog tsuas zeem paub nws tau ua txhaum rau leej txiv xwb, tiamsis ua ntej dua yog nws tau “ua txhaum rau Vajtswv”. Thaum uas tso kev txhaum tseg thiab ua siab tawv qhawv tig rov los, nws tsuas xav txog tau ua ib tug tub qhe hauv tsev lawm xwb, tiamsis qhov uas nws lub siab lees txim thiab tso kev txhaum tseg, tseem txais tau ntau tshaj qhov uas nws xav tseg. Vajtswv Txojlus hauv Pajlug 28:13 qhia paub: “Yog koj pheej npog tej kev txhaum tseg koj lub neej yuav tsis vammeej; yog koj lees thiab tso plhuav tej kev txhaum tseg Vajtswv yuav hlub koj”. Vajtswv yog uas npluamias kev hlub tshua, nws yuav zam txim rau txhua tus uas tas siab tso kev txhaum tseg thiab tig rov cuag Nws (1 Yauhas 1:9).
Tibneeg yeej ib txwm xav khiav nkaum lossis npog yus kev txhaum tiamsis ntawd tsis yog qhov uas Vajtswv xav tau. Yog Vajtswv menyuam yuavtsum paub Vajtswv lolus cogtseg, peb cia li sawv khov kho lees yus kev txhaum, ua siab tawv tso kev txhaum tseg thiab tig rov los cuag Vajtswv, Nws yuav zam txim rau peb.
Thov Vajtswv,
Vajtswv, nyuam yaus ua Koj tsaug uas Koj muaj npluamias kev hlub tshua rau nyuam yaus. Thov pab nyuam yaus tsis npog kev txhaum, thaum ua txhaum lawm kom paub lees txim, tso kev txhaum tseg thiab tig rov los cuag Vajtswv kom saj tau Koj txoj kev zam txim. Nyuam yaus tuav Tswv Yexus Khetos lub npe thov, Amees.
Peb puas muaj lub siab tawv lees txim, txais yuav yus lub txim thiab muaj feem xyuam rau tej uas peb tau ua yuam kev lawm?
Nyeem Vajjluskub hauv peb lub xyoos: 2 Yauhas
Kênh Youtube BHKTHN:
