Klei Aê Diê Blŭ: Y-Luk 15:11-24
Êlan kliăng: “Kyuanăn kmhal bĕ kơ klei soh diih leh anăn lŏ wĭt kơ Aê Diê, čiăng kơ Ñu pap brei klei soh diih,” (Bruă Phung Khua Ƀĭng Kna 3:19)
Klei êmuh ksiêm mĭn: Ya klei anak êkei mda hĭn akâo leh kơ ama ñu? Ya klei ñu ngă leh, leh anăn ya klei truh kơ ñu? Hŏng ya klei ñu dưi mâo klei pap brei leh anăn dưi lŏ mâo wĭt anăn pia jing anak hlăm gŏ sang? Ya klei mñă kơ drei mơ̆ng klei hriăm anei?
Khua Yang Yêsu yăl klei yăl dliê Sa Čô Anak Luč Leh čiăng hưn bi sĭt klei khăp Ama hlăm adiê, tơdah anak mnuih kmhal kơ klei soh lŏ wĭt hŏng Ama. Hlăm klei yăl dliê, anak êkei mda hĭn akâo ama ñu bi mbha ngăn dưn djŏ kơ ñu. Anak êkei anei ngă leh sa bruă arăng yap jing mrưh kyua akâo kơ ama bi mbha ngăn dưn êlâo. Ƀiădah lĕ, ama ñu tŭ ư mơh. Leh anăn ñu nao hiu kơ sa boh čar kbưi, tinăn ñu bi liê ngăn dŏ ñu hŏng klei hdĭp soh jhat, tơdah ñu bi liê jih leh, klei ư̆ êpa prŏng truh hlăm čar anăn, ñu amâo lŏ mâo mnơ̆ng ƀơ̆ng ôh, snăn ñu tŭ klei hêñ mlâo nao mă bruă kiă ŭn kơ arăng wăt tơdah ŭn jing sa mta hlô mnơ̆ng čhŏ tui si klei bhiăn phung Israel. Kjham hĭn mơh kyuadah êpa đei, tơl ñu mhao čiăng ƀơ̆ng ƀiă êtak arăng čiêm ŭn ƀiădah arăng amâo brei ôh!
Tơdah lĕ truh ti gŭ tur dhông êlam klei hdĭp, anak êkei mda hĭn dơ̆ng ksiêm wĭt hlăm ai tiê ñu yơh, thâo kral klei soh wê ñu leh anăn hdơr wĭt kơ klei khăp hơiêng hlăm gŏ sang. Ñu bi mĭn srăng lŏ wĭt akâo klei pap kơ ama ñu, leh anăn wăt lui klei dưi jing anak knŏng tŭ ư akâo jing sa čô dĭng buăl ama ñu yơh. Leh mĭn snăn, êkei êdam kjăp ai tiê kgŭ dơ̆ng lŏ wĭt kơ ma ñu. Ƀiădah hŏng klei khăp amâo mâo knhal, ama ñu “êran nao” drông “kmiêk leh anăn čŭm” anak êkei klah đuĕ ñu. Hĭn mơh, ama ñu lŏ lač kơ phung dĭng buăl mă ao jhung siam hĭn bi hơô ñu, čŭt krah ti kđiêng ñu, čŭt hdruôm jơ̆ng kơ ñu, lŏ bi mrâo klei jing anak leh anăn ngă klei ƀơ̆ng huă hơ̆k mơak. Anei jing klei bi êdah klei pap leh anăn klei khăp yuôm bhăn sa čô ama pioh kơ anak ñu mâo ai tiê thâo kmhal sĭt.
Anak êkei mda hĭn thâo kral ñu amâo knŏng mrưh hŏng ama ƀiădah êlâo hĭn ñu “ngă soh leh hŏng Adiê”. Tơdah kmhal leh anăn jhŏng lŏ wĭt, ñu knŏng hmăng hmưi dưi jing dĭng buăl hlăm sang, ƀiădah hŏng ai tiê kmhal hưn klei soh ñu mă tŭ klei lŏ wĭt lač êgao kơ klei ñu hmăng hmưi. Klei Aê Diê Blŭ hlăm Klei Bi Hriêng 28:13 brei thâo: “Hlei pô mdăp klei soh ñu amâo srăng mâo klei đĭ kyar ôh, ƀiădah hlei pô hưn leh anăn lui klei soh anăn srăng mâo klei pap.” Aê Diê jing Pô mdrŏng hŏng klei pap, Ñu srăng pap brei kơ hlei pô kmhal sĭt hŏng jih ai tiê leh anăn jhŏng lŏ wĭt hŏng Ñu (I Y-Yôhan 1:9).
Hlue klei mĭn anak mnuih khăng čiăng dêč đuĕ amâodah mdăp guôm hĕ klei soh pô, ƀiădah klei anăn amâo djŏ jing klei Aê Diê čiăng ôh. Jing anak Aê Diê, djă păn kjăp klei Ñu ƀuăn, brei drei jhŏng tŭ klei soh drei ngă leh, jhŏng kmhal kơ klei soh leh anăn hmiêt mkăp lŏ wĭt hŏng Khua Yang čiăng dưi mâo klei pap brei.
Si ngă drei jhŏng tŭ klei soh drei, hưn klei soh leh anăn tŭ bruă klam klei soh wê drei ngă mơ̆?
Wah lač: Ơ Khua Yang, bi mni lač jăk kơ Khua Yang kyua klei Ih pap êbeh dlai nanao kơ kâo. Akâo Khua Yang đru kâo amâo mdăp klei soh kâo ôh ƀiădah jhŏng hưn leh anăn lŏ wĭt kmhal klei soh hŏng Khua Yang, čiăng dưi bi knal klei Khua Yang pap brei klei soh kâo. Kâo wah lač hlăm Anăn Khua Yang Yêsu Krist, Amen.
Dlăng Klei Aê Diê Blŭ hlăm tlâo thŭn: II Y-Yôhan
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm.
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
