Yakaunpaus 1:22-25
Nqe cim:
“Nej yuav tsum xyaum ua raws li Vajtswv Txojlus, tsis yog ua cov mloog xwb. Yog nej mloog xwb, tsis ua raws li, ces kuj yog nej rov dag nej.” (Yakaunpaus 1:22)
Lus nug rau sawvdaws xav:
– Yakaunpaus hais li cas txog tus neeg uas mloog Vajtswv lus hais tias txaus lawm?
– Qhov twg yog qhov txawv ntawm tus neeg mloog Vajtswv Txojlus tas ua raws thiab tus neeg mloog tas tsis ua raws?
– Hnub no peb yuav ua raws li Vajtswv Txojlus zoo li cas?
Ntau leej hais sau zog tsab ntawv Yakaunpaus ua 4 lo lus “Ua Raws Tswv Lus”, thiab ntau tus tub sojntsuam Vajtswv Txojlus kuj xaiv Yakaunpaus 1:22 ua nqe tseemceeb rau tagnrho tsab ntawv no. Hauv ntu Vajluskub hnub no, Yakaunpaus ntuas cov ntseeg “nej yuav tsum xyaum ua raws li Vajtswv Txojlus, tsis yog ua cov mloog xwb. Yog nej mloog xwb, tsis ua raws li, ces kuj yog nej rov dag nej.” Raws li Yakaunpaus tus uas yog ib tug thawjcoj tseemceeb nyob rau tiam Pawg Ntseeg xub thawj tau hais, ib tug neeg mloog Vajtswv Txojlus tas tsis ua raws, nws hais tias nws mloog txaus lawm, yog tus neeg uas nws rov dag nws tus kheej. Muaj ib nqe lus hais li no, “Tsis zoo rau tus raug dag, tiamsis yog yus rov dag yus mas hajyam tsis zoo, thiab rov dag yus sab ntsujplig mas hajyam phem dua thiab.” Tus neeg ua li ntawd lub neej ntsib kev txhawj ntshai, rau qhov Tswv Yexus hais tias, “Tsis yog txhua tus uas hu kuv hais tias, ‘Tus Tswv! tus Tswv,’ ces yuav tau mus Ntuj Ceebtsheej. Tiamsis tsuas yog cov uas ua raws li kuv Txiv tus uas nyob saum ntuj lub siab nyiam, thiaj tau mus xwb.” (Mathais 7:21). Kev ntseeg tsis muaj haujlwm ua ces yog kev ntseeg dag.
Cia kom paub meej qhov txawv ntawm tus neeg mloog tsis ua thiab tus neeg mloog ua raws, Yakaunpaus siv tus duab uas saib ntsejmuag hauv daim iav los piv. Daim iav yuav pab kom tus neeg ntsia pom nws lub ntsejmuag paub kho zoo. Vajtswv Txojlus yog daim iav uas pom tagnrho txhua kis hauv tibneeg lub neej. Yog tsuas ua tus mloog xwb tsis ua raws ces yuav zoo li tus neeg uas mus ntsia iav rov los tsis paub tias yus ntsejmuag qias qhovtwg. Tus neeg uas mloog Vajtswv Txojlus thiab ua raws yog tus neeg uas ntsia pom nws qhov tsis zoo thiab hloov kev ua neej raws li tus Tswv Txojlus. Tus neeg ua li ntawd yog tus uas tau Vajtswv Txojlus lub hwjchim hloov thiab yuav loj hlob txhua hnub kom zoo li tus Tswv zuj zus.
Muaj ntau leej tuaj hauv Pawg Ntseeg hnub athiv, tsuas tuaj mloog Vajtswv Txojlus kom muaj kev kaj siab mentsis tomqab uas khwv khwv dhau ib lub athiv xwb, thiab lawv pom hais tias lawv mloog li ntawd txaus lawm. Lawv tsuas xav mloog tej ntu uas hais raug raug siab xwb, txog ntu uas ntuas, kho ces lawv tsis xav mloog lawm. Yog li txawm yog lawv twb ntseeg Vajtswv ntev xyoo los lawv lub neej thiaj tsis muaj kev hloov pauv li. Tseeb tiag lawv tabtom nyob hauv ncua caij nyoog uas txaus ntshai heev rau sab ntsujplig, rau qhov lawv rov dag lawv tus ntsujplig. Yuav tsum nco ntsoov hais tias kev ntseeg tseeb yeej tawg paj txi txiv. Xav kom peb txhua tus thaum uas kawm dhau zaj no, peb tsis yog ua cov mloog xwb, tiamsis yog cov uas ua raws thiab, kom tus Tswv Txojlus hloov peb txojkev ua neej txhua hnub.
Thov Vajtswv,
Tus Tswv, ua tsaug uas Koj pub muaj Koj Txojlus los ua cov zaub mov yug nyuam yaus sab ntsujplig, qhia kom nyuam yaus paub Koj thiab ua tau zoo li Koj ua zuj zus. Thov Koj pab kom nyuam yaus tsis yog ua tus mloog xwb, tiamsis rau siab kawm thiab vamkhom Koj lub hwjchim pab kom ua tau raws nraim li Koj Txojlus qhia. Nyuam yaus tuav Tswv Yexus lub npe thov, Amees.
Peb thov tus Tswv pab yus xyaum ua yam dab tsi dhau zaj kawm hnub no?
Nyeem Vajluskub hauv peb lub xyoo: I Xamuyees 18
Kênh Youtube BHKTHN:
