Klei Aê Diê Blŭ: Y‑Yakơ 1:22-25
Êlan kliăng: “Ƀiădah brei diih ngă tui si klei blŭ, amâo djŏ knŏng hmư̆ leh anăn mplư diih pô ôh” (Y‑Yakơ 1:22)
Klei êmuh ksiêm mĭn: Ya Y‑Yakơ lač kơ mnuih knŏng hmư̆ Klei Aê Diê Blŭ leh anăn lač djăp leh dŭm anăn? Ti anôk mdê plah wah sa čô hmư̆ Klei Aê Diê Blŭ ƀiădah amâo tui ngă ôh leh anăn sa čô hmư̆ leh anăn tui ngă? Hruê anei si ngă drei srăng tui ngă Klei Aê Diê Blŭ?
Mâo lu mnuih klah čŭn klei čih hlăm hră Y‑Yakơ hŏng 7 boh blŭ “Ngă Tui Si Klei Aê Diê Blŭ”, leh anăn lu phung hriăm êlam Klei Aê Diê Blŭ ăt ruah Y‑Yakơ 1:22 mơh jing êlan kliăng kơ hră mơĭt anei. Hlăm trăn Klei Aê Diê Blŭ hruê anei, Y‑Yakơ mtă kơ phung dlăng hră ñu čih snei, “Brei diih ngă tui si klei blŭ, amâo djŏ knŏng hmư̆ leh anăn mplư diih pô ôh”. Hŏng Y‑Yakơ, sa čô mnuih gĭt gai phŭn Phung Sang Aê Diê ênuk tal êlâo, tơdah sa čô knŏng hmư̆ ƀiădah amâo ngă ôh tui si Klei Aê Diê Blŭ, lač djăp leh dŭm anăn, jing mnuih dôk mplư mă ñu pô yơh. Mâo pô tuôm lač msĕ snei, “Jhat snăk tơdah tŭ klei arăng mplư, ƀiădah mplư mă pô jing klei jhat hĭn, leh anăn mplư mngăt pô jhat kjham hĭn mơh.” Klei hdĭp mnuih msĕ snăn srăng tuôm hŏng klei huĭ snăk kyuadah Khua Yang Yêsu lač leh snei, ““Amâo djŏ ôh grăp čô hlei pô lač kơ Kâo, ‘Ơ Khua Yang, Ơ Khua Yang’ srăng mŭt hlăm ƀuôn ala mtao adiê, ƀiădah knŏng hlei pô ngă tui si Ama Kâo hlăm adiê čiăng” (Y‑Mathiơ 7: 21). Klei đăo amâo mâo bruă ngă jing klei đăo mgưt.
Y‑Yakơ bi hmô hŏng sa čô mnuih dlăng ƀô̆ mta ñu hlăm ală kĭng čiăng bi klă anôk mdê plah wah mnuih knŏng hmư̆ hŏng mnuih hmư̆ leh anăn ngă tui si Klei Aê Diê Blŭ. Ală kĭng bi êdah si ƀô̆ mta pô dlăng jing čiăng kơ gơ̆ lŏ bi mlih guôp hĭn. Klei Aê Diê Blŭ jing sa boh ală kĭng klă ênŭm bi êdah klei jing klei hdĭp grăp čô mnuih. Tơdah knŏng hmư̆ ƀiădah amâo ngă ôh klei anăn jing msĕ si sa čô dlăng ƀô̆ mta ñu hlăm ală kĭng leh anăn đuĕ nao wăt tơdah ƀô̆ mta ñu mâo anôk čhŏ dưn. Ƀiădah, bi mnuih hmư̆ Klei Aê Diê Blŭ leh anăn tui ngă, mnuih anăn jing mnuih thâo kơ klei ñu jing čhŏ leh anăn bi mlih hĕ tui si Klei Aê Diê Blŭ mtô. Mnuih msĕ snăn bi knal sĭt kơ bi mlih mơ̆ng klei myang Klei Aê Diê Blŭ leh anăn đĭ hriê kơ prŏng grăp hruê čiăng jing msĕ si Khua Yang hĭn.
Mâo lu mnuih hriê bi kƀĭn hlăm Sang Aê Diê hruê kjuh, hmư̆ Klei Aê Diê Blŭ knŏng čiăng duah ƀiă klei êđăp ênang ruê̆ sa hruê kăm mă bruă suăi, leh anăn ƀuh dŭm anăn jing djăp leh. Diñu knŏng khăp hmư̆ đơ kdrêč jăk hlăm Klei Aê Diê Blŭ đuč, bi kdrêč mâo klei ƀuah, klei mkra mjuăt leh anăn bi hriăm diñu amâo čiăng hmư̆ ôh. Kyuanăn klei hdĭp diñu amâo mâo klei mdê ôh wăt tơdah diñu đăo sui thŭn leh dưn. Boh sĭt gơ̆ klei hdĭp myang diñu dôk hlăm klei huĭ hyưt êdimima kyuadah diñu dôk mplư kơ mngăt diñu pô. Hdơr bĕ, klei đăo sĭt mâo boh tŭ dưn nanao. Hmăng hmưi grăp čô drei leh hriăm klei hriăm anei amâo djŏ knŏng mjưh mă tăp hmư̆ Klei Aê Diê Blŭ ôh ƀiădah wăt hlue ngă msĕ mơh, čiăng Klei Aê Diê Blŭ bi mlih klei drei dôk dơ̆ng ƀơ̆ng huă grăp hruê.
Ya klei drei akâo kơ Khua Yang đru drei tui ngă klei Ñu bi hriăm hruê anei?
Wah lač: Ơ Khua Yang, lač jăk kơ Ih brei leh klei Ih Blŭ jing mnơ̆ng ƀơ̆ng huă myang kơ klei hdĭp kâo, đru kâo thâo kral Ih leh anăn jing msĕ si Ih hĭn. Đru kâo amâo djŏ knŏng hmư̆ leh anăn lui ôh ƀiădah hŏng jih ai tiê ksiêm mĭn leh anăn knang kơ Ih čiăng tui ngă ya klei Ih mtă leh. Kâo wah lač hlăm Anăn Khua Yang Yêsu Krist. Amen.
Dlăng Klei Aê Diê Blŭ hlăm tlâo thŭn: I Y‑Samuel 18
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm.
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
