II Kevcai 14:3-21
Nqe cim
“Yog li ntawd, nej yuav noj yuav haus lossis yuav ua ib yam dabtsi, nej yuav tsum ua kom Vajtswv tau ntsejmuag” (I Kauleethaus 10:31).
Lus nug rau sawvdaws xav:
- Vajtswv qhia kom Nws haivneeg tau noj thiab tsis tau noj yam tsiaj twg?
- Qhov uas feebmeej yam tsiaj huv thiab tsis huv muaj lub ntsiab licas?
- Peb ua raws zaj kawm no licas hauv peb lubneej?
Ntu Vajluskub no sau tseg tej kev cai ntsistxog tej khoom noj uas cov Yixalayees yuav tsum coj raws txhua hnub. Muaj ob yam nqaij ntawm tej tsiaj uas muab faib ua tsiaj huv thiab tsiaj tsis huv. Tus Tswv haiv neeg tsuas tau noj tej tsiaj huv xwb.
Tej kevcai hais txog tej khoom noj no tej zaum ua rau peb nyuaj totaub vim licas Vajtswv muab faib nruj npaum ntawd, tiamsis Tswv Yexus ho qhia meej hais tias peb tsis raug tej kevcai ntsistxog tej khoom noj sab nraud mus rau hauv plab khi lawm (Malakaus 7:18-23). Tiamsis, peb totaub tsawg tshaj yog muaj ob lub vimchij uas tus Tswv hais kom ua li ntawd. Tim ib yog hais txog kev noj qab nyob zoo. Raws li cov tub txawjntse sab kho mob hais, mas nqaij npua thiab tej noog noj nqaij yog tej khoom noj uas muaj tej kabmob. Tshaj ntawd, nyob hauv nqe 21, tus Tswv kuj txwv Nws haivneeg tsis pub noj tej tsiaj uas mob tuag, qhov no qhia hais tias tus Tswv txhawjxeeb txog Nws haivneeg kev noj qab nyob zoo. Tim ob yog hais txog kev ntseeg. Feem ntau tej tsiaj tsis huv raug txwv xws li npua, nab, ntses, noog puavleej yog tej tsiaj uas lwm haivneeg pheej siv los fij rau lawv tej vajtswv. Tiamsis, qhov tseemceeb uas tus Tswv qhia txog tej tsiaj huv thiab tsis huv no, yog Vajtswv xav kom nws haivneeg muaj lubneej txawv lwm haivneeg ibncig, thiab qhov uas ua raws tej kevcai no yog ua rau lwm tus pom hais tias tus Tswv haivneeg niaj hnub saib qhov uas ua raws tus Tswv siabnyiam ua qhov tseemceeb hauv lawv lubneej. Tus Tswv haivneeg yuav tsum nco ntsoov hais tias: “rau qhov nej yog tus TSWV uas yog nej tus Vajtswv haivneeg; nej yog nws tug” (nqe 21c).
Niaj hnub nimno, peb tsis raug qhuab yuam ua raws tej kevcai ntsistxog tej khoom noj no lawm. Tiamsis saib los rau tej khoom noj uas muaj ntau ntau yam niaj hnub nimno, peb kuj yuav tsum muaj tswvyim los xaiv tej khoom noj uas ua rau peb muaj kev noj qab nyob zoo. Thiab qhov tseemceeb heev dua uas peb yuav tsum xav txog yog peb kev noj kev haus ntawd yuav tsum ua rau tus Tswv tau koobmeej (I.Kauleethaus 10:31). Peb yuav tsum qhia tshwm kev ua tus Tswv tsaug vim Nws hlub thiab ncajncees, pub rau peb muaj khoom noj yug peb txojsia txhua hnub. Tsis tas li ntawd xwb, peb kuj yuav tsum nco ntsoov hais tias peb yog tus Tswv haivneeg dawbhuv, Nws tsis yog tsuas samhawm peb coj tej kevcai loj loj xwb, tiamsis Nws kuj txhawjxeeb txog tej yam loj me hauv peb lubneej txhua hnub, vim dhau ntawd yuav ua rau coob tug pom tus Tswv lub koob npe thiab los ntseeg Nws.
Peb kev noj kev haus puas ua rau tus Tswv tau koobmeej?
Thov Vajtswv
Vajtswv, nyuam yaus ua Koj tsaug vim Koj pub rau nyuam yaus muaj noj txhua hnub. Thov qhia nyuam yaus paub ua Koj tsaug, thiab paub txhawjxeeb txog nyuam yaus kev noj haus kom ua rau Koj tau koobmeej. Amees.
Nyeem Vajluskub peb lub xyoos: Ntawv Nkauj 22:27-24:10
Tshooj Youtube BHKTHN: https://www.youtube.com/c/bhkthn
