Klei Aê Diê Blŭ: Klei Mtô Mñă Klei Bhiăn 14:3-21
Êlan kliăng: “Snăn thâodah diih ƀơ̆ng huă mnăm, amâodah ya klei diih ngă, ngă bĕ jih čiăng bi guh kơang kơ Aê Diê.” (I Kôrantô 10:31).
Klei êmuh ksiêm mĭn: Ya mta mnơ̆ng Aê Diê mtă kơ phung ƀuôn sang Ñu dưi ƀơ̆ng leh anăn amâo dưi ƀơ̆ng? Ya jing klei bi mbha mnơ̆ng doh leh anăn čhŏ? Si drei ba yua klei hriăm anei kơ drei pô?
Trăn Klei Aê Diê Blŭ anei čih kơ dŭm klei bhiăn kơ mnơ̆ng ƀơ̆ng grăp hruê phung ƀuôn sang Israel brei hlue ngă hlăm klei hdĭp. Mâo dua mta čĭm mơ̆ng dŭm hlô mnơ̆ng dưi mbha jing doh leh anăn čhŏ. Phung ƀuôn sang Aê Diê knŏng dưi ƀơ̆ng dŭm mta mnơ̆ng ƀơ̆ng doh.
Dŭm klei kčah kơ mnơ̆ng ƀơ̆ng anei năng ai ngă kơ drei dleh thâo săng ya ngă Aê Diê mbha snăn, hlăk êjai Khua Yang Yêsu bi hriăm klă drei amâo lŏ tŭ klei mgô̆ kyua klei kčah kơ mnơ̆ng ƀơ̆ng mơ̆ng nah êngao ba hlăm asei mlei ôh (Y‑Markôs 7:18-23). Khădah snăn, năng ai dưi thâo săng ƀiă êdi mâo dua mta phŭn Khua Yang Yêsu kčah snăn. Tal sa jing kơ klei suaih pral. Hlue si phung ksiêm hriăm mdrao mgŭn brei thâo, kđeh čĭm ŭn leh anăn dŭm mta čĭm ƀơ̆ng kđeh čĭm jing mnơ̆ng ƀơ̆ng srăng ba klei ruă. Hĭn mơh, hlăm êlan 21, Aê Diê ăt kăm phung ƀuôn sang Ñu amâo dưi ƀơ̆ng ôh hlô mnơ̆ng djiê hjăn, klei anei brei ƀuh Aê Diê mđing kơ klei suaih pral phung ƀuôn sang Ñu. Tal dua jing mta klei djŏ kơ klei đăo. Lu hlô mnơ̆ng amâo doh kăm brei ƀơ̆ng msĕ si ŭn, ala, dŭm mta kan, čĭm jing hlô mnơ̆ng djŏ tuôm kơ klei đăo mkăn leh anăn dŭm klei bhiăn myơr mnơ̆ng hdĭp mơ̆ng digơ̆. Khădah snăn, boh phŭn mơ̆ng klei kčah kơ mnơ̆ng doh leh anăn čhŏ anei jing Aê Diê čiăng kơ phung ƀuôn sang Ñu mâo sa hdră hdĭp mdê plah wah phung djuê ana mkăn riêng gah, leh anăn bruă hlue ngă dŭm klei kčah mtrŭn anei ăt kñăm đru kơ pô mkăn ƀuh phung ƀuôn sang Aê Diê dưm nanao klei Aê Diê čiăng jing mrô sa hlăm klei hdĭp pô. Phung ƀuôn sang Aê Diê hdơr nanao “kyuadah ih jing sa phung ƀuôn sang doh jăk kơ Yêhôwa Aê Diê ih” (êlan 21c).
Hruê anei, drei amâo mgô̆ hlue ngă klei kčah kơ mnơ̆ng ƀơ̆ng anei ôh. Ƀiădah hŏng mnơ̆ng ƀơ̆ng lu mta ară anei, brei drei ăt mâo klei thâo mĭn čiăng ruah mnơ̆ng ƀơ̆ng jăk kơ klei suaih pral pô. Leh anăn klei yuôm bhăn hĭn brei mđing jing klei huă ƀơ̆ng pô brei guh kơang Anăn Aê Diê (I Kôrantô 10:31). Brei drei bi êdah ai tiê bi mni kơ Aê Diê kyua klei pap leh anăn klei sĭt suôr Ñu hlăm bruă mkăp mnơ̆ng ƀơ̆ng rông hdĭp pô hlăm grăp hruê. Êngao anăn, brei drei ăt hdơr pô jing phung ƀuôn sang doh jăk kơ Aê Diê, Ñu amâo djŏ knŏng mâo klei bhiăn mtrŭn kơ phung ƀuôn sang Ñu ôh, ƀiădah Ñu ăt mđing kơ djăp mta hlăm knhuah hdĭp drei grăp hruê, kyua mơ̆ng anăn srăng bi êdah Anăn Aê Diê kơ lu mnuih thâo.
Klei drei huă mnăm bi guh kơang Anăn Aê Diê mơ̆?
Wah lač: Ơ Khua Yang, kâo bi mni lač jăk kơ Ih kyua Ih brei nanao kơ kâo djăp mnơ̆ng ƀơ̆ng huă grăp hruê. Akâo kơ Ih bi hriăm kâo thâo hdĭp hdơr knga kơ Ih, leh anăn akâo kơ Ih đru kâo thâo mđing kơ hdră huă mnăm pô čiăng hdĭp bi guh kơang Anăn Ih.
Dlăng klei Aê Diê Blŭ hlăm tlâo thŭn: Klei Mmuñ Hđăp 22:27-29; 23:1-6; 24:1-10
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm
Tơdah mâo klei blŭ mguôp, akâo kơ diih mơĭt hră hlăm gmail: radioelansitnik@gmail.com
Kênh Youtube BHKTHN:
