Pajlug 21:7-8
Nqe cim
“Cov neeg siab phem tej kev phem yuav ua rau lawv raug kev puastsuaj, rau qhov lawv ua tsis ncaj.”(Pajlug 21:7).
Lus nug rau sawvdaws xav:
– Tus neeg siab phem ua neej zoo li cas?
– Qhov xaus ntawm tus neeg phem zoo li cas?
– Tus neeg ua ncaj yuav tau txais txojkev kaj siab twg?
– Timthawj Paulus ntuas tus Tswv cov menyuam yuav tsum ua dabtsi kom ua tau lub neej haum tus Tswv siab txhua hnub?
Pajlug 21:7 hais khov kho hais tias, tus neeg siab phem yuav ris tej haujlwm txhaum uas nws ua. Nqe 7a qhia paub “Cov neeg siab phem tej kev phem yuav ua rau lawv raug kev puastsuaj.” Nqe no muaj lub ntsiab raws nraim li nqe: “cov neeg uas tsis ncaj yuav raug puastsuaj.”(Pajlug 11:3b). Lo lus “siab phem” tsis yog hais txog tus cwjpwm xyaum, ua phem xwb tiamsis tseem qhia tawm txojkev quab yuam, ua tsis ncaj, ua nruj rau lwm tus. Twb tsimnyog ua qhov ncaj, los lawv ua qhov phem; twb tsimnyog taug txojkev ncaj, kaj nrig los lawv xaiv taug txojkev “nkhaus”, tsaus ntuj nti. Tus uas sau Phau Ntawv Nkauj hais tias, “cov neeg ua phem tabtom taug txojkev puastsuaj.” (Phau Ntawv Nkauj 1:6b).
Qhov vimchiv ua rau cov neeg siab phem raug puastsuaj yog“lawv ua tsis ncaj”. Taug txojkev nkhaus, ua yam phem yog cov neeg phem tus yamntxwv. Lawv paub txojkev ncaj, dawbhuv tiamsis “tsis ua raws”, tsis taug txojkev ntawd. Tus Tswv hlub, qhia, ntuas kom cov neeg phem tig los taug txojkev ncaj tiamsis vim lawv lub siab tawv, cov neeg siab phem txiav txim siab tsis lees yuav tus Tswv thiab tsis ntseeg Nws. Nov yog cov neeg phem lub neej, lub siab tawv tawmtsam tus Tswv txojkev thiab lawv tsis paub hais tias qhov ntawd yog kev txhaum coj lawv mus raug txojkev puastsuaj!
Txawv cov neeg siab phem, “cov neeg uas tsis muaj txim txhaum ua qhov zoo.” (nqe 8b). Cov neeg tsis muaj txim txhaum taug txojkev ncaj. Nov yog cov uas ua lub neej haum tus Tswv siab: “Ua ncaj ua ncees thiab ua zoo, txaus tus Tswv siab dua coj tej khoom tuaj fij rau Nws.” (Pajlug 21:3). Thiab tus neeg uas ua ncaj thiab ua neej haum tus Tswv siab yuav tau nyob kaj siab lug hauv txojkev kaj siab uas tus Tswv pub.
Timthawj Paulus txhawb cov ntseeg lub zog, tom qab uas ntseeg Tswv Yexus lawm yuav tsum tso lub neej qub tseg los taug tus Tswv txojkev. Cia li vamkhom Vaj Ntsujplig hloov kev xav, ua qhov ncaj, ua neej dawbhuv hauv tus Tswv. Paulus sau li no: “Nej yuav tsum hloov dua siab tshiab. Nej yuav tsum muab lub siab tshiab los coj. Lub siab tshiab ntawd Vajtswv tsim zoo li Vajtswv tus yamntxwv, sawvdaws thiaj pom hais tias nej ua nej lub neej ncaj ncees thiab dawbhuv.” (Efexus 4:23-24). Thov tus Tswv pub rau peb txhua tus kom niaj hnub thov Vaj Ntsujplig coj kev, mloog Nws qhia ua qhov ncaj, ua haum tus Tswv siab txhua hnub. Nqi zog rau tus neeg tshiab hauv tus Tswv tsis yog tau koob hmoov tiam no xwb tiamsis nyob mus ibtxhis.
Thov Vajtswv,
Tus Tswv, thov Koj zam txim rau nyuam yaus vim nyuam yaus tau ua txhaum, ua qhov tsis ncaj. Thov Vaj Ntsujplig pub dag zog peevxwm, lub siab tawv kom nyuam yaus tso tau tej kev txhaum mus, ua neej rau tus Tswv. Nyuam yaus tuav Tswv Yexus lub npe thov, Amees.
Puas muaj yam haujlwm dabtsi uas peb ua tsis ncaj cheemtsum Vaj Ntsujplig pab peb hloov mus?
Nyeem Vajluskub hauv peb lub xyoo: Khiavdim 16
Kênh Youtube BHKTHN:
