Kalatias 3:21-29
Nqe cim:
“Yog li ntawd, Vajtswv txoj kevcai zoo ib yam li tus uas saib xyuas peb los txog lub sijhawm uas Yexus Khetos los, Vajtswv thiaj suav hais tias peb txhua tus uas ntseeg yog neeg ncaj ncees.” (Kalatias 3:24)
Lus nug rau sawvdaws xav:
– Timthawj Paulus muab lub luag haujlwm ntawm txoj kevcai piv rau leejtwg lub luag haujlwm?
– Lub luag haujlwm ntawd hloov licas ua ntej thiab tomqab txojkev ntseeg los txog?
– Tej yam uas ib tug tibneeg tau dhau ntawm txojkev ntseeg Tus Cawmseej yog dabtsi?
– Peb pheej ua raws tus Tswv tej lus hauv Vajluskub vim dabtsi?
Txuas ntxiv rau lo lus nug vim licas muaj txoj kevcai (Kalatias 3:19-20), Timthawj Paulus muab tus kheej txawb rau cov neeg Kalatias txojkev xav, nws nug hais tias: Puas yog Vajtswv txoj kevcai tawmtsam Vajtswv lo lus cogtseg? Tsis hais nkhab nkhaus, nws teb kiag lo lus nug ntawd khov kho hais tias: “Yeej tsis yog li ntawd!” (nqe 21). Tomqab ntawd, nws siv ntau sijhawm los txhais txog lub luag haujlwm ntawm txoj kevcai. Nws siv ob ntu sijhawm los hais txog lub luag haujlwm ntawd: “Ua ntej uas txojkev ntseeg tsis tau los” thiab “nimno txojkev ntseeg twb los lawm” (nqe 23, 25 HMOWSV). Ua ntej uas txojkev ntseeg tsis tau los, txoj kevcai lub luag haujlwm yog ua yam “khi” thiab ua “tus saibxyuas” (nqe 22-24), txhais hais tias ua “tus coj lossis tus saib xyuas”.
Saib raws kevcai lischoj, nyob rau Timthawj Paulus tiam, thiab nyob rau peb tiam no, tej menyuam yeej tsis tau muaj txaus cai lossis txaus peevxwm txais tej qub txeeg qub teg mus txog thaum lawv hlob tiav txaus hnubnyoog. Thaum tsis tau txaus xyoo, tus menyuam ntawd yuav tsum nyob qab tswjhwm ntawm tus saibxyuas (Kalatias 4:1-2). Ib yam nkaus li ntawd, thaum “txojkev ntseeg twb los lawm”, cov uas cia siab rau tus Cawmseej yuav zoo li tus menyuam uas hlob tiav lawm, lawv yog “Vajtswv cov menyuam”, “coj tau tus yam ntxwv zoo ib yam li Yexus Khetos tus”, thiab yog “Anplahas cov xeebntxwv” (nqe 24-29), lawv tsis nyob hauv qab tswjhwm ntawm txoj kevcai ntxiv lawm (nqe 26-29). Txoj kevcai lub luag haujlwm ua “tus uas saib xyuas peb los txog lub sijhawm uas Yexus Khetos los” twb xaus lawm.
Muaj ntau tes haujlwm zoo tshwm muaj hauv tus ntseeg lubneej twb yog vim muaj kev pauv hloov thaum lawv los ntseeg tus Tswv, tiamsis peb pheej xav muab tej haujlwm zoo ntawd los ua lub homphiaj kawg thiab ua txoj haukev pab kom txais tau kev cawmdim, dhau los ua yam uas peb nrhiav hauv lubneej. Ua raws tus Tswv txoj kevcai, ua neej ncaj ncees, ua tus Tswv haujlwm kom zoo,… puavleej yog yam cheemtsum thiab zoo kawg li. Tiamsis, yog tsuas ua li ntawd xwb, ces peb yuav zoo li tus tijlaug nyob hauv zaj pivtxwv txog tus tub loj leeb, nws hais tias: “kuv ua haujlwm rau koj ib yam li tus qhev tau ntau xyoo, kuv tsis tau tawv koj ib zaug li”, nws saib tus kheej zoo li ib tug qhev hauv nws lub tsev, vim xav hais tias “ib tug nyuag menyuam tshis los koj twb tsis muab rau kuv”. Peb hnov cuag li tsis muaj kev ncaj ncees rau tus tijlaug, vim peb hnov qab Leej Txiv tej lus hais tias: “txhua yam uas kuv muaj puavleej yog koj li” (Lukas 15:29-31). Peb twb muaj cai li tus neeg hlob tiav los txais tus kheej tej qub txeeg qub teg lawm tiamsis peb tseem ho xav nyob hauv tus saibxyuas kev khi thiab tswjhwm. Vajtswv cov menyuam yuav tsum ua neej hauv kev xav hais tias “nimno txojkev ntseeg twb los lawm.”
Thov Vajtswv,
Tus Tswv, zoo siab kawg li thaum paub hais tias nyuam yaus tabtom nyob rau tiam kev ntseeg thiab txoj koob hmoov, tau dim ntawm txoj kevcai kev tswjhwm, kom nyuam yaus tau txais Koj tej qub txeeg qub teg cawmdim thiab kev npluanuj tsis paub xaus. Nyuam yaus tuav Yexus Khetos lub npe thov, Amees.
Peb tabtom ua lubneej ntseeg los ntawm tus cwjpwm nyob ua ntej lossis tomqab txoj kev ntseeg los? Peb yuav tsum pauv hloov yam dabtsi hauv tus kheej tej kev xav thiab kev ua neej?
Nyeem Vajluskub hauv peb lub xyoos: II Vajntxwv 15
Kênh Youtube BHKTHN:
