Klei Aê Diê Blŭ: Galati 3:21-29
Êlan kliăng: “Snăn klei bhiăn jing msĕ si pô răng kriê atăt drei tơl Krist truh, čiăng kơ drei dưi mâo klei yap kpă hŏng klei đăo.” (Galati 3:24)
Klei êmuh ksiêm mĭn: Khua ƀĭng kna Y-Pôl bi msĕ bruă klam klei bhiăn hŏng bruă klam hlei pô? Si bruă klam anăn bi mlih êlâo leh anăn tơdah klei đăo truh leh? Ya klei sa čô mnuih mâo mơ̆ng klei đăo hlăm Khua Yang Pô Bi Mtlaih? Ya klei mtrŭt drei khăng gưt hlue klei Khua Yang mtô hlăm Klei Aê Diê Blŭ?
Lŏ čuê êlan êmuh ya ngă mâo klei bhiăn (Galati 3:19-20), Khua ƀĭng kna Y-Pôl dưm ñu pô jing mnuih Galati čiăng mâo klei êmuh: Snăn klei bhiăn bi kdơ̆ng hŏng klei Aê Diê ƀuăn mơ̆? Amâo lŏ blŭ dar ôh, ñu wĭt lač klei êmuh anăn hŏng sa klei bi mklă sĭt: “Hơăi, amâo djŏ ôh!” (êlan 21). Leh anăn, ñu pioh lu mmông hĭn čiăng mblang kơ bruă klam klei bhiăn. Ñu yua dua wưng mmông čiăng lač kơ bruă klam anăn: “êlâo kơ klei đăo truh” leh anăn “tơdah klei đăo truh leh” (êlan 23, 25). Êlâo kơ klei đăo truh, klei bhiăn mâo bruă klam “pô răng kriê”, “pô mtô kiă kriê” (êlan 22-24) jing “pô atăt êlan, pô kiă kriê”.
Ksiêm dlăng hlăm bruă klei bhiăn, hlăm ênuk Khua ƀĭng kna Y-Pôl, leh anăn ăt hlăm ênuk drei, anak čô amâo mâo ôh djăp ênŭm klei dưi klei bhiăn amâodah klei dưi dưn tơl truh kơ thŭn jing mnuih prŏng. Êlâo kơ thŭn anăn, anak anăn brei dôk ti gŭ klei dưi mơ̆ng pô kiă kriê (Galati 4:1-2). Ăt snăn mơh, “tơdah klei đăo truh leh”, phung dưm klei đăo hlăm Yang Krist msĕ si sa čô anak truh thŭn hriê kơ prŏng, jing leh “Anak êkei Aê Diê”, “hơô leh Krist yơh”, jing leh “anak čô Y-Abraham” (êlan 24-29), pô anăn amâo lŏ dôk ti gŭ klei dưi mơ̆ng klei bhiăn ôh (êlan 26-29). Bruă klam “răng kriê” leh anăn “atăt drei tơl Krist truh” mơ̆ng klei bhiăn mjưh dei leh.
Mâo lu bruă ngă jăk leh anăn klei mĭn jăk hlăm klei hdĭp phung đăo jing boh tŭ mơ̆ng klei bi mlih leh đăo kơ Khua Yang, ƀiădah drei mâo klei knăl bi mlih klei anăn jing klei kñăm yuôm bhăn, jing hdră čiăng mâo klei bi mtlaih, jing klei drei tui tiŏ. Gưt klei Khua Yang mtă, hdĭp kpă ênô, mă bruă kơ Khua Yang hŏng jih ai tiê… jih jang čiăng sơăi leh anăn jăk. Khădah snăn, drei srăng msĕ si sa čô ayŏng khua hlăm klei yăl dliê kơ anak êkei klah đuĕ, “đru bruă ama ñu sui thŭn leh, ka tuôm gao asăp ama mtă ôh” hŏng kơhưm sa čô dĭng buăl sĭt suôr hlăm sang pô mtam, kyuadah lač “amâo tuôm brei ôh sa drei êđai bê kơ kâo”. Drei ƀuh amâo mtăp mđơr ôh kyua drei wơr hĕ “jih jang mnơ̆ng ama mâo jing mnơ̆ng anak” (Y-Luk 15:29-31). Drei mâo klei êngiê mơ̆ng sa čô mnuih prŏng čiăng dưi dưn ngăn drăp pô ƀiădah lŏ čiăng dôk ti gŭ klei kiă kriê leh anăn klei kăp ksiêm mơ̆ng pô răng kriê. Phung anak Aê Diê brei hdĭp hlăm ai tiê “klei đăo truh leh”
Drei dôk hdĭp klei hdĭp phung đăo kơ Krist hŏng ai tiê êlâo amâodah leh klei đăo truh? Ya klei brei drei bi mlih hlăm klei mĭn leh anăn klei hdĭp pô?
Wah lač: Ơ Khua Yang, yuôm bhăn snăk tơdah hmei dưi hdĭp hlăm ênuk klei đăo leh anăn klei pap, dưi tlaih mơ̆ng klei bhiăn răng kriê, čiăng hmei mâo klei êngiê mơak dưi dưn ngăn klei bi mtlaih leh anăn klei mdrŏng sah prŏng snăk mơ̆ng Ih. Kâo wah lač hlăm Anăn Khua Yang Yêsu Krist, Amen.
Dlăng Klei Aê Diê Blŭ hlăm tlâo thŭn: II Bruă Mtao 15
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm.
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
