Loos 12:1-2
Nqe cim:
“Nej tsis txhob ua nej lub neej zoo li tej neeg ntiajteb ua, tiamsis nej yuav tsum cia Vajtswv hloov nej lub siab kom nej muaj lub siab tshiab. Nej thiaj yuav paub ua raws li Vajtswv lub siab nyiam. Yog nej ua li ntawd, nej thiaj paub ua qhov zoo, ua haum Vajtswv siab thiab paub ua zoo kawg nkaus.” (Loos 12:2)
Lus nug rau sawvdaws xav:
– Vim licas tus ntseeg Yexus yuav tsum ua neej txawv neeg ntiajteb kev xav?
– Pauv hloov kev xav yuav tau dabtsi?
– Peb yuav tsum ua dabtsi thiaj yuav tiv dhau kev sim siab thaum ua neej ntseeg hauv lub ntiajteb?
Timthawj Paulus nqua hu tus Tswv cov menyuam muab tus kheej lubcev ua khoom fij, tsis yog mus ua ib pawg tshauv li tej khoom hlawv fij tiamsis yog ua ib lub neej tshiab rau tus Tswv thiab ua neej ntseeg nrog neeg ntiajteb. Xav kom ua tau li ntawd, yuav tsum “txhob ua raws li neeg ntiajteb ua” lossis “txhob yoog raws li tej neeg tiam no ua”. “Tej neeg tiam no ua ” muaj lub ntsiab hais tias ua raws li Xatas tswjhwm (II Kauleethaus 4:4; I Yauhas 5:19). Kev noj nyob ntawm tus Tswv cov menyuam yuav tsum tau pauv hloov huv tibsi, ntawd yog kev hloov pauv nyob hauv nruab siab, kev xav sab hauv, yog xyaum ua lub neej dawbhuv zuj zus los ntawm Vaj Ntsujplig lub hwjchim (Loos 8:13). Kev xav tau pauv hloov yuav pab peb ua qhov zoo, ua haum Vajtswv siab thiab paub ua zoo kawg nkaus. Ntawd yog ib qhov kev sim siab uas tus Tswv cov menyuam txhua tus yuav tsum hla dhau yog hais tias xav pehawm haum tus Tswv siab.
Hloov kev xav yog ua neej txawv neeg ntiajteb, muaj kev xav txawv, kev ua neej txawv lwm tus. Twb yog vim peb kev xav txawv neeg ntiajteb kev xav, peb thiaj ntsib ntau yam kev sim siab thiab kev nyuaj siab: xws li raug thuam, raug ntxub, raug tsimtxom, vim “Nimno cov uas tsis ntseeg Vajtswv lawv xav tsis thoob, xyov ua li cas nej tsis nrog lawv mus ua phem ua qias, yog li ntawd lawv thiaj thuam nej” (I Petus 4:4). Tiamsis, Timthawj Paulus qhia hais tias, yog peb kam ua neej txawv neeg ntiajteb ces peb yuav paub “ua qhov zoo, ua haum Vajtswv siab thiab paub ua zoo kawg nkaus”. Pivtxwv yog peb tsis ua haujlwm Hnub So lossis tsis mus noj haus qw ua nqaj ua nqug thiab tsis ua plees ua yis… Ces peb yoojyim raug lwm tus muab tshem tawm tiamsis paub tseeb hais tias peb yuav tau txais kev kaj siab thiab tau Vajtswv txaus siab. Tswv Yexus kuj qhia rau peb paub vimchiv peb raug luag ntxub hais tias: “…tiamsis nej tsis nyiam ua raws li neeg ntiajteb ua, rau qhov kuv twb xaiv nej tawm hauv lub ntiajteb no lawm; yog li ntawd, neeg ntiajteb thiaj li ntxub nej” (Yauhas 15:19). Tus Tswv xav kom peb totaub hais tias vim licas ua neej txawv neeg ntiajteb, peb yuav raug luag thuam, luag ntxub. Nws qhia kom peb txhob xav tsis thoob thaum raug luag ntxub, thiab pab peb muaj lub zog tiv dhau tej kev sim siab hauv lubneej thiab muab siab npuab Nws.
Yog li ntawd, yuav kom ua tau lub neej ntseeg nrog neeg ntiajteb ces yuav tsum vamkhom Vaj Ntsujplig pauv hloov txojkev xav, tsis ua neej li neeg ntiajteb tiamsis txaus siab hlo ua lubneej txawv. Tiv dhau kev sim siab thaum ua neej ntseeg nrog neeg ntiajteb, peb yuav feebmeej tau qhov twg yog qhov zoo, qhov haum Vajtswv siab thiab paub ua zoo kawg nkaus. Cia li ua lubneej txawv neeg ntiajteb!
Thov Vajtswv,
Tus Tswv, thov hloov nyuam yaus lub siab xav, pab nyuam yaus ua neej rau Koj, tsis yog ua li neeg ntiajteb tiamsis ua raws Koj siab nyiam. Thov pab nyuam yaus tiv dhau kev sim siab kom ua tau lubneej ntseeg nrog neeg ntiajteb, coj Koj txoj koob hmoov mus pub lwm tus ibncig. Nyuam yaus tuav Yexus Khetos lub npe thov, Amees.
Yam dabtsi pab peb tiv dhau kev sim siab hauv lubneej kom ua tau lubneej ntseeg nrog neeg ntiajteb?
Nyeem Vajluskub hauv peb lub xyoos: II Kevcai 6
Kênh Youtube BHKTHN:
