Klei Aê Diê Blŭ: Rôm 12:1-2
Êlan kliăng: “Đăm jing msĕ si phung ênuk anei ôh, ƀiădah brei Aê Diê bi mlih klei hdĭp diih hŏng klei Ñu lŏ bi mrâo klei mĭn diih, čiăng kơ diih dưi thâo ya jing klei Aê Diê čiăng jăk, mơak, leh anăn klă.” (Rôm 12:2)
Klei êmuh ksiêm mĭn: Si ngă brei phung đăo kơ Krist hdĭp mdê hŏng klei mĭn phung ênuk anei? Bi mlih klei mĭn srăng ba hriê ya mta klei? Ya klei brei drei ngă čiăng dưi găn gao klei lông dlăng tơdah hdĭp klei hdĭp đăo ti krah lăn ala anei?
Khua ƀĭng kna Y-Pôl iêô mthưr phung anak ƀuôn sang Aê Diê myơr asei mlei pô jing mnơ̆ng ngă yang, ƀiădah amâo djŏ jing hbâo msĕ si mnơ̆ng myơr čuh ôh, ƀiădah kñăm mjing sa klei hdĭp mrâo pioh hjăn kơ Khua Yang leh anăn hdĭp klei hdĭp đăo ti krah lăn ala. Čiăng dưi msĕ snăn, brei ñĕ đuĕ hĕ đăm jing msĕ si phung ênuk anei ôh. “Phung ênuk anei” čiăng lač kơ êlan bhiăn ênoh yuôm knhuah kpă dôk ti gŭ klei kiă kriê mơ̆ng Satan (II Kôrantô 4:4; I Y-Yôhan 5:19). Êlan hdră dôk dơ̆ng ƀơ̆ng huă phung anak ƀuôn sang Aê Diê brei mâo klei bi mlih dơ̆ng mơ̆ng phŭn agha, anăn jing bi mlih dơ̆ng mơ̆ng klei mĭn, mơ̆ng ai tiê hlăm lam, jing knhuang mjing doh jăk kluôm jih klei hdĭp hŏng klei myang Yang Mngăt Jăk (Rôm 8:13). Klei mĭn mâo klei bi mlih đru drei thâo kral klei Aê Diê čiăng jăk, mơak leh anăn klă. Anăn jing sa klei lông dlăng kơ grăp čô anak ƀuôn sang Aê Diê brei găn gao tơdah čiăng kkuh mpŭ kơ Aê Diê hŏng klei djŏ.
Bi mlih klei mĭn jing hdĭp mdê hŏng lăn ala, mâo klei bi mĭn amâodah êlan bhiăn mĭn mdê hŏng lăn ala. Kyuadah êlan bhiăn mĭn drei mdê hŏng lăn ala anăn yơh, drei srăng tlă anăp hŏng klei lông dlăng leh anăn klei dleh dlan mơ̆ng ƀuôn sang: tŭ klei arăng tlao mưč, bi êmut, ngă jhat, kyuadah “Diñu bi kngăr kyuadah ară anei diih amâo tui hlue ôh diñu hlăm klei ngă jhat msĕ snăn, leh anăn diñu blŭ klei jhat kơ diih.” (I Y-Pêtrôs 4:4). Ƀiădah lĕ, khua ƀĭng kna Y-Pôl brei thâo, tơdah drei jhŏng hdĭp mdê hŏng lăn ala, snăn drei srăng bi knal “klei Aê Diê čiăng jăk, mơak leh anăn klă”. Bi tơdah hngah klei ngă bruă thiăm hruê kjuh amâodah hngah ƀơ̆ng mnăm kpiê sei leh anăn hngah ngă klei knhông čhŏ mrŏ… năng ai arăng srăng lui drei kyua hdĭp mdê, ƀiădah sĭt nik drei srăng bi knal klei êđăp ênang leh anăn bi mơak kơ Aê Diê. Khua Yang Yêsu ăt brei thâo mơh phŭn knhal arăng bi êmut kơ drei mung mang: “… Ƀiădah kyuadah diih amâo jing ôh phung lăn ala, Kâo ruah leh diih mơ̆ng lăn ala, kyuanăn lăn ala bi êmut kơ diih.” (Y-Yôhan 15:19). Khua Yang brei drei thâo săng ya ngă hdĭp mdê hŏng lăn ala, drei srăng tŭ klei arăng tlao mưč, bi êmut. Khua Yang mtô lač čiăng kơ drei đăm bi kngăr ôh tơdah lăn ala bi êmut, mbĭt anăn čiăng đru drei mâo klei mtrŭt dưi găn gao klei lông dlăng hlăm ƀuôn sang leh anăn sĭt suôr tui hlue Khua Yang.
Kyuanăn, čiăng hdĭp klei hdĭp đăo ti krah lăn ala brei drei knang kơ Yang Mngăt Jăk bi mlih mrâo klei mĭn drei, amâo hdĭp tui si lăn ala anei ôh, ƀiădah hmiêt mkăp hdĭp mdê. Găn gao klei lông dlăng čiăng hdĭp klei hdĭp đăo ti krah lăn ala, drei srăng bi klhak čiăng dưi thâo ya jing klei Aê Diê čiăng jăk, mơak leh anăn klă kơ klei hdĭp drei. Hdĭp mdê bĕ!
Si ênhă êlan đru drei dưi găn gao klei lông dlăng hlăm klei hdĭp čiăng hdĭp klei hdĭp đăo ti krah lăn ala?
Wah lač: Ơ Khua Yang, akâo Ih bi mlih mrâo klei mĭn kâo, đru kâo hdĭp kơ Ih amâo djŏ msĕ si hdră êlan lăn ala ôh ƀiădah tui si êlan Khua Yang čiăng. Akâo Ih brei kâo dưi găn gao klei lông dlăng čiăng dưi hdĭp klei hdĭp đăo ti krah lăn ala, bi lar klei jăk jĭn Khua Yang kơ phung riêng gah. Kâo wah lač hlăm Anăn Khua Yang Yêsu Krist, Amen.
Dlăng Klei Aê Diê Blŭ hlăm tlâo thŭn: Klei Mtô Mñă Klei Bhiăn 6
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
