Loos 15:1-7
Nqe cim:
“Nej ib leeg yuav tsum zoo siab hlo txais tos ib leeg, ib yam li Yexus Khetos tau txais yuav nej. Yog nej ua li ntawd, Vajtswv yuav tau koob meej.” (Loos 15:7)
Lug nug rau sawvdaws xav:
– Cov uas muaj kev ntseeg ruaj thiab cov uas muaj kev ntseeg tsawg hauv Pawg Ntseeg yog leejtwg?
– Tus Tswv cov menyuam yuav tsum ua neej zoo licas?
– Qhov uas peb ib leeg txais tos ib leeg muaj qabhau dabtsi rau peb kev ua haujlwm hauv Pawg Ntseeg thiab tus Tswv lub koob npe?
Ntu Vajluskub no txuas ntxiv Loos tshooj 14, thaum ntawd Pawg Ntseeg Loos tabtom muaj kev sibcav txog tej yam uas tsis yog tej kevcai tseemceeb ntsigtxog txojkev cawmdim, tej no Vajluskub tsis txwv, kuj tsis hais kom yuav tsum ua raws. Hais txog kev noj haus, cov uas muaj kev ntseeg loj saib txhua yam zaub mov puavleej huv, lawv thiaj noj haus ywjpheej; tshuav cov uas muaj kev ntseeg tsawg ces coj raws txojcai ntsigtxog tej zaub mov huv thiab tsis huv hauv Vajluskub Qub, thiab lawv tsis kam noj tej nqaij muag tom tej kiab khw vim ntshai tsam tej ntawd muab fij rau dab lawm. Hais txog caijnyoog, muaj neeg hais tias hnub no zoo dua hnub tod, tshuav lwm tus ho hais tias txhua hnub puavleej zoo ib yam xwb. Tagnrho ob pab neeg no puavleej yog tus Tswv cov menyuam thiab kuj yog vim tus Tswv lawv thiaj ua raws li kev xav hauv nruab siab taw qhia. Tej teebmeem tsis sib haum saum no ntau tsawg los yeej cuam tshuam txog kev ua tus Tswv haujlwm thiab kev sib pab hauv Pawg Ntseeg. Vajtswv Txojlus qhia kom ob pab neeg no txhob sib thuam thiab txhob sib txiav txim, vim tsuas yog tus Tswv thiaj muaj cai txiav txim rau tus Tswv cov menyuam txhua tus raws li tej uas lawv ua (Loos 14:10-12).
Qhibthawj tshooj 15, hais txog qhov zoo, Timthawj Paulus qhuab ntuas cov uas muaj kev ntseeg loj tsis txhob tsuas ua haum tus kheej siab xwb tiamsis yuav tsum ua haum lwm tus siab thiaj yuav pab thiab txhawb tau lwm tus lub zog. Zoo li Tswv Yexus tus qauv, Nws muab tus kheej txo qis, los ua ib tug tubtxib tu thiab tuag txhiv tibneeg kev txhaum (Filipis 2:5-8). Dhau ntawm Tswv Yexus, Vajluskub kuj sau txog tej qauv zoo ntawm cov neeg txheej thaum ub, xws li Anplahas ua zoo rau nws tus xeebntxwv uas yog Lauj (Chivkeeb 13:8-9). Cov qauv zoo hauv Vajluskub pab peb ua taus siab ntev, txhawb peb lub zog ua neej nyob tamsim no thiab muaj kev cia siab rau yav tomntej (nqe 4).
Nyob hauv lub cuabyig, niam txiv thiab tej nus tej muam hlob pheej yeem poob ntau yam kom pab tau cov kwv tseem me loj hlob, ib yam nkaus li ntawd, hauv Pawg Ntseeg, cov ntseeg uas muaj kev ntseeg ruaj yuav tsum ua neej yeem poob ntau yam thiab ua siab ntev kom pab tau cov ntseeg uas muaj kev ntseeg tsawg tau loj hlob sab ntsujplig. Thaum txhua hom neeg hauv Pawg Ntseeg puavleej sib txais yuav zoo li ib lub cuabyig uas puv npo kev hlub ces txhua tus yuav muaj kev sib koom tes ua tus Tswv haujlwm; yog muaj kev sim siab sawvdaws yuav tiv taus los ntawm txojkev hlub, thiab tshaj txhua yam, yog qhov uas Vajtswv lub npe yuav nrov ncha hauv Pawg Ntseeg thiab hauv cov tsis tau ntseeg.
Thov tus Tswv pub rau peb ua neej sib haumxeeb hauv Pawg Ntseeg, ib leeg txais yuav ib leeg, cov uas muaj kev ntseeg ruaj txaus siab hlo txo hwjchim thiab pab cov uas muaj kev ntseeg tsawg, sawvdaws yuav hla dhau txhua yam dawm kev, ua haujlwm sib pab thiab koom ua rau Vajtswv tau koobmeej.
Thov Vajtswv,
Tus Tswv uas muaj kev hlub, nyuam yaus nqhis nqhawv tau txais Koj tej koobhmoov nchuav los npluamias zoo li tej roj tsw qab muaj nqis nchuav los rau txhua hom neeg hauv Pawg Ntseeg thaum sawvdaws ua neej sib hlub, sib txais yuav thiab sib pab. Nyuam yaus tuav Yexus Khetos lub npe thov, Amees.
Ib tsoom cov mloog uas hmov thiab tshua,
Peb puas txaus siab yeem tso ntau yam tseg los sib pab, sib txhawb hauv Pawg Ntseeg?
Nyeem Vajluskub hauv peb lub xyoos: Ntawv Nkauj 20-21
Kênh Youtube BHKTHN:
