Klei Aê Diê Blŭ: Rôm 15:1-7
Êlan kliăng: “Snăn bi jum bĕ hdơ̆ng diih, msĕ si Krist jum leh diih, čiăng bi guh kơang kơ Aê Diê” (Rôm 15:7)
Klei êmuh ksiêm mĭn: Hlei pô jing phung ktang leh anăn phung awăt hlăm Phung Sang Aê Diê? Si brei phung anak ƀuôn sang Aê Diê dôk hdĭp hdơ̆ng pô? Ya klei bi hmăi kơ klei mă bruă hlăm Phung Sang Aê Diê leh anăn kơ Anăn Aê Diê mơ̆ng klei drei thâo bi jum hdơ̆ng pô?
Trăn Klei Aê Diê Blŭ anei čuê mơ̆ng Rôm kdrêč 14, hlăk anăn Phung Sang Aê Diê Rôm dôk mâo klei bi tăng mgăl kơ đa mta klei amâo djŏ hŏng êlan klei đăo kơ klei bi mtlaih, đa mta klei hlăm Klei Aê Diê Blŭ amâo kăm ghă ôh ƀiădah ăt kăn mđar brei ngă hlue rei. Hlăm klei huă ƀơ̆ng mnăm, phung mnuih ktang yap jih jang mnơ̆ng ƀơ̆ng huă jing doh jăk sơăi, snăn diñu yua hŏng klei êngiê; bi phung mnuih awăt djă pioh klei bhiăn mnơ̆ng ƀơ̆ng huă doh leh anăn amâo doh tui si Klei Bi Mguôp Hđăp, leh anăn diñu amâo yua ôh čĭm arăng čhĭ ti sang čhĭ mnia, huĭdah čĭm anăn arăng ngă yang leh. Bi kơ hruê, mâo đa pô lač hruê anei jing jăk hĭn kơ hruê dih, bi đa pô lač jih jang hruê jing msĕ sơăi. Jih dua êpul anăn jing phung anak Aê Diê sơăi, leh anăn ăt kyua Khua Yang yơh diñu ngă tui si ai tiê kpă diñu. Jih klei bi tăng mgăl anăn ƀiă lu ăt bi hmăi mơh kơ klei mă bruă kơ Aê Diê leh anăn mă bruă kơ hdơ̆ng pô hlăm Phung Sang Aê Diê. Klei Aê Diê Blŭ mtô kơ jih dua êpul đăm bi mưč hdơ̆ng pô ôh leh anăn đăm phat kđi hdơ̆ng pô ôh, kyuadah knŏng Khua Yang yơh jing Pô mâo klei dưi phat kđi ksiêm dlăng bruă ngă grăp čô phung anak Ñu (Rôm 14:10-12).
Kčưm mŭt kdrêč 15, tĭng kơ klei mơak, Khua ƀĭng kna Y-Pôl mtă kơ phung ktang đăm knŏng bi mơak kơ pô ôh, ƀiădah brei bi mơak mơh kơ ayŏng amai adei pô, čiăng bi đru rŭ mdơ̆ng digơ̆. Msĕ si klei bi hmô mơ̆ng Khua Yang Yêsu, Ñu bi ti gŭ Ñu pô, hơô klei jing sa čô dĭng buăl čiăng mă bruă leh djiê brei kơ phung mnuih soh (Philip 2:5-8). Êngao kơ Khua Yang Yêsu, Klei Aê Diê Blŭ ăt čih mơh klei phung đưm găn leh, msĕ si klei Y-Abraham ngă jăk hŏng amuôn ñu Y-Lot (Klei Mphŭn Dơ̆ng 13:8-9). Lu rup bi hmô hlăm Klei Aê Diê Blŭ đru drei mâo klei gĭr leh anăn mâo klei bi mđĭ ai hlăm ênuk anei leh anăn wăt mâo klei čang hmăng jăk siam kơ ênuk êdei anăp (êlan 4).
Hlăm gŏ sang, amĭ ama leh anăn phung ayŏng amai prŏng leh khăng hdĭp săn asei mlei čiăng đru phung adei digơ̆ dưi đĭ hriê kơ prŏng, ăt msĕ snăn mơh, hlăm Phung Sang Aê Diê, phung đăo prŏng khue leh hlăm klei hdĭp mngăt brei hdĭp săn asei mlei leh anăn gĭr čiăng đru phung đăo adôk mda hlăm klei đăo dưi đĭ hriê kơ prŏng hlăm klei hdĭp mngăt. Hlăk jih jang hlăm Phung Sang Aê Diê thâo bi jum msĕ si sa boh gŏ sang bŏ hŏng klei thâo bi khăp, snăn yơh jih jang bi djă kngan hrăm mbĭt ngă bruă kơ Aê Diê, jih jang klei lông dlăng tơdah mâo, ăt srăng găn gao hŏng klei ênưih mơh, kyua klei khăp, leh anăn ti dlông hĭn kơ jih jang klei, Anăn Aê Diê mâo klei guh kơang ti krah Phung Sang Aê Diê leh anăn ti krah phung ka đăo.
Akâo Khua Yang brei drei dôk hdĭp êđăp ênang hlăm Phung Sang Aê Diê, thâo bi jum, phung ktang kăp săn asei leh anăn đru rŭ phung awăt, jih jang hrăm mbĭt găn gao jih klei bi kgăn, jih klei lông dlăng, čiăng mă bruă kơ Khua Yang, mă bruă kơ hdơ̆ng pô leh anăn hrăm mbĭt bi guh kơang Anăn Aê Diê.
Si ngă drei kăp săn asei mlei čiăng bi đru rŭ hdơ̆ng pô hlăm Phung Sang Aê Diê mơ̆?
Wah lač: Ơ Khua Yang Ama klei khăp, kâo mhao čiăng bi knal klei pap Khua Yang tuh êbeh dlai, msĕ si êa ƀâo mngưi tuh ti dlông jih jang grăp êpul mnuih hlăm Phung Sang Aê Diê tơdah hmei thâo bi khăp hdơ̆ng hmei, bi tŭ jum leh anăn bi đru hdơ̆ng hmei. Kâo wah lač hlăm Anăn Khua Yang Yêsu Krist, Amen.
Dlăng Klei Aê Diê Blŭ hlăm tlâo thŭn: Klei Mmuñ Hđăp 20-21
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm.
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
