II Kauleethaus 5:9-13
Nqe cim:
“rau qhov peb txhua tus yuav tsum mus sawv ntawm Yexus Khetos lub xubntiag. Nws yuav taug peb zaj thiab muab nqi zog rau txhua tus raws li tej haujlwm uas sawvdaws tau ua los lawm, thaum sawvdaws tseem ua neej nyob no, tsis hais ua zoo lossis ua phem” (II Kauleethaus 5:10).
Lus nug rau sawvdaws xav:
- Timthawj Paulus lub homphiaj ua neej nyob yog dab tsi?
- Vim li cas nws thiaj siv zog ua kom tiav li lub homphiaj ua neej ntawd?
- Vim li cas Timthawj Paulus “thiaj pheej ua kom lwm tus los ntseeg”?
- Peb tau qhuab ntuas li cas txog kev ua neej qhia tawm txog txoj Moo zoo?
Timthawj Paulus hais tias, nws lub homphiaj ua neej yog ua raws li Vajtswv lub siab nyiam, nws thiaj siv zog ua kom tau li ntawd. Paulus hais tias thaum kawg, txhua tus ntseeg“…yuav tsum mus sawv ntawm Yexus Khetos lub xubntiag. Nws yuav taug peb zaj thiab muab nqi zog rau txhua tus raws li tej haujlwm uas sawvdaws tau ua los lawm, thaum sawvdaws tseem ua neej nyob no, tsis hais ua zoo lossis ua phem” (nqe10). Ntawm no tsis yog hais txog kev txiav txim tiamsis yog hais txog mus txais nqi zog raws li nyias tes haujlwm tau ua los lawm. Peb tej haujlwm zoo ib yam li lub tsev uas muab kub, nyiaj, ntoo lossis quavnyab mus ua, tus Tswv muab hluavtaws los sim ces paub (I Kauleethaus 3:9-15).
Tus Tswv yuav taug cov ntseeg txhua tus zaj, muab nqi zog rau cov ntseeg uas ua zoo, tiamsis Paulus paub meej Vajtswv yog tus ncaj ncees thiab tsimnyog fwm (nqe 11), nws thiaj“…niaj hnub yaum sawvdaws los mloog Vajtswv lus”. Lossis muab hais ua lwm seem hais tias; Paulus paub meej cov tsis ntseeg txhua tus yuav rau Vajtswv txiav txim thaum kawg, nws xav kom txhua tus los lees ntseeg Tswv Yexus“…tus ntawd thiaj tau txojsia ntev dhawv mus ibtxhis. Nws yuav tsis raug txiav txim, rau qhov nws twb tawm hauv txojkev tuag los tau txojsia lawm” (Yauhas 5:24).
Timthawj Paulus kuj qhia hais tias, tej haujlwm qhia txoj Moo zoo uas nws thiab nws cov phoojywg siv zog ua Vajtswv yeej paub, rau qhov “…Vajtswv yeej paub peb txhua tus lub siab huv tibsi” (nqe 11b). Tej zaum muaj ib txhia neeg xav hais tias Paulus “khavtxiv” lossis “ua txuj”, yeej tsis yog li ntawd, Paulus ua haujlwm tas siab vim tus Tswv thiab vim tej uas tus Tswv txib kom ua. Yog li ntawd, Paulus kuj xav kom cov ntseeg paub txog nws thiab ua timkhawv rau cov neeg xav tsis zoo rau Paulus uas “nyiam saib neeg ntsejmuag xwb tsis saib neeg lub siab” (nqe 12b).
Yog hais tias cov ntseeg tsuas xav txog nyias tus kheej xwb, tsis kub siab qhia txoj Moo zoo rau cov neeg uas tsis tau los ntseeg ces yog cov neeg uas muaj lub siab qia dub. Thov Vajtswv pab kom peb muaj lub siab zoo ib yam li Timthawj Paulus, thaum paub Vajtswv yog tus uas paub txhua tus lub siab lawm, xyaum ua lub neej haum Vajtswv siab, coj txoj Moo zoo hais txog kev cawm dim mus qhia rau ntau tus hnov.
Thov Vajtswv
Vajtswv tus uas ncaj ncees, thiab tus uas tsimnyog fwm! Thov pab kom nyuam yaus nco ntsoov hais tias ib hnub yuav mus sawv ntawm koj lub xubntiag txais nqi zog, thaum tseem ua neej nyob nyuam yaus paub ua haum Koj siab, kub siab qhia txoj Moo zoo uas yog kev cawm dim rau lwm tus. Amees.
Peb lub homphiaj ua neej nyob yog dab tsi?
Nyeem Vajluskub hauv peb lub xyoo: Pajlug 29
Kênh Youtube BHKTHN:
