Klei Aê Diê Blŭ: II Kôrantô 5:9-13
Êlan kliăng: “Kyuadah jih jang drei srăng dôk ti anăp jhưng phat kđi Yang Krist, čiăng kơ grăp čô dưi mă tŭ tui si ñu ngă leh klei jăk amâodah klei jhat êjai ñu dôk hdĭp hlăm asei mlei anei” (II Kôrantô 5:10).
Klei êmuh ksiêm mĭn: Ya hdră kñăm hdĭp prŏng hĭn mơ̆ng Khua ƀĭng kna Y‑Pôl?Ya ngă ñu gĭr čiăng ngă hdră kñăm anăn?Ya ngă Khua ƀĭng kna Y‑Pôl “čiăng kơ grăp čô dưi mă tŭ” ? Ya klei mñă kơ drei brei hdĭp leh anăn si hiu hưn Klei Mrâo Mrang Jăk?
Khua ƀĭng kna Y‑Pôl brei thâo hdră kñăm prŏng hĭn hlăm klei hdĭp ñu jing wăt tơdah hdĭp amâodah djiê bi mơak kơ Aê Diê, kyua anăn ñu gĭr ktưn dưi mâo hdră kñăm anei. Ñu bi mklă truh hruê knhal tuč, jih jang phung đăo kơ Krist “…srăng dôk ti anăp jhưng phat kđi Yang Krist, čiăng kơ grăp čô dưi mă tŭ tui si ñu ngă leh klei jăk amâodah klei jhat êjai ñu dôk hdĭp hlăm asei mlei anei” (êlan 10). Anei amâo djŏ jing sang phat kđi čiăng bi kmhal ôh ƀiădah jing čiăng ksiêm dlăng pah mni hlue si bruă drei ngă. Brei drei mjing dlông tur drei ngă leh hŏng prăk mah, hŏng rơ̆k krô amâodah adrăng, pui sang phat kđi Krist srăng bi êdah bruă anăn (I Kôrantô 3:9‑15).
Anăn jing bruă ksiêm dlăng pah mni kơ phung ƀuôn sang Aê Diê, ƀiădah hŏng phung amâo đăo, Khua ƀĭng kna Y‑Pôl brei thâo Aê Diê jing sĭt suôr nanao leh anăn Ñu jing Pô năng huĭ mpŭ (êlan 11a) kyua anăn ñu hŏng phung mă bruă mbĭt gĭr duah hdră “…čiăng kơ grăp čô dưi mă tŭ”, amâodah lač mkăn kyua Khua ƀĭng kna Y‑Pôl thâo klă phung ka đăo srăng tlă anăp hŏng klei Aê Diê phat kđi hlăm hruê knhal tuč, kyua anăn ñu čang hmăng grăp čô mnuih thâo kral sơaĭ Khua Yang Yêsu čiăng “…mâo leh klei hdĭp hlŏng lar; ñu amâo srăng truh kơ klei phat kđi ôh, ƀiădah ñu găn leh klei djiê nao kơ klei hdĭp” (Y‑Yôhan 5:24).
Ñu lŏ brei thâo klei gĭr hlăm klei hdĭp ăt msĕ mơh hlăm bruă ñu hŏng phung mă bruă mbĭt hiu hưn Klei Mrâo Mrang Jăk snăn “…Aê Diê thâo kral leh si hmei jing” (êlan 11b). Năng ai phung amâo thâo săng ñu snăn lač ñu dôk “bi mđĭ ñu pô” amâodah “bi mđĭ ñu pô” ƀiădah hơăi, ñu jih ai tiê kyua Khua Yang leh anăn bruă Ñu jao, amâo djŏ ngă čiăng bi êdah klei dưi pô hŏng phung đăo ti Sang Aê Diê Kôrantô msĕ si phung ksiêm hriăm mgưt tuôm ngă leh ôh. Kyua anăn, ñu čang hmăng phung đăo tinei ăt thâo kral klei anăn, čiăng kơ diñu srăng lŏ hưn bi sĭt hŏng phung mâo klei mĭn jhat mčeh luar kơ ñu jing “phung bi mni kơ diñu pô tui si bi êdah ti êngao leh anăn amâo djŏ ôh tui si ai tiê diñu” (êlan 12b).
Tơdah phung đăo kơ Krist knŏng bi mĭn kơ ñu pô, amâo hur har hiu hưn Klei Mrâo Mrang Jăk kơ phung dôk soh jing hdĭp knŏng mĭn kơ pô. Akâo kơ Khua Yang đru drei hdĭp hlue si Khua ƀĭng kna Y‑Pôl, sĭt thâo kral Aê Diê jing Pô năng huĭ mpŭ snăn brei drei hdĭp răng kriê klei hdĭp bi mơak kơ Aê Diê leh anăn sĭt suôr hiu hưn klei Khua Yang bi mtlaih kơ lu mnuih.
Ya hdră kñăm prŏng hĭn hlăm klei hdĭp drei?
Wah lač: Ơ Aê Diê jing Pô sĭt suôr, Kpă Ênô leh anăn huĭ mpŭ! Akâo kơ Ih đru kâo hdơr nanao kâo srăng dôk ti anăp sang phat kđi Krist hlăm hruê knhal tuč čiăng dŭm hruê dôk hdĭp ti lăn ala anei kâo thâo prăp êmiêt ai tiê, leh anăn ƀrư̆ hur har hiu hưn Klei Mrâo Mrang Jăk kơ lu mnuih thâo leh anăn tŭ mă klei Aê Diê pap.
Dlăng Klei Aê Diê Blŭ hlăm tlâo thŭn: Klei Bi Hriêng 29:1‑27
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm
Tơdah mâo klei blŭ mguôp, akâo kơ diih mơĭt hră hlăm gmail: radioelansitnik@gmail.com
Kênh Youtube BHKTHN:
