Yakaunpaus 2:20-26
Nqe cim.
“Koj tsis pom los? Anplahas txojkev ntseeg thiab nws kev ua haujlwm mus ua ke. Nws tes haujlwm ua rau nws txojkev ntseeg tiav.” (Yakaunpaus 2:22)
Lus nug rau sawvdaws xav
– Yakaunpaus muab cov qauv twg hauv Vajluskub Qub los hais txog kev sib txuas ntawm kev ntseeg thiab kev ua haujlwm?
– Cov qauv no hais txog yam dabtsi?
– Peb tau cawm los ntawm kev ua haujlwm zoo lossis kev ntseeg?
Tomqab uas siv ntau sijhawm los hais txog txojkev ntseeg tuag, yog txojkev ntseeg uas tsis coj los tau kev cawmdim, Yakaunpaus muab lwm tus qauv los qhia rau cov ntseeg paub txog txojkev ntseeg ciaj sia yog zoo licas. Ob tug neeg nyob hauv Vajluskub Qub tau muab los hais txog yog Anplahas thiab tus pojniam npe hu ua Lahaj.
Anplahas tau ua ib teg haujlwm zoo kawg nkaus thaum muab nws tus tub Ixaj fij rau Vajtswv (nqe 21, saib ntxiv Chivkeeb 22). Nco ntsoov hais tias, zaj no tshwm muaj tomqab uas Anplahas qhia tshwm nws txojkev ntseeg ntev heev (saib Chivkeeb 15:6). Tej haujlwm muab Ixaj fij no qhia pom hais tias Anplahas mloog Vajtswv lus kawg siab kawg ntsws thaum txiav txim siab xaiv ua raws Vajtswv siabnyiam uas nyuaj ua heev no.
Tus qauv thib ob, yog tus pojniam npe hu ua Lahaj, nws yog ib tug niamntiav nyob hauv lub nroog Yelikaus. Ua ntej ntawd tus pojniam no twb paub txog tus Tswv uas muaj hwjchim loj thiab nws muaj sijhawm qhia tawm kev ntseeg dhau ntawm qhov uas kam “txais tos cov neeg soj tebchaws”. Vim qhov no, Lahaj tau suav hais tias ua “haum Vajtswv siab” (Yakaunpaus 2:25, saib ntxiv Yausuas 2). Tus uas sau tsab ntawv Henplais txhais hais tias, tus niamntiav Lahaj ua qhov no los ntawm “txojkev ntseeg” (Henplais 11:31).
Ob qhov sib thooj ntawm ob tug neeg no, yog nkawd puavleej paub Vajtswv, ntseeg Vajtswv ua ntej los lawm. Thiab thaum txog lub tsamthawj yuav tsum tau xaiv, nkawd thiaj yeem xaiv mloog Vajtswv lus, txawm paub tias qhov ntawd yuav ua rau tus kheej raug mob thiab raug poob ntau yam. Tej haujlwm no ua timkhawv qhia tias, nkawd muaj kev ntseeg tseeb.
Nyob hauv nqe 24, Yakaunpaus hais tias: “Nej thiaj pom hais tias tus uas Vajtswv coj los nrog Vajtswv sib rau zoo, tus ntawd yeej ua haujlwm, nws tsis yog tus uas ntseeg xwb.” Peb mloog zoo li qhov no hais tawmtsam Timthawj Paulus cov lus qhia hauv Efexus 2:8-9 hais tias, peb tau cawmdim los ntawm “txojkev hlub, thiab kev ntseeg” xwb, tsis yog los ntawm kev ua haujlwm zoo. Tiamsis yog peb saib tagnrho ntu Vajluskub, peb pom tias Yakaunpaus tabtom qhia txog lub ntsiab ntawm txojkev ntseeg ciaj sia. Ntawd yog txojkev ntseeg qhia tshwm dhau ntawm kev mloog lus, kev txiav txim siab tuaj tus Tswv tog thaum ntsib kev nyuaj siab. John Calvin, yog ib tug tub sab kev kawm txog Vajtswv xaus lus li no: “Peb tau kev cawm yog vim peb ntseeg, tiamsis kev ntseeg dim txim tsawg tsis tau kev ua haujlwm.” Yuav tsum hais khov kho tias peb dim yog vim peb ntseeg xwb tsis yog vim ua haujlwm. Tiamsis kev ntseeg dim txim yuav tsum qhia tawm sab nraud dhau ntawm kev ua neej thiab kev txiav txim siab mloog tus Tswv lus.
Thov Vajtswv,
Vajtswv, thov Koj pab kom nyuam yaus totaub txog kev ntseeg ciaj sia, txaus siab rau txojkev ntseeg uas nyuam yaus kawm paub. Thov Koj pab kom nyuam yaus ua tau lub neej mloog lus thiab ua tau siab tawv qhawv fij tus kheej rau Koj. Thov kom tej haujlwm ua hauv nyuam yaus lub neej ua tau timkhawv tias yog kev ntseeg tseeb, kev ntseeg dim txim, kev ntseeg ua rau Koj tau ntsejmuag. Nyuam yaus tuav Yexus Khetos lub npe thov, Amees.
Tej kev txiav txim siab, kev ua haujlwm ntawm peb puas paub tias yus tabtom muaj kev ntseeg ciaj sia lossis kev ntseeg tuag?
Nyeem Vajluskub hauv peb lub xyoos: Lukas 19
Kênh Youtube BHKTHN:
