Klei Aê Diê Blŭ: Y‑Yakơ 2:20‑26
Êlan kliăng: “Snăn ih ƀuh klei đăo bi êdah hlăm bruă ñu ngă, leh anăn hŏng bruă bi êdah klei đăo jing jăk klă leh” (Y‑Yakơ 2:22)
Klei êmuh ksiêm mĭn: Y‑Yakơ yua leh klei bi hmô kơ hlei pô hlăm Klei Bi Mguôp Hđăp čiăng lač kơ klei bi mguôp klei đăo leh anăn bruă ngă? Klei phung anei bi hmô lač kơ ya klei? Drei mâo klei bi mtlaih kyua bruă ngă amâodah klei đăo?
Leh pioh lu mmông čiăng lač kơ klei đăo djiê, jing klei đăo amâo ba klei bi mtlaih ôh, Y‑Yakơ lač kơ klei phung mkăn bi hmô čiăng đru kơ phung dlăng hră thâo săng si ngă jing klei đăo hdĭp. Dua čô hlăm Klei Bi Mguôp Hđăp ñu lač jing Y‑Abraham leh anăn H’Rahap.
Y‑Abraham mâo leh sa bruă ngă yuôm bhăn snăk tơdah ñu myơr anak ñu pô khăp snăk jing Y‑Isăk kơ Aê Diê (êlan 2, lŏ dlăng hlăm Klei Mphŭn Dơ̆ng 22). Brei mđing jing klei anei mâo sui snăk leh Y‑Abraham bi êdah klei đăo kơ Aê Diê (dlăng hlăm Klei Mphŭn Dơ̆ng 15:6). Klei myơr Y‑Isăk brei ƀuh Y‑Abraham gưt kluôm dhuôm kơ Aê Diê tơdah bi mklă klei ruah anei bŏ hŏng dleh dlan.
Klei bi hmô tal dua jing H’Rahap, hlăk jing mniê knhông hdĭp ti ƀuôn Yêrikô. Êlâo anăn ñu thâo kơ Yêhôwa jing prŏng prĭn leh anăn ñu mâo klei găl bi êdah klei đăo hlăm bruă ngă amâo uêñ kơ klei huĭ hyưt čiăng “drông phung dĭng ktang” mơ̆ng Israel. Kyua anăn, ñu “mâo klei yap kpă ” (Y‑Yakơ 2:25, dlăng thiăm hlăm Y‑Yôsuê 2). Pô čih hră Hêbrơ mblang H’Rahap ngă klei anei “kyua klei đăo” (Hêbrơ 11:31).
Klei msĕ dua čô anei jing diñu thâo kral leh Aê Diê, đăo kơ Aê Diê mơ̆ng sui leh. Leh anăn hlăm boh klei brei mâo klei ruah, diñu ruah gưt asăp Aê Diê, wăt tơdah bruă ngă anăn srăng ngă kơ diñu pô tŭ klei luč liê lu snăk. Dŭm bruă ngă anăn klă sĭt bi mklă diñu mâo sa klei đăo sĭt.
Hlăm êlan 24, Y‑Yakơ lač, “Snăn diih ƀuh arăng mâo klei yap kpă hŏng bruă, amâo djŏ knŏng hŏng klei đăo ôh”. Hmư̆ klei anei snăn bi mklăk hŏng klei Khua ƀĭng kna Y‑Pôl čih hlăm Êphêsô 2:8‑9 lač drei mâo klei bi mtlaih “kyua klei pap, kyua klei đăo” amâo djŏ kyua bruă ngă ôh. Khădah snăn, mơ̆ng klei čih hlăm jih trăn Klei Aê Diê Blŭ, klă sĭt Y‑Yakơ dôk čih kơ si ngă jing klei đăo hdĭp. Anăn jing klei đăo bi êdah bruă ngă gưt asăp, bi mklă dôk hŏng Aê Diê hlăm wưng dleh dlan. John Calvin, pô ksiêm hriăm mơ̆ng hdră Mkra mlih klah čŭn leh: “Drei mâo klei bi mtlaih knŏng kyua knŏng hjăn klei đăo, ƀiădah klei đăo bi mtlaih amâo dưi kƀah ôh bruă mă”. Brei bi mklă drei mâo klei bi mtlaih jing kyua klei đăo amâo djŏ kyua bruă ngă ôh. Ƀiădah klei bi mtlaih anăn brei bi êdah hlăm knuih hdĭp, hlăm klei bi mklă gưt asăp drei bi êdah.
Dŭm klei bi mklă, bruă drei ngă bi êdah drei dôk mâo klei đăo hdĭp mơ̆ amâodah hơăi?
Wah lač: Ơ Khua Yang, akâo kơ Ih đru kâo thâo săng kluôm kơ sa klei đăo hdĭp čiăng amâo mgao hŏng klei thâo kơ klei đăo pô ôh. Akâo kơ Ih đru kâo mâo klei hdĭp gưt asăp leh anăn jhŏng myơr klei hdĭp pô kơ Ih. Akâo kơ bruă jăk kâo ngă hlăm klei hdĭp pô jing bi êdah kơ klei đăo sĭt, klei đăo bi mtlaih, klei đăo myơr klei guh kơang kơ Ih. Kâo wah lač hlăm Anăn Khua Yang Yêsu Krist, Amen.
Dlăng Klei Aê Diê Blŭ hlăm tlâo thŭn: Y‑Luk 19
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm.
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
