II Thexalaunikes 3:1-5
Nqe cim:
“Cov kwvtij, thov nej niaj hnub thov Vajtswv pab peb kom peb muab siab rau qhia Vajtswv Txojlus. Vajtswv Txojlus thiaj yuav nrov ncha mus thoob plaws txhua qhov chaw, thiab muaj nqis rau sawvdaws ib yam li twb muaj nqis rau hauv nej lawm.” (II Thexalaunikes 3:1)
Lus nug rau sawvdaws xav:
– Timthawj Paulus nqua hu cov ntseeg Thexalaunikes ua dabtsi?
– Lawv yuav tsum ua licas txuas ntxiv kom lub neej yim hnub yim loj hlob thiab tawg paj txi txiv?
– Dhau zaj kawm no, peb tau qhuab ntuas yuav tsum ua dabtsi?
Tomqab tej lus txhawb cov ntseeg hauv Pawg Ntseeg Thexalaunikes kom cia siab ntsoov tos hnub tus Tswv rov los, Timthawj Paulus sau zog nws tej lus los ntawm lo lus nqua hu, “Cov kwvtij, thov nej niaj hnub thov Vajtswv pab peb kom peb muab siab rau qhia Vajtswv Txojlus. Vajtswv Txojlus thiaj yuav nrov ncha mus thoob plaws txhua qhov chaw, thiab muaj nqis rau sawvdaws ib yam li twb muaj nqis rau hauv nej lawm” (nqe 1). Txawm Timthawj Paulus thiab nws cov phoojywg yog cov tub xa Moo Zoo uas ua tau haujlwm heev, lawv tsim tsa ntau Pawg Ntseeg rau tus Tswv, los lawv yeej cheemtsum lwm tus tej lus thov Vajtswv pab. Nws zeem paub hais tias ua tus Tswv haujlwm ces yog nyob hauv pluav rog sab ntsujplig txaus ntshai heev ntawm tej ntsujplig phem uas qhov muag ntsia tsis pom (Efexus 6:12). Yog li ntawd, tus neeg ua tus Tswv haujlwm yuav tsum npaj txhij dhau ntawm tus kheej thiab cov ntseeg kev thov Vajtswv, thov pab kom “dim ntawm cov neeg siab phem thiab limhiam txhais tes, rau qhov yeej yuav muaj ibtxhia tsis ntseeg Vajtswv Txojlus” (nqe 2). Kev thov Vajtswv sib pab yuav ua rau Timthawj Paulus thiab pab neeg xa Moo Zoo muaj hwjchim ua haujlwm tawg paj txi txiv rau tus Tswv, zoo li lawv tau ua haujlwm tawg paj txi txiv hauv Thexalaunikes los lawm.
Thaum pom lawv txojkev ntseeg, Timthawj Paulus hais khov kho hais tias: “Tiamsis Vajtswv yog tus uas ncaj ncees, nws yuav txhawb nej lub zog thiab tsis pub dab Ntxwgnyoog ua phem rau nej” (nqe 3). Vim li ntawd, yuav kom Timthawj Paulus thiab nws cov phoojywg tsis poob siab, cov ntseeg Thexalaunikes yuav tsum ua raws li Timthawj Paulus tej lus qhia, coj lub neej raws nraim li Vajtswv Txojlus. Vaj Ntsujplig yuav coj lawv thiab lwm tus ntseeg lub siab nrhiav Vajtswv txojkev hlub thiab Tswv Yexus txoj kev ua siab ntev, kom tus Tswv cov menyuam txhua tus ua lubneej raws li Vajtswv Txojlus qhia los ntawm tus Tswv nplooj siab hlub thiab ua siab ntev. Txojkev ntseeg nrog rau lub neej loj hlob raws li Vajtswv Txojlus qhia los ntawm nplooj siab hlub thiab ua siab ntev yog txojhau kev pab kom cov ntseeg hauv Thexalaunikes thiab txhua tus ntseeg loj hlob sab ntsujplig thiab ua haujlwm tawg paj txi txiv rau tus Tswv.
Tus Tswv cov menyuam niaj hnub nimno kuj tau txhawb zog cia siab ntsoov rau tus Tswv, nyeem, kawm Vajtswv Txojlus txhua hnub kom loj hlob sab ntsujplig. Dab Ntxwsnyoog thiab cov neeg phem nrhiav kev tawmtsam peb, tiamsis cia li qab siab vim Vaj Ntsujplig yuav ntxiv zog tshiab rau peb kom xwv peb ua taus siab ntev txhua lub tsamthawj, kom xwv peb hlub lwm tus thiab ua haujlwm tawg paj txi txiv pub rau Nws. Txhua tus ntseeg Yexus txhob hnov qab thov Vajtswv rau tus kheej thiab thov pab lwm tus ntseeg kom peb muaj dag zog tshiab ua haujlwm tawg paj txi txiv pub rau tus Tswv.
Thov Vajtswv,
Tus Tswv uas hlub tshua, nyuam yaus paub tus kheej tej kev qaug zog. Thov Koj zam txim rau nyuam yaus txojkev ntseeg yau. Thov Vaj Ntsujplig pub dag zog tshiab kom nyuam yaus ncaj ncees ua raws Koj Txojlus thiab nco ntsoov thov Vajtswv pab lwm tus kom txhua tus ua haujlwm tawg paj txi txiv pub rau Koj. Nyuam yaus tuav Yexus Khetos lub npe thov, Amees.
Peb puas tabtom sawv ruaj hauv kev ntseeg, loj hlob sab ntsujplig txhua hnub kom tus Tswv tau siv thiab ua haujlwm tawg paj txi txiv pub rau Nws?
Nyeem Vajluskub hauv peb lub xyoos: II Kevcai 25
Kênh Youtube BHKTHN:
