Klei Aê Diê Blŭ: II Têsalônik 3:1-5
Êlan kliăng: “Ơ phung ayŏng adei, ti knhal tuč hră anei kâo akâo kơ diih wah lač kơ hmei đa, čiăng kơ klei Khua Yang blŭ dưi jing lar djăl leh anăn mâo klei mpŭ msĕ si truh leh ti krah diih” (II Têsalônik 3:1)
Klei êmuh ksiêm mĭn: Ya bruă Khua ƀĭng kna Y-Pôl iêô mthưr phung đăo Têsalônik ngă? Si brei diñu lŏ ngă čiăng kơ klei hdĭp ƀrư̆ hruê ƀrư̆ đĭ kyar leh anăn tŭ dưn? Mơ̆ng klei hriăm anei, mđĭ ai drei ya bruă srăng ngă?
Leh klei mđĭ ai phung đăo hlăm Sang Aê Diê Têsalônik đăo kjăp dôk guôn hruê Khua Yang lŏ hriê, Khua ƀĭng kna Y-Pôl klah čŭn hŏng klei iêô mthưr, “Ơ phung ayŏng adei, ti knhal tuč hră anei kâo akâo kơ diih wah lač kơ hmei đa, čiăng kơ klei Khua Yang blŭ dưi jing lar djăl leh anăn mâo klei mpŭ msĕ si truh leh ti krah diih (êlan 1). Wăt tơdah phung hiu hưn Klei Mrâo Mrang Jăk mâo boh tŭ dưn, tuôm mkŏ mjing leh lu Sang Aê Diê kơ Aê Diê ƀiădah Khua ƀĭng kna Y-Pôl leh anăn phung mă bruă mbĭt čiăng snăk klei wah lač brei mơ̆ng phung mkăn. Ñu tuôm thâo mă bruă kơ Aê Diê jing knhuang mŭt hlăm klei bi blah hlăm mngăt kjham snăk plah wah klei myang yang jhat hŏng phung ƀuôn sang Aê Diê (Êphêsô 6:12). Kyua anăn, phung mă bruă kơ Aê Diê brei dôk nanao hlăm klei mprăp hŏng klei wah lač leh anăn asăp wah lač mơ̆ng phung đăo, akâo kơ Aê Diê đru “dưi tlaih mơ̆ng phung mnuih ƀai leh anăn jhat; kyuadah amâo djŏ ôh jih jang mnuih mâo klei đăo” (êlan 2). Klei bi wah lač hdơ̆ng pô srăng mđĭ thiăm klei ktang čiăng kơ êpul hiu hưn Klei Mrâo Mrang Jăk mơ̆ng Khua ƀĭng kna Y-Pôl tŭ dưn kơ Aê Diê, msĕ si tŭ dưn leh hŏng mnuih Têsalônik.
Ƀuh klei đăo diñu, Khua ƀĭng kna Y-Pôl bi mklă: Kyua Aê Diê ăt sĭt suôr, snăn “Ñu srăng bi ktang diih leh anăn mgang diih mơ̆ng Pô Jhat” (êlan 3). Kyua anăn, čiăng amâo ngă kơ Khua ƀĭng kna Y-Pôl leh anăn phung mă bruă mbĭt amâo luč klei čang hmang, phung đăo Têsalônik srăng gưt asăp Khua ƀĭng kna Y-Pôl, lŏ dơ̆ng mbŏ thiăm knuih hdĭp hlue si Klei Aê Diê Blŭ. Yang Mngăt Jăk srăng atăt ai tiê diñu leh anăn phung đăo mkăn tui tiŏ klei khăp Aê Diê leh anăn klei gĭr Khua Yang Yêsu čiăng jih jang phung ƀuôn sang Aê Diê hdĭp hlue si Klei Aê Diê Blŭ mtô hlăm ai tiê thâo khăp leh anăn thâo gĭr mơ̆ng Aê Diê. Klei đăo bi mguôp hŏng knuih hdĭp hriê kơ prŏng hlue si Klei Aê Diê Blŭ mtô hŏng ai tiê thâo khăp leh anăn thâo gĭr jing hdră čiăng kơ phung đăo ti Têsalônik hŏng grăp čô phung đăo kơ Aê Diê hriê kơ prŏng hlăm mngăt leh anăn tŭ dưn kơ Ñu.
Phung ƀuôn sang Aê Diê hruê anei dưi mđĭ ai lŏ dơ̆ng đăo kjăp kơ Khua Yang, dlăng, hriăm Klei Aê Diê Blŭ grăp hruê čiăng hriê kơ prŏng hlăm mngăt. Yang jhat leh anăn phung ƀai ăt ngă kơ drei, ƀiădah brei hơĭt ai tiê kyua Yang Mngăt Jăk srăng thiăm ai ktang mrâo čiăng kơ drei thâo gĭr hlăm djăp boh klei, bi blŭ hrăm hŏng grăp čô hlăm klei khăp leh anăn tŭ dưn kơ Khua Yang. Grăp čô phung đăo đăm wơr ôh bruă wah lač kơ hjăn pô leh anăn wah lač kơ ayŏng amai adei hlăm klei đăo čiăng jih jang drei mâo thiăm klei dưi mă bruă kơ Khua Yang tŭ dưn hĭn.
Drei dôk kjăp hlăm klei đăo mơ̆, hriê kơ prŏng hlăm klei hdĭp mngăt grăp hruê čiăng kơ Aê Diê yua leh anăn tŭ dưn kơ Ñu mơ̆?
Wah lač: Ơ Ama khăp hơiêng, kâo thâo kâo jing êdu awăt. Akâo kơ Khua Yang pap brei kơ klei kâo amâo đăo. Akâo Yang Mngăt Jăk thiăm brei klei ktang mrâo čiăng kâo sĭt suôr hlue ngă Klei Aê Diê Blŭ leh anăn srăng wah lač brei kơ ayŏng adei pô hlăm klei đăo čiăng kơ hmei hrăm mbĭt mâo boh tŭ dưn kơ Ih. Kâo wah lač hlăm Anăn Khua Yang Yêsu Krist, Amen.
Dlăng Klei Aê Diê Blŭ hlăm tlâo thŭn: Klei Mtô Mñă Klei Bhiăn 25
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
