Henplais 4:3-10
Nqe cim:
“Hnub no yog nej hnov Vajtswv lub suab hu, nej tsis txhob tawv ncauj” (Henplais 4:7b).
Lus nug rau sawvdaws xav:
- Cov neeg Yixalayees uas ntxeev siab rau tus Tswv thaum nyob tom tiaj suab puam lawv raug xwmtxheej dabtsi?
- Muaj yam dabtsi qhia rau cov ntseeg Yexus thaum tseem muaj “hnub no”?
- Peb yuav ua cas thaum tseem suav hais tias muaj hnub no?
Cov neeg Fabkis muaj lo lus pajlug hais tias: “Txhob khuvxim naghmo, txhob tos txog tagkis, txhob tseg dhau hnub no”. Tej yam uas tshwmsim dhau los pauv hloov tsis tau li, tej uas tagkis yuav muaj los yeej tsis muaj tug paub meej, yam uas peb yuav ua tau tsuas yog hnub no xwb. Tiamsis yuav paub txiav txim siab kom yog rau hnub no yuav tsum muaj lub siab xav txog tej yam uas muaj dhau los thiab ua zoo txiav txim siab rau yam yuav ua.
Nyob hauv Henplais 4:3-10, tus sau tau hais ob zaug txog Vajtswv kev rau txim rau cov neeg Yixalayees uas tawv ncauj: “tsis tau mus nrog Vajtswv so” (nqe 3, 5). Qhov ntawd kuj yog cov lus uas tau muab sau tseg hauv Ntawv Nkauj 95:11, thiab tus sau phau Henplais hais mus hais los txog qhov ntawd vim tseemceeb heev thiab yog yam muab rau cov neeg tawv ncauj xaiv kom paub txiav txim siab rau qhov yog.
Raws li keebkwm hauv Vajluskub sau tseg, cov Yixalayees phaum neeg hnub nyoog muaj 20 xyoo uas tawm nram tebchaws Iziv los puavleej tuag tas rau tom tiaj suabpuam, tsis tau txais lo lus coglus tseg nrog Vajtswv so. Hauv phau Ntawv Nkauj 95:7-8, tus sau ceebtoom rau cov nyeem hais tias, “Nej txhob ua neeg tawv ncauj li nej cov yawg koob ua thaum nyob nram tiaj suabpuam”. Siv cov lus raws li hauv Ntawv Nkauj 95 los hais, tus sau phau Henplais hais ntxiv txog tus Tswv teem ib hnub hu ua “hnub no” caw kom peb tau mus nrog Vajtswv so. Txawm hais tias Yausuas coj cov Yixalayees phaum tomqab los txog lub Tebchaws Coglus Tseg tiamsis nws pub tsis tau rau sawvdaws “nrog Vajtswv so” (nqe 8). Vim thaum nyob hauv lub tebchaws Kana-as, haiv neeg Yixalayees yeej tseem tawmtsam Vajtswv thiab tsis ua raws li Nws tej lus qhia, lawv muaj kev sib ntaus sib tuas tsis tseg, tseem tos rawv kom “tau mus nrog Vajtswv so” (nqe 10).
Mus nrog Vajtswv so tsis yog siv zog los ntawm peb lub dag zog, vim tsis muaj ib leej tibneeg twg yuav ua tau zoo kom txaus tus Tswv dej siab thiab lees yuav. Qhov uas yuav tau mus nrog Vajtswv so tsuas muaj tib txoj kev xwb yog txais yuav txojkev cawmdim uas Vajtswv muab pub los ntawm kev ntseeg: rau qhov “Vajtswv tus uas hlub nej, Nws cawm nej dim twb yog vim nej ntseeg” (Efexus 2:8). Tswv Yexus tau los hauv lub ntiajteb, Nws tuag saum tus ntoo Khaublig, ua txoj kev rau txhua tus tibneeg tau mus nrog Vajtswv so. Zaj uas hais txog Tswv Yexus yeej muab qhia rau txhua tus hnov thiab hais mus hais los, tiamsis qhov tseemceeb yog peb txais yuav zaj ntawd li cas xwb. Vajtswv Txojlus hais tias: “Nej ua tib zoo mloog kuv tej lus. Lub sijhawm no yog lub sijhawm uas Vajtswv pom zoo pab nej. Hnub no yog hnub uas nej yuav dim nej lub txim” (II Kauleethaus 6:2b). Cia li qhib siab txais yuav yam khoom plig Vajtswv muab pub uas yog kev cawm dim, thiab qhia rau coob leej ntau tus kom tau los txais yuav ib yam nkaus.
Thov Vajtswv,
Tus Tswv, ua Koj tsaug uas tseem muaj “hnub no” rau nyuam yaus tau hnov Koj tej lus qhia. Thov pab kom nyuam yaus muaj lub siab mos muag txais tos Koj tej lus qhia los ntawm kev ntseeg, thiab coj txoj kev cawm dim mus qhia rau lwm tus, pib hnub no ntag. Amees.
Peb puas tau txais yuav yam khoom plig uas yog kev cawm dim lawm?
Nyeem Vajluskub hauv peb lub xyoo: Yelemis 2:26-3:13
