Klei Aê Diê Blŭ: Hêbrơ 4:3-10
Êlan kliăng: “Hruê anei, tơdah diih hmư̆ asăp Ñu, đăm bi khăng ai tiê diih ôh.” (Hêbrơ 4:7b)
Klei êmuh ksiêm mĭn: Ya boh tŭ kơ ênuk phung ƀuôn sang Israel ngă klei bi kdơ̆ng hlăm kdrăn tač? Si klei mñă kơ phung đăo tơdah brei mmông găl “Hruê anei”? Si hdră êlan drei mă tŭ mmông găl anei?
Phung Prăng mâo klei duê snei, “Đăm hơưi ôh kơ hruê mbruê, đăm guôn ôh kơ hruê mgi, đăm dêč ôh kơ hruê anei”. Ya klei truh leh hlăm hruê mbruê amâo dưi lŏ bi mlih ôh, bi hruê mgi si srăng jing amâo mâo pô dưi thâo klă ôh, ya bruă drei dưi ngă knŏng hlăm hruê anei yơh. Ƀiădah lĕ, čiăng mâo klei čuăn ngă bi djŏ hruê anei, brei dlăng kơ ya klei truh êgao leh, leh anăn ksiêm mĭn hŏng klei răng.
Hlăm Hêbrơ 4:3-10, dua blư̆ pô čih hră mñă wĭt kơ kđi Aê Diê pioh kơ ênuk phung ƀuôn sang Israel khăng ai tiê: “Diñu amâo srăng mŭt ôh hlăm klei Kâo mdei” (êlan 3, 5). Anei jing klei blŭ klah čŭn leh hlăm Klei Mmuñ Hđăp 95:11, leh anăn pô čih hră Hêbrơ mñă wĭt mñă nao klei blŭ anei kyua klei yuôm ñu, mbĭt hŏng anăn ăt brei phung dôk khăng ai tiê mđing hmư̆ kăp ksiêm mĭn.
Dưh knang kơ klei truh hlăm hƀuê ênuk, jih jang phung Israel hlăk ênuk kbiă mơ̆ng čar Êjip djiê leh hlăm kdrăn tač, amâo dưi mă tŭ ôh klei ƀuăn mŭt hlăm klei mdei, hlăm Klei Mmuñ Hđăp 95:7-8, pô čih hră mñă kơ phung dlăng hră, “Hruê anei tơdah diih hmư̆ asăp Ñu, đăm bi khăng ai tiê diih ôh”. Mañ klei blŭ Klei Mmuñ Hđăp 95, pô čih hră Hêbrơ knăm kơ klei Khua Yang bi kčah leh hruê mmông pia “Hruê anei” čiăng kơ drei wĭt lač klei Khua Yang iêu mthưr, čiăng dưi mŭt hlăm klei Ñu mdei. Wăt tơdah Y‑Yôsuê atăt leh phung ƀuôn sang Israel ênuk lŏ čuê ksŭng mŭt hlăm Čar Aê Diê Ƀuăn, ƀiădah lĕ ñu amâo dưi ôh “brei diñu mâo klei mdei” (êlan 8). Kyuadah êjai dôk hlăm čar Kanaan, phung ƀuôn sang Israel ăt bi kdơ̆ng leh anăn gao klei bhiăn Aê Diê, boh tŭ kơ diñu jing klei knap mñai bi blah hdơ̆ng pô, hŏng phung roh mơ̆ng êngao, leh anăn amâo tuôm mdei ôh čang guôn kơ hruê diñu dưi čhuang “mŭt hlăm klei Aê Diê mdei, mdei msĕ mơh mơ̆ng bruă pô” (êlan 10).
Dôk hlăm klei Aê Diê mdei amâo djŏ ôh kyua klei gĭr ktưn mă bruă. Kyuadah amâo mâo pô knang kơ klei gĭr hjăn ñu pô Aê Diê tŭ ư ôh. Hdră êlan hjăn sa čiăng dưi mŭt mdei hlăm Khua Yang jing mă tŭ mnơ̆ng brei jing klei bi mtlaih hŏng klei đăo: “Kyuadah hŏng klei pap yơh diih tlaih leh kyua klei đăo. Klei bi mtlaih anăn amâo kbiă hriê mơ̆ng diih pô ôh, ƀiădah jing klei Aê Diê brei” (Êphêsô 2:8). Khua Yang Yêsu hriê leh ti lăn ala, djiê ti kyâo bi kal čiăng pŏk êlan kơ jih jang mnuih dưi mŭt hlăm klei mdei. Klei blŭ anei mñă lu blư̆, ƀiădah mta klei yuôm jing si drei mă tŭ? Klei Aê Diê Blŭ lač, “Nĕ hruê anei jing hruê găl; nĕ hruê anei jing hruê klei bi mtlaih!” (II Kôrantô 6:2b). Pŏk bĕ ai tiê kăp mă tŭ mnơ̆ng brei jing klei bi mtlaih Aê Diê brei leh anăn hưn kơ lu mnuih dưi mă tŭ mbĭt.
Si ngă drei mă tŭ leh mơ̆ mnơ̆ng brei kơ drei jing klei bi mtlaih?
Wah lač: Ơ Khua Yang, lač jăk kơ Ih kyua mmông găl “Hruê anei” čiăng kơ kâo dưi hmư̆ Klei Ih Blŭ. Akâo Khua Yang brei kơ kâo ai tiê êdu êun kăp mă tŭ klei Ih ƀuăn hŏng klei đăo, mbĭt hŏng klei hur har ba mnơ̆ng brei jing klei Khua Yang bi mtlaih kơ lu pô mkăn hruê anei mtam.
Dlăng Klei Aê Diê Blŭ hlăm tlâo thŭn: Y‑Yêrêmi 2:26–3:13
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm
Tơdah mâo klei blŭ mguôp, akâo kơ diih mơĭt hră hlăm gmail: radioelansitnik@gmail.com
Kênh Youtube BHKTHN:
