Daniyees 9:24-27
Nqe cim:
“Koj tsis txhob muab tej uas Vajtswv qhia rau hauv phau ntawv no npog cia, rau qhov twb yuav txog lub sijhawm uas muaj tej ntawd” (Tshwmsim 22:10).
Lus nug rau sawvdaws xav:
- Peb ntu caijnyoog tseemceeb ntawm 70 lub limtiam muaj xwmtxheej dabtsi los ua lubcim?
- Tej xwmtxheej ntawd muaj tiav licas hauv keebkwm ntiajteb?
- Muaj ntau yam nyob hauv lo lus cev tseg no twb muaj tiav lawm, qhia peb yuav tsum ua lubneej licas rau tej “limtiam” yuav los txog?
Ntu Vajluskub hnub no piav txog feem keebkwm yuav tshwm los, muab cais ua peb ntu caijnyoog: Tim ib, xya caum lub lim tiam pib thaum muaj lus tso cai txhim kho lub nroog Yeluxalees dua tshiab. Tim ob, tus uas Vajtswv xaiv ua tus thawjtswj los txog (nqe 25). Tim peb, kev txiav txim zaum kawg raws li Vajtswv tau npaj tseg (nqe 27).
Tej lus cev tseg no yuav totaub licas? Lo lus “xya caum zaus xya” lossis xya caum lub liam tiam nyob hauv lus Henplais yog “shabua”, hais txog ib chav ntawm tus lej xya. Saib los ntawm tej lus qhia txog lub sijhawm uas lub nroog Yeluxalees raug puastsuaj thiab tej lus timtswv Khali-ees hais, raws li cov tub txhais Vajluskub, ib lub limtiam yog xya xyoo; yog li ntawd “xya caum zaus xya” yuav yog 490 xyoo. Xyoo 458 U.Y, huabtais Ataxawxes tso cai txhim kho lub nroog Yeluxalees (Exalas 7:11-26). Txawm yog twb muaj ntau pab rov los ua ntej lawm, los xyoo no luag thiaj suav hais tias yog xyoo ntaus cim rau xya caum lub limtiam. “Xya lub limtiam” xubthawj (49 xyoos) tej zaum yog ntu sijhawm siv los txhim kho lubnroog dawbhuv. Raws li qhov kev xam no, ntu caijnyoog tim ob uas ntev “xya lub liamtiam thiab rau caum ob lub lim tiam (483 xyoo) yog xyoo 32 T.Y ntag. Ntawd ncaj rau lub xyoo cov tub tshawbfawb keebkwm thiab txhais Vajluskub hais tias yog xyoo Tus Cawmseej raug ntsia rau saum tus ntoo khaublig, zaj ntawd ua rau tus Tswv haivneeg thiab lub nroog dawbhuv “dim ntawm tej kev phem kev qias. Thiab Vajtswv yuav zam txim rau cov neeg uas ua txhaum. Txij thaum ntawd mus yuav muaj kev ncaj ncees mus ibtxhis” (nqe 24).
Tshuav lub limtiam kawg yog licas? Cov tub txhais Vajluskub ib txhia hais tias, muaj ib ntu caijnyoog uas ntev ntau tiam neeg los quas, ntu caijnyoog ntawd yog tej uas hais hauv nqe 26, tshuav lub limtiam kawg uas muaj xya xyoo txomnyem yog tej uas hais hauv nqe 27. Ib txhia ho xav hais tias tsis muaj ntu caijnyoog los quas, tiamsis peb tabtom nyob rau lub lim tiam kawg ua ntej tus uas ua kom muaj kev liamsim raug txiav txim. Txawm totaub raws txojkev xav twg, los peb yeej pom hais tias tej lubcim hais txog lub limtiam kawg twb tshwm zuj zus lawm, lub nroog dawbhuv thiab lub Tuamtsev raug puastsuaj, muaj kev tsov rog (nqe 26-27), tej ntawd zoo li tej cim uas Tswv Yexus hais hauv Mathais 24.
Dhau ntawm tej uas qhia txog xya caum lub limtiam no, peb pom hais tias tus Tswv yog tus npaj tseg thiab tswjkav tagnrho keebkwm. Ntau yam uas tus Tswv hais twb muaj tiav lawm, ua rau peb muaj kev cia siab thiab qhuab ntuas peb nco ntsoov tias tej yam uas tsis tau tshwmsim yeej yuav tau tus Tswv ua kom tiav. Yam uas peb yuav tsum ua yog cia siab, muab siab npuab tus Tswv, ua neej zov tos thiab ua neej ntse thaum nyob hauv “lub limtiam” kawg no. Peb tsis paub hais tias hnub twg tus Tswv los, tiamsis peb ntseeg hais tias hnub ntawd twb los ze lawm!
Thov Vajtswv
Tus Tswv, nyuam yaus ua Koj tsaug vim Koj yog tus teem muaj keebkwm thiab keebkwm mus raws li koj npaj tseg. Thov pab nyuam yaus ua neej muaj tswvyim hauv “lub limtiam” kawg no los ntawm lub siab zov tos thiab thov Vajtswv txhua hnub. Amees.
Peb puas ua lubneej qhia tshwm txojkev ntseeg zov tos hnub tus Tswv yuav los lawm tau?
HNUB NO YOG COV TUB NTXHAIS NTSEEG HNUB, THOV CAW SAWVDAWS NCO NTSOOV THOV VAJTSWV PAB COV HLUAS, COJ QHIA, PAB KOM LAWV TUAV RUAJ KEV NTSEEG THIAB KOOM TES UA VAJTSWV HAUJLWM.
Nyeem Vajluskub hauv peb lub xyoos: Yaxayas 34:1-35:3
Kênh Youtube BHKTHN:
