Klei Aê Diê Blŭ: Y‑Đaniel 9:24‑27
Êlan kliăng: “Leh anăn ñu lač kơ kâo, “Đăm kđăm ôh klei blŭ hưn êlâo hlăm hdruôm hră anei, kyuadah mông giăm truh leh.” (Klei Bi Êdah 22:10).
Klei êmuh ksiêm mĭn: Tlâo gơ̆ng bi kčah yuôm kơ kjuh pluh hruê kăm bi knăl hŏng ya klei truh? Si klei truh anăn bi sĭt hlăm hƀuê ênuk lăn ala? Lu kdrêč hlăm klei khua pô hưn êlâo hưn anei truh bi sĭt leh mtô drei si dôk hdĭp hlăm “hruê kăm” adôk?
Trăn Klei Aê Diê Blŭ hruê anei hưn mdah kdrêč adôk kơ hƀuê ênuk hŏng tlâo gơ̆ng bi kčah: Tal sa, kjuh pluh hruê kăm bi knăl dơ̆ng mơ̆ng klei mtă lŏ mkra leh anăn lŏ mdơ̆ng ƀuôn Yêrusalem. Tal dua, Pô arăng trôč êa ƀâo mngưi truh (êlan 25). Tal tlâo, ênuk klei bi rai knhal tuč Ñu čuăn leh (êlan 27).
Si thâo săng kơ klei hưn êlâo anei? Boh blŭ “hruê kăm” hlăm klei Hêbrơ jing “shabua”, čiăng lač kơ hnơ̆ng mkă mrô kjuh. Hnơ̆ng mkă anăn srăng čuăn hŏng klei truh. Tui si klei truh jing mrô thŭn ƀuôn Yêrusalem srăng ênguôl leh anăn klei dĭng buăl jăk Gabriel lač leh. Tui si êpul mblang Klei Aê Diê Blŭ, “hruê kăm” tinei thâo săng jing kjuh thŭn; kyuanăn, “kjuh pluh thŭn” srăng jing 490 thŭn. Thŭn 458 êlâo kơ Krist, mtao Artasersês mtrŭn klei mtă brei lŏ mdơ̆ng ƀuôn Yêrusalem (Y‑Êsra 7:11‑26). Wăt tơdah mâo lu gưl wĭt kơ ƀuôn êlâo kơnăn, ƀiădah anei jing thŭn lu mnuih yap bi knăl kơ kjuh pluh hruê kăm. “Kjuh hruê kăm” tal êlâo hĭn (49 thŭn) năng ai hlăm brô thŭn pioh kơ klei lŏ mdơ̆ng ƀuôn doh jăk. Tui si klei tĭng yap anei, hruê mmông bi kčah tal dua “kjuh hruê kăm leh anăn năm pluh dua hruê kăm” (483 thŭn) djŏ thŭn 32 êdei kơ Krist. Tui si phung ksiêm hriăm hƀuê ênuk leh anăn phung mblang Klei Aê Diê Blŭ lač, anăn jing thŭn hlăk arăng pơ̆ng Yang Krist ti kyâo bi kal, klei truh prŏng “bi ruê̆ hĕ klei gao klei bhiăn, bi ruê̆ klei soh, čiăng bi doh klei wê, bi truh klei kpă ênô hlŏng lar” (êlan 24).
Bi hruê kăm knhal tuč si jing? Mâo pô mblang Klei Aê Diê Blŭ lač, mâo sa gưl bi kgăn, sui lu gưl ênuk, gưl bi kgăn anăn jing êlan 26, bi hruê kăm knhal tuč mâo kjuh thŭn knap mñai jing êlan 27. Đa phung mkăn lač amâo mâo “gưl bi kgăn” ôh, ƀiădah drei dôk hdĭp hlăm hruê kăm knhal tuč êlâo kơ pô bi rai tŭ klei bi kmhal. Wăt tơdah thâo săng tui si ya êlan dưn, drei ƀuh klei bi knăl kơ hruê kăm knhal tuč bi sĭt leh, hŏng ƀuôn doh jăk leh anăn sang yang arăng lŏ bi rai, klei bi blah truh (êlan 26‑27) djŏ msĕ si klei bi knăl kơ hruê knhal tuč Khua Yang Yêsu lač hlăm Y‑Mathiơ 24.
Hŏng klei bi êdah kơ kjuh pluh hruê kăm anei, drei ƀuh Khua Yang jing Pô čuăn leh anăn kiă kriê ktuê jih kƀuê ênuk. Lu mta klei Khua Yang lač bi sĭt leh kluôm dhuôm brei kơ drei klei čang hmăng leh anăn mñă kơ drei, jih ya klei adôk Khua Yang ăt srăng bi truh ưm mơh. Bruă drei jing đăo kơ Khua Yang, dôk sĭt suôr, kăp răng leh anăn hdĭp thâo mĭn hlăm “hruê kăm” knhal tuč anei. Drei amâo thâo klă ôh hbĭl hruê Khua Yang lŏ hriê ƀiădah đăo kjăp kơ hruê Khua Yang hriê giăm truh leh!
Si ngă knhuah hdĭp drei bi êdah klei đăo kơ hruê Khua Yang hriê giăm truh leh mơ̆?
Wah lač: Ơ Khua Yang, bi mni kơ Khua Yang kyuadah Ih bi kčah hƀuê ênuk leh anăn hƀuê ênuk dôk nao hlue si klei Khua Yang dăp leh. Akâo Khua Yang đru kâo hdĭp thâo mĭn hlăm “hruê kăm” knhal tuč anei hŏng ai tiê klei mĭn dôk răng leh anăn wah lač.
Dlăng Klei Aê Diê Blŭ hlăm tlâo thŭn: Y‑Êsai 34:1–35:3
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm
Tơdah mâo klei blŭ mguôp, akâo kơ diih mơĭt hră hlăm gmail: radioelansitnik@gmail.com
Kênh Youtube BHKTHN:
