I Petus 3:7
7 Nej cov uas ua txiv, nej yuav tsum niaj hnub nco ntsoov hais tias pojniam tsis muaj zog li nej. Yog li ntawd, nej yuav tsum saib taus nej tej pojniam, rau qhov Vajtswv yeej yuav pub txojsia rau lawv thiab rau nej ib yam nkaus. Yog nej ua li ntawd, thaum nej thov Vajtswv thiaj tsis muaj ib yam dabtsi los tab kaum nej.
Lus nug rau sawvdaws xav:
– Kev sib raug zoo ntawm ob niamtxiv tseemceeb npaum licas?
– Zeem paub qhov no, tus txiv yuav tsum ua licas rau tus pojniam?
– Yog ib tug txiv ntseeg Yexus, peb ua raws lo lus qhuab ntuas no licas?
Lub cuabyig yog yam tseemceeb nyob hauv ib pab pawg neeg uas Vajtswv tsim muaj, vim li ntawd, kev ua neej hauv lub cuabyig thiab kev txhim kho lub cuabyig yog yam tseemceeb heev. Tus txiv tau Vajtswv cob ua tes haujlwm coj lub cuabyig, yog li ntawd yuav tsum muaj feemxyuam loj nyob hauv kev txhim kho lub cuabyig, tshwjxeeb yog yuav tsum xyuamxim ua zoo rau tus pojniam. “Nej cov uas ua txiv,… nej yuav tsum saib taus nej tej pojniam, rau qhov Vajtswv yeej yuav pub txojsia rau lawv thiab rau nej ib yam nkaus.” Tej uas tus txiv ua rau tus pojniam yuav cuamtshuam txog txhua sab hauv tus txiv lub neej. Nyob ntawm nyias kev xaiv ua neej, yuav ua rau ob niamtxiv tau lub neej koob hmoov lossis yuav ntsib lub neej nyob hauv “dab teb”. Ntawd yog tus txiv txojkev xaiv.
Yuav kom ua tau lub neej raws li Vajtswv Txojlus qhia, tus txiv yuav tsum zeem paub tus kheej thiab nws tus pojniam lub luag haujlwm. Nyob ntawm no, timthawj Petus qhia tus txiv yuav tsum nco ntsoov hais tias “pojniam tsis muaj zog”. Tseeb tiag, tus pojniam yeej tsis muaj txaus lub zog, kev xav thiab meejmom nyob hauv lub cuabyig, yog li ntawd, qhov no txhais tau hais tias tus txiv yuav tsum hlub, tsomkwm thiab saibxyuas tus pojniam. Thaum paub meej tus kheej lub luag haujlwm lawm, tus txiv thiaj yuav tsis siv nws lub meejmom coj thawj hauv lub cuabyig los qhuab yuam, caij tsuj tus pojniam; tiamsis vim paub hais tias tus pojniam “tsis muaj zog” nws yuav hlub thiab tseg sijhawm rau tus pojniam ntau dua qub.
Tsis yog tsuas hlub xwb, tus txiv ntseeg Yexus tseem yuav tsum “saib taus”, rau nqi rau nws tus pojniam. Tus txiv yuav tsum niaj hnub ua tus Tswv tsaug rau qhov uas tus Tswv pub tus pojniam rau nws thiab yuav tsum xam pom hais tias tus pojniam ntawd muaj nqis kawg li. Tus tub txhais Vajluskub uas yog Matthew Henry sau tseg hais tias: “Vajtswv tsis siv Adas lub taubhau tsim Evas los tswjkav Adas, kuj tsis siv Adas txhais kotaw tsim Evas kom raug Adas caij tsuj, tiamsis siv Adas tus txha tav uas sib txig sib luag nrog nws, nyob hauv qab nws txhais tes kom tau tsomkwm, thiab nyob ze nws lub siab kom tau hlub.”
Vim licas tus txiv yuav tsum ua tej yam tsimnyog rau nws tus pojniam? Vim lub neej txijnkawm cuamtshuam txog rau lub neej sab ntsujplig, “thaum…thov Vajtswv thiaj tsis muaj ib yam dabtsi los tab kaum…” Peb yuav hlub tsis taus tus Tswv yog hais tias peb tsis hlub cov neeg ibncig peb, tiamsis peb yuav hlub tsis taus cov neeg ibncig peb yog hais tias peb tsis hlub tus nyob ze peb tshajplaws, uas yog peb tus txij tus nkawm!
Thov Vajtswv,
Tus Tswv, thov Koj qhia kom cov txiv uas ntseeg Yexus zeem paub lawv lub luag haujlwm kom ua tiav qhov uas Koj cia lawv los coj lub cuabyig, thiab ua txhua yam ntawd los ntawm kev hlub, txo hwjchim, ua siab mos muag, tshwjxeeb yog thaum rau tus pojniam. Amees.
Yog ib tug txiv, nej puas ua lub neej pub rau nej tus pojniam raws li Vajtswv Txojlus qhia lawm tau?
Nyeem Vajluskub hauv peb lub xyoos: Mathais 9:35-10:31
Kênh Youtube BHKTHN:
