Klei Aê Diê Blŭ: I Y-Pêtrôs 3:7
Êlan kliăng: “Msĕ mơh, Ơ phung ung, brei diih dôk dơ̆ng ƀơ̆ng huă hŏng mô̆ diih hŏng klei thâo mĭn, mpŭ kơ mô̆ jing phung awăt hĭn hlăm asei mlei, kyuadah diñu jing phung dưn mbĭt klei pap kơ klei hdĭp, čiăng kơ amâo mâo klei bi gun ôh kơ klei diih wah lač.” (I Y-Pêtrôs 3:7)
Klei êmuh ksiêm mĭn: Si hnơ̆ng yuôm kơ klei bi mguôp ung hŏng mô̆? Thâo săng klei anei, si phung ung srăng dôk dơ̆ng ƀơ̆ng huă hŏng mô̆? Jing sa čô ung đăo kơ Krist, si drei ngă tui si klei mtă mtăn anei?
Gŏ sang jing sa kdrêč điêt hliê hlăm ƀuôn sang phŭn tal êlâo hĭn Aê Diê mkŏ mdơ̆ng, kyuanăn, klei dôk dơ̆ng ƀơ̆ng huă hlăm gŏ sang leh anăn bruă mkŏ mdơ̆ng gŏ sang jing klei yuôm snăk. Aê Diê jao kơ phung ung bruă klam gĭt gai gŏ sang, mâo bruă klam prŏng hĭn hlăm klei mkŏ mdơ̆ng gŏ sang, boh nik nak brei dôk dơ̆ng ƀơ̆ng huă hŏng mô̆ hŏng klei thâo mĭn. “Ơ phung ung, brei diih dôk dơ̆ng ƀơ̆ng huă hŏng mô̆ diih hŏng klei thâo mĭn… kyuadah diñu jing phung dưn mbĭt klei pap kơ klei hdĭp.” Si klei sa čô ung dôk dơ̆ng ƀơ̆ng huă hŏng mô̆ ñu srăng bi hmăi truh kơ djăp mta kdriêk hlăm klei hdĭp ung. Hlue tui si klei dôk dơ̆ng ƀơ̆ng huă, ung mô̆ srăng bi đru bi knal klei pap klei hdĭp amâodah srăng găn hruê mlan “war pui ti lăn ala”. Anei jing klei ruah mơ̆ng phung ung!
Čiăng dôk hdĭp djŏ msĕ si Klei Aê Diê Blŭ mtô, phung ung brei thâo kral anôk bruă ñu pô leh anăn mô̆. Tinei, khua ƀĭng kna Y-Pêtrôs mtô phung ung brei dlăng kơ mô̆ “jing phung awăt hĭn hlăm asei mlei”. Blŭ kluôm, phung mô̆ khăng êdu awăt hĭn hlăm ai ktang, klei mĭn, leh anăn anôk bruă hlăm gŏ sang, kyuanăn čiăng lač kơ phung ung mă tŭ bruă klei khăp, klam bruă, răng mgang mô̆ ñu. Tơdah thâo săng djŏ kơ anôk bruă pô, phung ung amâo srăng mjhua ôh klei pô gĭt gai hlăm gŏ sang dôk dơ̆ng ƀơ̆ng huă khăng ktang, ngă khua, ƀiădah kyuadah thâo săng kơ mô̆ pô jing “awăt hĭn” snăn dôk hdĭp hŏng klei khăp, săn asei mlei kơ mô̆ lu hĭn.
Amâo djŏ knŏng khăp ôh, ƀiădah phung ung wăt “mpŭ”, bi yuôm kơ mô̆ pô. Brei phung ung thâo hdơr knga bi mni kơ Khua Yang nanao kyua brei kơ pô sa čô mô̆ leh anăn brei dlăng kơ mô̆ jing yuôm snăk. Pô mblang Klei Aê Diê Blŭ Matthew Henry čih snei: “Aê Diê hrih mjing H’Êwơ amâo djŏ mơ̆ng boh kŏ Y-Ađam ôh čiăng đăm kăp gai gĭt ñu, kăn djŏ mơ̆ng plă jơ̆ng ñu rei čiăng đăm ñu juă lin gơ̆, ƀiădah mơ̆ng klang grưh ñu čiăng mâo klei mtăp mđơr hŏng ñu, ti gŭ păl kngan ñu kăp răng mgang gơ̆, leh anăn giăm tiê boh ñu kăp khăp hơiêng gơ̆.”
Ya ngă brei phung ung mâo klei dôk dơ̆ng ƀơ̆ng huă bi djŏ hŏng mô̆ pô? Kyuadah klei hdĭp ung mô̆ bi hmăi truh kơ klei hdĭp mngăt myang, “čiăng kơ amâo mâo klei bi gun ôh kơ klei diih wah lač”. Drei amâo dưi khăp kơ Khua Yang ôh tơdah amâo mâo khăp ôh kơ pô riêng gah drei, ƀiădah drei amâo dưi khăp kơ pô riêng gah drei ôh tơdah drei amâo thâo khăp ôh kơ pô giăm hĭn hŏng drei, jing mô̆ drei pô!
Jing sa čô ung, si ngă diih bi êdah klei thâo mĭn leh anăn dôk dơ̆ng ƀơ̆ng huă hŏng mô̆ djŏ tui si Klei Aê Diê Blŭ mtô mơ̆?
Wah lač: Ơ Khua Yang, akâo kơ Ih brei phung ung đăo kơ Krist thâo kral anôk bruă diñu čiăng dưi bi leh bruă klei Ih iêô mthưr diñu jing pô gĭt gai gŏ sang, leh anăn ngă bi leh bruă jao anăn hŏng klei khăp, klei luă gŭ, êdu êun, boh nik nak hŏng mô̆ diñu.
Dlăng Klei Aê Diê Blŭ hlăm tlâo thŭn: Y-Mathiơ 9:35-10:31
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm
Tơdah mâo klei blŭ mguôp, akâo kơ diih mơĭt hră hlăm gmail: radioelansitnik@gmail.com
Kênh Youtube BHKTHN:
